ⅩⅩⅩⅧ
Gogi okoba egekorero kia Nyasae
Ⅰ Ring’ana ri’Omonene rigaacha asende, riganteebia:
Ⅱ “Aye Mwanyabaanto, onchoka origererie Gogi bw’ense ya Magogi, oyore omogambi bw’ense ya Rosi, na eya Meseki, na eya Tubali, obaane mamincha yaye,
Ⅲ omoteebie ng’a aya naro Omonene agoteeba: Aye Gogi, omogambi omonene bw’ense ya Rosi, na eya Meseki, na eya Tubali, inche nigo inde mamincha yao.
Ⅳ Ninkoonchore gochia magega, ning’agie ebigobanio ase chintakunero chiao erinde nkorente aye amo n’abarwani bao bonsi b’esegi, ne chibarasi, na abariini be chibarasi, bonsi ababogoretie ebirwanero bi’eseegi; omoganda oyio omonene nigo or’abe obogoretie ching’aya, ne chinguba, na emioro.
Ⅴ Abarwani b’Ayemi, na aba Ethiopia, na aba Libia, mbabe amo nabarabwo; bonsi mbabe babogoretie chinguba na ebigogwa b’ebioma.
Ⅵ Gomeri amo n’omoganda oye bwonsi bw’eseegi, na egesaku gia Togarima kemenyete aare, ensemo ya sugusu, amo nemeganda yaye yonsi, ee, abanto abange mbache amo naye.
Ⅶ Eariganie, bwebeke ang’e, aye amo n’omoganda oyio osangererekanire ase ore. Aye obe omoraai obo.
Ⅷ Nyuma y’amatuko amaange n’oche korootwa naende. Ase emiaka egochia‐gocha nogende ase ense eria yarenge nesegi, korende bono nigo ere n’obotoereru, ense eria ase abanto basangereretigwe korwa ase ebisaku ebinge, agwo ase ebitunwa bi’Abaisraeli biarenge bigendererete koba bosa botambe. Abanto bonsi b’aroro nigo barentetwe korwa ase ebisaku ao ao, na bono nao bamenyete bare n’omorembe.
Ⅸ Aye notiire, obachiere buna ekembugu‐mbugu, obe buna riire otube ense, aye na emeganda yao yonsi, na abanto abange bare amo naye.
Ⅹ “Aya naro Omonene agoteeba: Ase engaki eyio aye nigo orabe n’emeroberio ase ebirengererio biao, oraroberie gokora ayare amabe.
Ⅺ Aye nigo oratebe iga: Ngochiera inde ense ere nemechie etagiteiri chindwaki; ning’umokere abanto abwo begaarete bare n’obotoereru; bonsi nigo bamenyeteo bategitereti chindwaki, tibabwati ebiita gose emekorogoto egosieka.
Ⅻ Norengererie gochia gosakora na kwenyorera ebinto ase okorambora okoboko kwao gochia ase arenge bosa na bono amenyirwe nabaanto. Ee, norambore okoboko kwao gochia ase abanto basangereretigwe korwa ase ebisaku ao ao, na bono mbabwate chitugo na ebinto ebinge, agwo ase bamenyete egati‐gati y’ense.
ⅩⅢ Erio abanto ba Seba, na aba Dedani, na abaonchoreria ba Tarisisi, amo nabatang’ani babo bonsi banga chindo chinsae mbakoborie: Nigo gwachire gwosa na gosakora? Inee! Nigo gwasangereirie emeganda yao gocha koira ebisakorwa, buna chitaabu, ne chifeta, ne chitugo, na ebinto, erinde oire ebisakorwa ebinge?
ⅩⅣ “Ase ayio, aye Mwanyabaanto, bana oteebie Gogi ng’a aya naro Omonene agoteeba: Ase engaki eyio Abaisraeli, abanto bane, mbabe bamenyete ase obotoereru, nario oramanye amang’ana ayio.
ⅩⅤ Erio noche korwa aase ao, agwo sugusu y’aare; nigo orache amo nabaanto abange, bonsi bariinete chibarasi, bare omoganda omonene ore nabarwani b’esegi abange.
ⅩⅥ Aye Gogi, nochiche korwania Abaisraeli, abanto bane. Noche buna riire otube ense eyio. Ase amatuko agochia-gocha ninkorente orwanie ense yane, erinde abanto b’ebisaku bamanye inche, ekero ndeorokie ase amaiso abo ng’a inche inde omochenu ase egati yaino.
ⅩⅦ Aya naro Omonene agoteeba: Aye naye omonto oria nakwanete igoro yao ase chingaki chia kare goetera ase abasomba bane ababani b’Abaisraeli; barabwo bakaba bakobana emiaka ase emiaka ng’a ninkorente orwanie Abaisraeli.
Nyasae okoa Gogi egesusuro
ⅩⅧ “Korende ase rituko erio Gogi arache korwania ense y’Abaisraeli, endamwamu y’ane entindi inayoke buna omorero. Nabo Omonene ateebire.
ⅩⅨ Nakwanire inde nerisemi na ekeririanda kenga omorero ng’a ekeene ase rituko erio omotengecho omonene n’obe ase ense y’Abaisraeli.
ⅩⅩ Erio chinswe chire nyancha, ne chinyoni chia igoro, ne ching’iti chire ase ense, na chionsi echikwagura ase riroba, nchitengechigwe ase obosio bwane, amo nabaanto bare ase ense. Ebitunwa mbitegoke bigwe inse amo nebitare, na kera oboagacho mbogwe inse.
ⅩⅪ Omonene nigo agoteeba iga: Nindete omoro orwanie Gogi agwo ase ebitunwa biane bionsi, erio kera omonto aite oyomwabo n’omoro.
ⅩⅫ Nimonachere ekiina goetera ase oborwaire bogoita, na ogoiteka kw’amanyinga; nindete igoro yaye, na igoro y’emeganda yaye y’eseegi, na abanto abange bare amo nere, embura ere nomoubera, na amagena are nomorero mbibaite.
ⅩⅩⅢ Ninyeorokie ng’a inche n’omonene na omochenu; ninyemanyekanie ase amasio y’ebisaku ebinge. Erio abanto ’mbamanye ng’a inche ninche Omonene.