ⅩⅩⅦ
Ogoteera gw’okoreera omochie o Turo
Ⅰ Ring’ana ri’Omonene rigaacha asende, riganteebia:
Ⅱ Aye Mwanyabaanto, tera ogoteera gw’okoreera omochie o Turo.
Ⅲ Otebie Turo oyio ore ase egesoero ki’enyancha, naende ogokora oboonchoreria nabaanto abange bamenyete ase chinse chire ang’e nenyancha: Aya naro Omonene agoteeba:
Aye Turo, nigo ogokwana ng’a nigo ore omoseera omoikeranu.
Ⅳ Chimbebe chiao nigo chigete enyancha gati;
abaagachi bao nabwo bagokorete okaba omoseera omoikeranu.
Ⅴ Chibao chiao chionsi
nigo chiaroisetigwe korwa ase emete ekorokwa emebunduki ya Seniri,
abanto bakarenta emecharake korwa Lebanoni, bagakoroiseria omoenga.
Ⅵ Bakaroisia emegango korwa ase emete ye emearuni ya Basani.
Bakaroisia risang’ina ria’o korwa ase chibao chi’emete emiya
barusetie ase engegu ya Kuporo,
chiachabeire amaino ye chinchogu.
Ⅶ Egetambaa ki’ebieni ao ao kwabegete ase omoenga,
nigo kiaroisetigwe korwa ase egatani engiya ya Misiri;
ekio nigo kiarenge ekemanyererio kiao.
Egietubo kiao ki’ogokenderera kere buru na ekemonyinga,
nigo kiarusetigwe korwa ase ebisinka bi’Elisha.
Ⅷ Abanto ba Sidoni na ab’Ariwadi nabwo barenge bagosukia amaato ao nemegango.
Aye Turo, abanto abang’aini nigo bamenyete ime yao,
barabwo nigo barenge abagendia be chimeeri chiao.
Ⅸ Abagaaka amo nabaanto abang’aini ba Gebali nigo bamenyete ime yao;
abwo nabwo barenge goticha aase ao aatandogete.
Chimeeri chionsi chi’enyancha nigo chiarenge gocha ase ore,
na abanto barenge imeo bakaba bakoonchorerania ebinto naye.
Ⅹ Abarwani esegi b’Ayemi, na Ludi na Puti, nigo barenge abarwani bao b’esegi. Nigo basungete chinguba chiabo na ebigogwa biabo bi’ebioma ase chinyasi chiao. Barabwo nigo bakorenterete obonene.
Ⅺ Abarwani esegi b’Ariwadi, amo nabarwani bao b’esegi, bakarenda chindwaki chiao ase chinsemo chionsi, na abanto ba Gamadi nabwo bateneine ase emerobiri yao y’ogotengerera. Barabwo bagasunga chinguba chiabo ase chinyasi chiao chinsemo chionsi; boigo bagakora oboseera bwao bokaba oboikeranu.
Ⅻ Abatarisisi bagaacha ase ore bagakora oboonchoreria naye, okanyora korwa ase bare chifeta, na ebioma ao ao, na amabati; naye okabaooneria ebinto ao ao, ekiagera kwabwate obotenenku obonge.
ⅩⅢ Naende ogakora oboonchoreria nense ya Giriki, na eya Tubali, na eya Meseki. Chinse echio chigakooneria abanto, ne ebinto bie chitai, na aye okabaooneria ebinto biao.
ⅩⅣ Abanto ba Togarima bagakooneria chibarasi chi’emeremo na echi’eseegi, ne chibarasi, naye okabaooneria ebinto biao.
ⅩⅤ Abanto ba Dedani bagakora oboonchoreria naye; boigo abe chinse chinyinge chiarenge ang’e nenyancha bakaba bagokora oboonchoreria naye, bakagoakana amaino ye chinchogu ne chibao chi’emete ekorokwa eboni.
ⅩⅥ Abasiiria bagakora oboonchoreria naye, ekiagera kwabwate ebinto ebinge bi’obotenenku; bagakorentera amagena ye rigori rinene akorokwa alimasi, na erangi emonyinga, na ebitambaa bi’ebieni ao ao, na egatani engiya, na amakorongote, na amagena akorokwa agati, bakagora ebinto biao.
ⅩⅦ Abanto ba Yuda na ab’ense y’Abaisraeli bagakora oboonchoreria naye; bagakorentera engano ekorwa Miniti, na amazeituni, na obooke, na amaguta y’amazeituni, na amaguta akogwenia.
ⅩⅧ Ekiagera aye nigo kwabwate obotenenku bwa kera egento, na ebinto ebinge kwaroisetie, abanto ba Damesiki bagakora oboonchoreria naye, bagakorentera edivai ya Heliboni, na amarionya amarabu ye ching’ondi.
ⅩⅨ Boigo abanto ba Wedani na aba Yavani bagakorentera ebioma bikomeka‐meka, na ebinsari bia kasia na ebia kalamusi.
ⅩⅩ Abanto ba Dedani bagakora oboonchoreria naye, bagakorentera ebitambaa bi’ebiikaransero bikobekwa ase chibarasi.
ⅩⅪ Abanto b’Arabia na abagaambi bonsi ba Kedari, bagancha gokorentera chimanwa chi’eching’ondi, ne chimingichi, ne chimbori, ase okoonchorerania naye.
ⅩⅫ Abaonchoreria ba Seba na aba Raama bagakorentera ebinsari ao ao ebiya mono, na amagena ye rigori rinene, ne chitaabu, naye okabaooneria ebinto biao ebiya kwabwate.
ⅩⅩⅢ Abanto ba Harani, na aba Kane, na aba Edeni, nabwo abaonchoreria ba Seba, na ab’Asuri, na aba Kilimadi, bagakora oboonchoreria naye.
ⅩⅩⅣ Abwo bagakorentera chianga chingiya mono, na ebitambaa bire buru na ebiroisirie ebieni ao ao, na emegeke y’ebieni ao ao, ne chingori chinkong’u.
ⅩⅩⅤ Chimeeri chia Tarisisi chikabogoria ebinto bi’oboonchoreria bwao.
Bono ogaisaneka ogaichorwa n’ebinto ebinge
agwo ase kwarenge ase egati y’enyancha.
ⅩⅩⅥ Abanto barenge gosukia amaato ao n’emegango,
bagakoira aase amaache amaange are.
Omwaga okorwa moocha okagusa ogakobunerao,
agwo ase egati y’enyancha.
ⅩⅩⅦ Obotenenku bwao, na ebinto biao bionsi na oboonchoreria bwao,
na abanto bao be chimeeri, na abagendia bao ba chirochio,
na abwo barenge aase ao atandogete,
na abarwani bao bonsi b’esegi abare ime yao,
na omoganda oo bwonsi ore ime yao,
bonsi nigo bararimere ime y’enyancha amo n’ebinto bionsi,
ase rituko ri’ogosirigwa kwao.
ⅩⅩⅧ Eriogi ri’okorera kw’abagendia chimeeri chiao,
nditengechie ense eyio egoetanaine.
ⅩⅩⅨ “Abanto bonsi abagoata amaache n’emegango
mbatige chimeeri chiabo;
abagokora emeremo ase chimeeri amo nabagendia,
mbagende ase engegu, bateneneo.
ⅩⅩⅩ Abwo mbakoreere aye namariogi amanene,
bare nobororo obonge,
mbasiarere ebuse ase emetwe yabo,
begara‐garie ase ribu igoro.
ⅩⅩⅪ Mbakigite chitukia chiabo ase engencho yao,
na beboyie chigunia;
nigo barabe bagokoreera nobororo bwe chinkoro chiabo,
babokie amagombo bare nobororo.
ⅩⅩⅫ Ekero barabe bagokoreera, mbabokie amagombo ase engencho yao,
babe bagoteeba:
Mochie ki onga buna Turo,
oyo okiriigwe bono agwo ase egati y’enyancha?
ⅩⅩⅩⅢ Ekero ebinto biao bi’oboonchoreria biaruete ase chinyancha,
nigo gwaisanegetie abanto abange;
obotenenku bwao obonge, na oboonchoreria bwao,
nigo bwatenengetie abarwoti b’ense.
ⅩⅩⅩⅣ Bono kwabunirwe na gosirigwa
ime ase chindiba chi’enyancha;
ebinto biao bi’oboonchoreria na abakoreri bao bonsi
barimeire amo naye.
ⅩⅩⅩⅤ “Abanto bonsi bamenyete ase ebisinka na ase chinse chire ang’e nenyancha baichanire ase engencho yao, na abarwoti bao bonsi baondokire mono, na obwoba nigo bwarorekanire ase amasio abo.
ⅩⅩⅩⅥ Abaonchoreria bare ase egati y’ abanto, nigo bagokumirie na kobugia emeroria. Aye gwaikeire ogosirigwa gw’okoondokia, tokobao naende nonya ng’ake.”