Ⅷ
Ogwancherwa kw’omorwoti gokobairanera Abayahudi
Ⅰ Ase rituko riria omorwoti Ahaswero akaa Esiteri enting’ana enyomba ya Hamani, omochandi bw’Abayahudi. Modekai akanyora ribaga gosoa ase omorwoti, ekiagera Esiteri konya oteebirie omorwoti igoro y’oboiri bwaye na Modekai.
Ⅱ Bono omorwoti akarusia ebonyi eria amoete Hamani, akayea Modekai, na Esiteri akabeeka Modekai atenenere enyomba eria yarenge ya Hamani.
Ⅲ Erio Esiteri agakwana naende n’omorwoti, agatung’ama inse ase amagoro aye, akamosorora mono ase ogoitera amariga ng’a asarie omoroberio bw’ogosiria Abayahudi, oria Hamani Omoagagi aruete.
Ⅳ Omorwoti akaimokia enyimbo eria y’etaabu, akamosiema. Esiteri akaimoka, agatenena ase obosio bw’omorwoti akamorigereria.
Ⅴ Erio ere akabora, “Aye omorwoti, onye kwarorire ng’a mbuya, na onye inche nanyorire ogwancherwa asore, ne ring’ana eri korirarorekane asore ng’a nerironge, naende erio ndinkogokie, aye omorwoti, koranche karwe ogochika gotanga amang’ana aria Hamani, mosinto bwa Hamedata Omoagagi, konya achiikire ng’a Abayahudi bonsi bare ase chingongo chionsi chi’obogambi bwao basirigwe.
Ⅵ Naki ndakore ndemererie ndore amabe ayio akobacheera abaminto? Gose naki ndakore ndemererie ndore abanto b’egesaku kiane bagosirigwa?”
Ⅶ Omorwoti Ahaswero agateebia Esiteri enting’ana na Modekai Omoyahudi, “Rora, naeire Esiteri enyomba ya Hamani, na Hamani otongirwe igoro ase orobambo roria, ekiagera arigetie goita Abayahudi.
Ⅷ Gaki inwe riika riruube ase Abayahudi, moribeeke erieta riane, inche omorwoti, moriike buna morarore, moribeeke ekemanyererio ki’ebonyi yane, ekiagera riruube rinde rionsi ririikire na kobeekwa erieta ri’omorwoti amo nekemanyererio ki’ebonyi yaye, onde tari orarionchore.”
Ⅸ Abariiki b’omorwoti bakarangerigwa agwo ase omotienyi o gatato, noro omotienyi o Siwani, rituko ri’emerongo ebere na gatato, na buna Modekai achiigete, amarube akarikwa gochia ase Abayahudi, na gochia ase abagaambi abanene b’oborwoti na abagabana, na abanene bonsi be chingongo chionsi korwa India goika Ethiopia, chingongo rigana erimo, na emerongo ebere, na isano na ibere (127). Amarube ayio akarikwa ase kera orogongo ase okoriikwa kw’engencho y’amariiko abo, na ase kera egesaku ase omonwa obo na ase Abayahudi ase enchera yabo y’okoriika ase omonwa obo.
Ⅹ Amang’ana ayio nigo arigetwe na kobekwa erieta ri’omorwoti Ahaswero, na akabekwa ekemanyererio ki’ebonyi yaye. Erio amarube ayio akairwa nabariini be chibarasi chi’omorwoti echio chiare kominyoka bwango.
Ⅺ Amarube ayio nigo arenge goteeba ng’a omorwoti orure ribaga ase Abayahudi ba kera omochie bache amo, erinde beegerere abanyene. Baegwe ribaga boigo goita abarwani bande bonsi ba kera egesaku baare gocha kobarwania, baite n’abana babo na abakungu babo; boigo basakore chinibo chiabo.
Ogochika gw’okogorora
Ⅻa Ayio akorete ase rituko erimo naro aya akobwatia:
Ⅻb Omorwoti omonene Ahaswero, ne rituko erio nigo rirabe eria ikomi na gatato ri’omotienyi o ikomi na kabere okorokwa Adari.
Ⅻc Abanto abange abwo baetwe amasikani goetera ase baria babatang’anerete nigo bakoba abaenenu. Teisaini ase bare korigia korwa ase abanto baito chingoma, korende tibakonyara gosira oborito bw’amamocho abo barobwo abanyene erio baonchoka bachaka koroberia mamincha ya baria bare igoro yabo.
Ⅻd Tibaisanegeti n’egesururo korwa ase enkoro ya mwanyabaanto, korende nigo bakogokigwa n’abanto abwo bagwakanwa ase amaya, batamanyeti ng’a onsi nigo are ase amaiso a Nyasae, nigo bakagerete ng’a mbetange korwa ase endamwamu yaye y’ogokumia gochia ase abanyabibe.
Ⅻe Yabeire bo ase baria bare n’okobua, nigo bakwegena abasani babo nagwancha kobwatia omonguso obo, nigo benyorire bagosanga nabarobwo ase egesusuro egetindi,
Ⅻf okorengereria okoronge kw’abarai kwamerirwe n’okorengeria okobe.
Ⅻg Aya nabo akororekana nonya nase ogotarigereria amang’ana a kare ayio twabarageire; nigo oganeirie korigereria aria are bosio bwao, obosaria obwo bogokorwa na barai abwo bataisaini.
Ⅻh Ase amatuko a bosio ntobeeke omokia korora ng’a omorembe n’obointongo mbire ase bonsi,
Ⅻi ase okobera emeroberio emiya na konacha kera ekiina kegocha ase tore ase omoika bw’obwororo.
Ⅻk Erio Hamani mosinto o Hamedata korwa Makedonia oyio otabwati manyinga ya. Abapasia akaba gakwegokia n’obuya bwaito,
Ⅻl tokagenderera komokorera buya buna togokorera abande korwa ase kera ense, goikera ekerengo ere akarokwa ‘tata oito’ nakoegwa amasikani amanene goika akaba oyokabere ase oborwoti.
Ⅻm Korende ere tanyara korenda ekerogo kiaye ekio aetwe, agachaaka koroberia gotoura intwe keria giatogwenerete nonya n’obogima bwaito.
Ⅻn Goetania igo ere agacha n’okoamereria okobe, goika intwe tokamachia goita Modekai omoboria oito na oyore okonyora gwaito, amo na Esiteri oyio otabwati komocha konde na omobwatania bw’omorwoti oito amo n’ense yabo.
Ⅻo Nigo arengereretie ng’a goika iga nigo aratotige intwe totabwati gokonya erio anganyie oborwoti bwa Pasia gochia Makedonia.
Ⅻp Korende intwe nigo twanyorire ng’a Abayahudi abwo babekire ensemo ase ogoitwa tibarenge buna bakageire, barobwo n’abanto bakogamberwa n’amachiiko.
Ⅻq Nigo bare abana ba Nyasae o igoro mono oyio ore moyo oyio intwe amo n’echisokoro chiaito toranyore okogenderera ime yaye.
Ⅻr Nigo orakore buya ase ogotakorera amang’ana ariikire ase riruube erio riatometwe na Hamani mosinto O Hamedata, ekiagera omoriki obo nigo asungire aria Susa amo n’abanto b’enyomba yaye bonsi: egesusuro ekio Nyasae Omonene bwense abaeire.
Ⅻs Beka amarube aya kera ase, anchera Abayahudi goikerania emeyega yabo ya botambe batari na bwoba, na obakonya korwa ase onde bwensi orababoere ase rituko riria riachoretwe ase ogoitwa kwabo, rituko ria ikomi na gatato omotienyi o ikomi na kabere oyio okorokwa Adar.
Ⅻt Ekiagera Nyasae bw’echinguru okorire rituko erio koba rituko ri’omogoko korende tari eri’obororo ase abachore.
Ⅻu Korende aye ase ensemo yao, gati y’emeyega gokera rituko eri buna rituko rinene ase ogochenga na kogoka, erio korwa bono nonya ngoika kare, ase aye amo na Abapasia abwo bare ab’omoyo omuya, nigo rirabe rituko ri’okoinyora ogotorigwa kwaino, na ase ababisa bao nditenene buna ekeinyorio ase ogosirigwa kwabo.
Ⅻv Kera omochie na kobua mono kenya ense, eyio etari kobwatia amachiiko aya nigo erasarigwe n’omorero n’omoro etari kororerwa mabera, erio ekorwe etari gosogwa nonde goika nonya n’eching’iti chi’orosana nonya n’echinyoti chiyiange.
ⅩⅢ Nigo ariikire ng’a ase kera orogongo ogochika okwo kw’omorwoti korarigwe maiso marore ase abanto bonsi ng’a, Abayahudi bebeeke ang’e ase rituko erio erio korusia egesiomba ase ababisa babo.
ⅩⅣ Ase ogochika okwo kw’omorwoti abatomwa bakariina chibarasi chi’omorwoti chiare kominyoka bwango. Ogochika koria gokararigwa boigo agwo Susa, omochie oria omonene bw’eburi.
ⅩⅤ Modekai akarua ase omorwoti, obegete chianga chi’oborwoti chire nekieni kere buru na ekerabu, obegete egutwa enene y’etaabu na egetambaa gi’okwambara ki’egatani engiya kere monyinga, na abanto b’omochie o Susa bagaaka eriogi, bagochenga.
ⅩⅥ Abayahudi bakaba noborabu na omogooko, amo nomochengo na ogosikwa.
ⅩⅦ Ase kera orogongo na omochie, aande onsi ogochika kw’omorwoti kwararetigwe, Abayahudi bakaba nomogooko na omochengo, bagakora omoyega na bakaba ne Rituko Rinene. Abanto abange b’ebisaku binde bagekora koba Abayahudi ase okwoboa Abayahudi.