EGETABU KIO
OMORANDIA
Ogochaakera
Egetabu kia omorandia nigo kere nobosemia korwa ase omonto oyomo oyio orengerereti mono igoro y’obogima bwa Mwanyabaanto, akarora buna bore obweng’e mono, bore n’emenchando n’obororo. Ere agateeba “Onsi mbosa”. Ase okorengereria kwaye akarora ng’a Mwanyabaanto takonyara komanya emeroberio ya Nyasae ekiagera Nyasae nere okoroberia emeroberio yonsi ense engima. Ase ig’Omonene nigo agototeebia tokore emeremo ne chinguru mono ase amatuko ayio tore moyo.
Omoriki bw’egetabu eke kio’morandia nigo arenge oyomo bw’abaanto abwo barenge abang’aini ase chingaki chiria chia kare chingaki chi’abagiriki aria moocha ya gati. Nigo arenge omonto orenge korengereria mono naende otarenge goisaneka. Nigo arenge kona koiranera iranera ibirengererio biaye boigo nobosemia bonde ase chingaki chiaye. Nonya kagokwana igoro ya Sulemani omwana o Daudi omorwoti o’Yerusalemu 1:1,2, boigo nigo agokwana igoro yemeremo yaye n’obonda bwaye ase chingaki chiaye chia magega.
Ebirengererio ebinge bi’omorandia oyo nigo bikororekana ebiogochanda mono boigo n’ebiobororo obonge. Korende ase ayio onsi ere nabwate okomanya kwaye gw’ekeene, nigo agotosemia iga ase omoerio bw’egetabu eke “Omoerio bw’amang’ana onsi noyo. Omoiroke Nyasae na obwate amachiiko aye; ekiagera ayio naro abanto bonsi bagwenerete bakore” 12:13.
Okobagwa kw’egetabu eke:
Obogima mbobwate engencho? 1:1—2:26
Gokwana igoro y’obogima 3:1—11:8
Obosemia bw’ogokorera 11:9—12:8
Ogokorera 12:9-14
Ⅰ
Obogima nigo bore bosa
Ⅰ Aya naro amang’ana ’omorandia mosinto o Daudi, omorwoti o Yerusalemu.
Ⅱ Omorandia nigo agoteeba: Mbosa na bosa kegima, mbosa, bosa. Amang’ana onsi mbosa.
Ⅲ Mbitoki ki Mwanyabaanto akonyora ase okwerosia gokora emeremo emekong’u aiga inse y’erioba?
Ⅳ Ekegori ekemo nigo kegoeta, na ekende giacha, korende ense nigo egendererete kobao goika kare na kare.
Ⅴ Erioba nigo rigosoka naende riarimera, erio riaayerera gochia aase rigosoka korwa.
Ⅵ Embeo nigo ekogusa gochia Irianyi, naende yaonchoka yagusa gochia sugusu; nigo ekona‐goetanana yagenderera kogusa, naende yagenderera goetanana naende yairana.
Ⅶ Chindooche chionsi nigo chikogenda ase enyancha, korende tiyana goichora. Amache ayio nigo akoirana gochia ase chindooche echio chiachakerete, naende agenderera kogenda.
Ⅷ Amang’ana onsi agokorwa nigo akorenta omooroso otanyare gokwaneka. Amaiso tari goisaneka naya akorora, na amato tari goisaneka naya akoigwa.
Ⅸ Aya arengeo kare, naro agochia kobao naende. Aya akoregete kare, naro agochia gokoreka naende. Ande tari are amayia inse y’erioba.
Ⅹ Inee! Ing’ana rinde ndireo rigokwanwa ng’a neriyia? Yaya. Kera ring’ana nao riarenge korwa kare, intwe konya totarabao.
Ⅺ Amang’ana aetire takoinyorwa, gose ayagochi‐gocha takoinyorwa nabwo bakorwa magega.
Aya omorandia eorokereirie
Ⅻ Inche omorandia nigo narenge omorwoti igoro ase Abaisraeli, agwo Yerusalemu.
ⅩⅢ Nkerua nenkoro yane korigia na komanya ase obong’aini amang’ana onsi agokoreka inse y’erioba.
Nigo ere emeremo etari y’omogooko Nyasae aeire Mwanyabaanto bechande ase okoyekora.
ⅩⅣ Narigereirie kera egento kegokorwa inse y’erioba, narorire ng’a bionsi nigo bire bosa; nigo enga buna okominyokia embeo.
ⅩⅤ Egento giachiire bogeka tigekorongeigwa, na ekiaremire tigekobareka.
ⅩⅥ Nkerengereria inche omonyene erio ngateeba, “Nenyoreire obong’aini obonge kobua abwo bonsi bantang’anerete kogamba agwo Yerusalemu. Enkoro yane yanyorire obong’aini obonge na okomanya okonge.”
ⅩⅦ Naende nkerua nenkoro yane komanya goatanana gati y’echisemi, n’oboriri, obong’aini na obobarimo, korende nigo nanyorete ng’a ayio onsi akominyokerwa konyorwa nigo are buna embeo bosa.
ⅩⅧ Ekiagera ase obong’aini obonge bore, nao omoichano omonge ore, na omonto okomenta chisemi, nigo akomenta obororo.