ⅩⅨ
Ogoteera gw’okobokia amagombo
Ⅰ Aye tera ogoteera gw’okobokia amagombo igoro y’abagaambi b’Abaisraeli,
Ⅱ oteebe:
“Nyoko naki arenge? Nigo arenge endo eaberi!
Nigo arenge korara na koramama ase egati ye chindo,
akaba okorera abana baye ase egati ye chindo chire ne chinguru.
Ⅲ Endo eria eaberi egakiinia emanwa yaye eyemo,
ero ekaba endo ere ne chinguru,
ekeorokereria gotwara,
ekaba ekoria abanto.
Ⅳ Abanto b’ebisaku bakaigwa chinkuma chiaye;
bakayeremera eirima, ero ekagwa imeo,
bakayegobania nekegobanio, bakayeira Misiri.
Ⅴ Ekero eng’ina yaganyete, na ogosemeria kwaye gokaera,
ekaimokia emanwa yaye ende,
ekayetuga ekaba endo ere nechinguru.
Ⅵ Ero ekaba kegotaara ase egati ye chindo,
ee, ekaba endo ere ne chinguru,
ekeorokereria gotwara,
nero ekaba ekoria abanto.
Ⅶ Egatagora chiburi chiabo chinkong’u,
egasiria emechie yabo ekaba bosa.
Ekero endo eyio yarenge koruma,
ense yonsi ekaba kegoichana amo n’abanto bonsi bamenyeteo.
Ⅷ Erio abanto b’ebisaku bakarua ase chinsemo chiabo,
bakeroberia ase okoyerwania,
bakayebekera ekeonga,
ero ekagwa ase eirima yabo ime.
Ⅸ Bakayegobania nekegobanio, bakayebeka ase egesaisero,
bakayeira ase omorwoti o Babiloni.
Aroro agwo bakayesiekera ase eburi enkong’u,
ng’a eriogi riaye tiribaisa koigweka ase ebitunwa bi’Abaisraeli.
Ⅹ “Nyoko nigo arenge buna omosabibu ase egati y’emesabibu,
osimekire ase amaache mbarabare,
Okaba okwama mono na okaba ne chinsagia chinyinge,
ekiagera osimegetwe ase amaache amaange are.
Ⅺ Omosabibu oyio ogakiinia chinsagia chinkong’u,
chiaisanete gokorwa chinyimbo chi’abagaambi.
Ritina riaye rigatambea gochia igoro
ase egati ye chinsagia chiaye chinyinge mono.
Omote oyio okarorekana gochia aare ore ritutu rinene.
Ⅻ Korende omosabibu oria ogasimorwa ase engencho y’endamwamu,
ogatugutwa inse;
omwaga okagusa korwa moocha, okayuomia;
amasabibu aye akang’urorwa korwao,
ritina riaye rikong’u rikoma,
rigasambwa n’omorero rikaera.
ⅩⅢ Bono omote oyio osimekirwe ase erooro,
ense enyomo etari namaache.
ⅩⅣ Omorero okarua ase chinsagia chiaye,
okagenderera gosamba amasabibu aye,
totigaretie orosagia rwaisanete koba enyimbo y’omogaambi.
“Oko nakwo ogoteera gw’okobokia amagombo koragenderere goterwa ase okobokia amagombo.”