Ⅴ
Ⅰ Ase ayio, mobe abegi ba Nyasae, buna abana abanchwa;
Ⅱ mogeende ase obwanchani, buna Kristo atwanchete intwe, naende akerua ere omonyene ase engencho yaito, akaba esadaka na ekeng’wanso, bire ogotioka okuya ase Nyasae.
Ⅲ Korende, buna egwenerete abachenu, obotomani na eubi yonsi, gose obwegimeria, tibiatorwa ase egati yaino nonya ng’ake.
Ⅳ Motige kegima amang’ana amabe, gose ay’oboriri, gose obosekereria, aya’atagwenereti; korende mbuya kobua koiraneria ng’a mbuya mono.
Ⅴ Inaki ring’ana eri mwarimanyire kegima, ng’a omotomani, gose oyo otachenegeti, gose omonto omwegimeria (engencho yaye omosasiimi emegwekano) takonyora omwando ase oborwoti bwa Kristo na Nyasae.
Taara buna abana b’omobaso
Ⅵ Monto onde tabang’aina ase amang’ana atari nengeencho, ekiagera ase aya endamwamu ya Nyasae nigo ekobaachera abanto b’ogotaigwera.
Ⅶ Ase ayio, timosaanga nabarabwo.
Ⅷ Inaki kare nigo mwareenge omosunte, korende bono mwabeire omobaso ase Omonene. Mogeenderere buna abana b’omobaso
Ⅸ (inaki okwama kw’omobaso nigo gokonyorekana ase obuya bwonsi, na ase oboronge, na ase ekeene).
Ⅹ Teema mono komanya ekeragwenere Omonene.
Ⅺ Timosaanga n’ogokora kw’omosuunte ogotakwama, korende ribaga ri’ayio mokoorokie,
Ⅻ ekiagera nobosooku nonya nogokwana amang’ana ayio agokorwa nabarabwo bobisi.
ⅩⅢ Korende onsi ayaorokigwe nomobaso nigo are maiso marore, ekiagera kera egento ekere maiso marore nigo kere omobaso.
ⅩⅣ Ase ayio oteebire,
“Booka aye osundogete,
booka korwa ase abakuure,
na Kristo nakobarerie.”
ⅩⅤ Ase ayio, rigereria mono buna mogotaara, tari buna abanto batari n’obong’aini, korende buna abare n’obong’aini.
ⅩⅥ Renda engaki yaino, ekiagera amatuko aya namabe.
ⅩⅦ Ase engencho eyio, timoba abariri, korende mobe abanto bakomanya buna ogwancha kw’Omonene kore.
ⅩⅧ Naende timotinda ase edivai, ekiagera ase eyio inamoirwe ase obonyaka, korende moichorwe n’Omoika.
ⅩⅨ Motebereranie ase chizaburi, na amateera, ne chingero chi’omoika; moteere na kobugia amariogi ase Omonene ase chinkoro chiaino,
ⅩⅩ mokomoakera Nyasae Tata ng’a mbuya mono amatuko onsi, ase amang’ana onsi, ase erieta ri’Omonene oito Yeso Kristo.
ⅩⅪ Mosikane inwe ase inwe ase okomoiroka Kristo.
Abakungu na abasacha
(Abakol 3:18—4:1)
ⅩⅫ Inwe abakungu, moigwere abasacha baino buna mokoigwera Omonene.
ⅩⅩⅢ Inaki omosacha nomotwe bw’omokuungu, buna Kristo are omotwe bw’ekanisa; ere omonyene n’Omotooria bw’omobere oye, engencho yaye ekanisa.
ⅩⅩⅣ Korende buna ekanisa eigwerete Kristo, naboigo nabakungu baigwere abasacha babo ase kera ring’ana.
ⅩⅩⅤ Na inwe abasacha, mwanche abakungu baino, buna Kristo anchete ekanisa, naende akerua omonyene ase engencho y’ero,
ⅩⅩⅥ erio anyare koyechena ase okoyesibia ase amaache na ase ring’ana,
ⅩⅩⅦ erinde anyare kwenyorera ekanisa y’obonene, etari na kemoa gose omonia, gose rinde rionsi buna aya, korende ebe enchenu etari na kemoa.
ⅩⅩⅧ Naboigo egwenerete abasacha banche abakungu babo buna emebere yabo abanyene. Oyobwanchete mok’aye bweanchire ere omonyene.
ⅩⅩⅨ Inaki omonto taiyo ogeechete omobere oye omonyene, korende nigo akoyorageria na koyorenda, buna Kristo akorageria ekanisa,
ⅩⅩⅩ ekiagera nigo tore ebiimo bi’omobere oye.
ⅩⅩⅪ Nigo eriikire, “Ase engencho eyio, omonto natige ise na ng’ina abwatane na mok’aye, na abwo babere inababe omobere oyoomo.”
ⅩⅩⅫ Obo nobobisi obonene; korende ngokwana nde amang’ana a Kristo na ekanisa.
ⅩⅩⅩⅢ Korende kera omonto anche mok’aye buna eanchete ere omonyene; na omokungu tamocha gosika omosacha oye.