ⅩⅩⅩⅤ
Nyasae okoa Abaedomu egesusuro
Ⅰ Ring’ana ri’Omonene rigaacha asende, riganteebia:
Ⅱ “Aye Mwanyabaanto, rigereria gochia ase Egetunwa gia Edomu, obaane mamincha yaye,
Ⅲ ogeteebie ng’a aya naro Omonene agoteeba:
“Aye Egetunwa gia Edomu, inche nigo inde mamincha yao,
nindambore okoboko kwane igoro yao, ngosarie obe bosa.
Ⅳ Nintagore emechie yao ebe amaturi, na ebe ense esaregete kegima ere bosa;
erio nario oramanye ng’a inche ninche Omonene.
Ⅴ “Nigo kwagendererete koba nobobisa ime ase enkoro yao igoro y’Abaisraeli, okabarua bagaitwa nemioro ase engaki y’emechando yabo, ekero baikerete engaki y’egesusuro ki’ebibe biabo.
Ⅵ Ase ayio, Omonene Nyasae agoteeba iga: Ekeene, buna inche inde moyo, ningotige amanyinga ao aiteke, na ogoiteka okwo kw’amanyinga ao ngokobwatie: aye togecheti ogoiteka kw’amanyinga, ase ayio, ogoiteka kw’amanyinga ao ngokobwatie.
Ⅶ Ase enchera eye ninsarie kegima Egetunwa gia Edomu kebe bosa tikemenywa naende, ng’ite kera omonto oyogosoa aroro, na oyogosoka korwao.
Ⅷ Ning’ichorie ebitunwa biao nabaanto baraitwe nemioro; ee, abwo baraitwe nemioro mbagwe ase ebigoro biao, na ase amakura ao, na ase chindooche chiao.
Ⅸ Ninkoonchore ogenderere koba bosa botambe, na emechie yao tekomenywa naende. Erio nario moramanye ng’a ninche Omonene.
Ⅹ “Aye nigo gwateebete: Ebisaku ebi bibere mbibe ebiane, ne chinse echio ibere chibe echiane, na intwe tochigambere, nony’Omonene omenyeteo.
Ⅺ Ase ayio, inche Omonene Nyasae nigo ngoteeba iga: Ekeene, buna inche inde moyo, ningokorere koreng’ana nendamwamu yao, ne ribero ria’o, erio kwaorogetie, ekiagera ogechete Abaisraeli. Ekero ndakonachere ekiina, nimanyekane ase egati yabo.
Ⅻ Erio nario oramanye ng’a inche ninche Omonene. Inche naigure amang’ana ao y’okorama gwakwanire mamincha y’ebitunwa bi’Abaisraeli, kogoteeba: Biasarigwe biabeire bosa, biabekirwe ase amaboko aito tobirie.
ⅩⅢ Ekeene, naigure amang’ana aino amaange ay’ogwetogia mwakwanire mamincha y’ane.
ⅩⅣ “Aya nar’Omonene agoteeba: Ense yonsi negoke ekero ndagosarie obe bosa.
ⅩⅤ Ekiagera kwagokerete ogosarigwa kw’omwando bw’Abaisraeli, ningosarie aye obe bosa. Ee, ningosarie aye egetunwa gia Edomu obe bosa, aye Edomu engima. Erio nario abanto baramanye ng’a inche ninche Omonene.