Ⅲ
Engaki ya kera egento
Ⅰ Kera egento nkere nekero kiaye, na aiga inse y’erioba kera ekegokorekana nkere nengaki yaye.
Ⅱ Nere engaki y’okoiborwa, na ey’ogokwa;
engaki y’ogosimeka, na ey’ogosimora ekio giasimegetwe;
Ⅲ engaki y’ogoita, na ey’okogwenia;
engaki y’ogotagora, na ey’okoagacha;
Ⅳ engaki y’okorera, na ey’ogoseka;
engaki y’okobokia amagombo, na ey’ogotenga;
Ⅴ engaki y’ogosiarera amagena, na ey’okoyasangereria;
engaki y’okoboania, na ey’ogotaboania;
Ⅵ engaki y’okorigia, na ey’ogosiria;
engaki y’okogaacha, na ey’ogotuguta;
Ⅶ engaki y’ogotandora, na ey’okobareera;
engaki y’ogokira, na ey’ogokwana;
Ⅷ engaki y’ogwanchana, na ey’okogechana;
engaki y’esegi, na ey’omorembe.
Ⅸ Inee! Mbitoki ki omonto akonyora ase emeremo yonsi agwechandera?
Ⅹ Narorire obokong’u obwo Nyasae aeire Mwanyabaanto bechande naborobwo.
Ⅺ Okorire kera egento kiabeire egeseera ase engaki yaye, naende obekire ime ase chinkoro chia Mwanyabaanto engaki etabe nomoerio. Korende nonya naboigo tibakonyara komanya aya Nyasae akorete korwa omochakano goika omoerio.
Ⅻ Namanyire ng’a gento kende tikeri kere ekiya kerabagwenere otatiga babe nomogooko, naende bakore ayare amaya ekero bare moyo.
ⅩⅢ Omonto kararie na konywa, naende egokie ase ebio echandeire, ekio nekeegwa kia Nyasae.
ⅩⅣ Namanyire ng’a gento kende gionsi Nyasae agokora nigo gekogenderera kobao kare na kare; gento kende tigekomentwa ase ekio, gose kende tigekorusigwa korwa ase ekio. Nyasae nere okorire igo, erinde Mwanyabaanto bamoiroke.
ⅩⅤ Amang’ana areo bono, nao arenge korwa kare; na ayio agochia koba, boigo nao arenge korwa kare. Nyasae nigo agokora egento keria keria kiaba naende.
Oboronge tibori ase ense
ⅩⅥ Naende nkarora aiga inse y’erioba ng’a aase ekeene na oboronge bigwenerete koba, nao obobe bore.
ⅩⅦ Erio ngateeba ase enkoro yane ime ng’a Nyasae nanachere abanyaboronge ekiina, na abanyabibe boigo, ekiagera obeekire engaki ase kera ring’ana, na ase kera emeremo.
ⅩⅧ Naende ngateeba ase enkoro yane ime ng’a Nyasae nigo agoteema Mwanyabaanto kobaenekia ng’a barabwo nigo banga buna ching’iti.
ⅩⅨ Amang’ana akonyora ching’iti naro ayio akobanyora Mwanyabaanto; buna ching’iti chigokwa, naboigo na Mwanyabaanto bagokwa. Omoika noyomo ore ase ching’iti na ase Mwanyabaanto; Mwanyabaanto tabueti ching’iti kende. Amang’ana onsi mbosa.
ⅩⅩ Mwanyabaanto nigo bakogenda aase ching’iti chikogenda; Mwanyabaanto nigo baruete ase amaroba, ne ching’iti naboigo; nigo bakoirana ase amaroba, naboigo na chirochio.
ⅩⅪ Ning’o omanyete gose omoika o Mwanyabaanto niigoro ogochia, na oyo bwe ching’iti ogenda inse y’ense?
ⅩⅫ Ase ayio nkarora ng’a gento kende tikeri kere ekiya, otatiga omonto agokere emeremo yaye; ekio nakio egetari kiaye. Ning’o orachie komoirania ache korora na komanya ayakoregete magega yaye?