OKONG’ANYA
Ogochaakera
Erieta Okong’anya engencho yaye “nogotigana” na nigo kegotoorokia egekorwa ki’engencho mono ase omogano bw’Abaisraeli oyio okoerwa buya mono ase egetabu eke—Okong’anya kw’abanto ba Israeli korwa Misiri agwo ase baosetwe. Egetabu eke nigo kebagekanete chinsemo inye chinene: (1) Ogosiborwa kw’abaiberania korwa obosomba; (2) orogendo rwabo goika ase egetunwa gia Sinai; (3) Okobwatana kwa Nyasae n’abanto baye aria Sinai, okwo kwabaete amachiiko y’okomenya, ay’ense, boigo naria y’edini; (4) okoagacha nagochabera egesasiimero ase Abaisraeli, boigo n’amachiiko igoro y’obokuani nogosasiima Nyasae.
Goetania onsi, egetabu eke nigo kegokwanera igoro ya keria Nyasae akorete, buna asiborete abanto baye abwo babekire obosomba akabakora egesaku ekenene kere n’ogosemeria ase amatuko agochia gocha.
Omonto ore ekerenga ekenene ase egetabu eke Moses oyio Nyasae achorete koraa abanto baye korwa Misiri. Ensemo emanyekanete mono ase egetabu eke neria y’amachiiko ikomi (20:1-17).
Okobagwa kw’egetabu eke:
Abaisraeli bagosiborwa korwa Misiri 1:1—15:21
a. Obosomba agwo Misiri 1:1-22
b. Okoiborwa kwa Musa na obosae bwaye 2:1—4:31
c. Musa na Aroni bagochiera omorwoti o Misiri 5:1—11:10
d. Epasaka na okong’anya korwa Misiri 12:1—15:21
Korwa Enyancha Embariri goika Egetunwa gia Sinai 15:22—18:27
Amachiiko na Okobwatana kw’Ogotianania 19:1—24:18
Eema y’Okobwatana na ogotebereria kw’ogosasiima 25:1—40:38
Ⅰ
Abaisraeli bagokorerwa bobe ase ense ya Misiri
Ⅰ Aya naro amarieta y’abamura ba Israeli abasoete Misiri amo na Yakobo ise, kera oyomo amo nabaanto b’enyomba yaye:
Ⅱ Rubeni, Simioni, Lawi na Yuda;
Ⅲ Isakaru na Sabuloni, na Benjamini;
Ⅳ Dani na Nafutali, Gadi na Aseri.
Ⅴ Abanto bonsi abaiboire korwa ase Yakobo nigo barenge emerongo etano na ebere. Yusufu momura o Yakobo ere konya nao amenyete Misiri korwa kare.
Ⅵ Korende Yusufu, na bamura bamwabo bonsi, na abanto bonsi b’ekegori keria bagakwera Misiri.
Ⅶ Abaisraeli bakaba abegenwa ase Nyasae erio bagasarara na komenteka, bagatwara chinguru chinene, bakaba abange na obonge bwabo bokabucha kegima ase ense eria.
Ⅷ Erio Omorwoti omoyia, oyotamomanyete Yusufu, akaira obogambi bw’ense ya Misiri.
Ⅸ Ere agateebia abanto baye, “Rigereria, Abaisraeli aba babeire abange gotobua, naende babeire ne chinguru gotobua,
Ⅹ goika torigie chisemi tobatenenie, tibagenderera komenteka, ekiagera toise gochaka esegi, barabwo nigo barabwatane nababisa baito batorwanie, erio bang’anye korwa ense yaito.”
Ⅺ Ase ayio Abamisiri bakabeeka abateneneri abatindi igoro ase Abaisraeli barenge erio baabachande nemeremo emekong’u mono yobosomba. Agwo Abaisraeli bakaagachera Farao emechie y’okogaacha chinibo, nero Pitoni na Ramesesi.
Ⅻ Korende buna Abamisiri bagendererete kobachanda mono, naboigo Abaisraeli bagendererete komenteka na gwesiarera, goika Abamisiri bakabairoka mono.
ⅩⅢ Erio Abamisiri bakaba abatindi ase Abaisraeli na kobabetereria gokora emeremo emekong’u
ⅩⅣ bagakora obogima bwabo bokaba obokong’u ase okobakoria emeremo y’ogotiringa esike na koroisia amatabori, na emeremo ende ao ao ase emegondo. Ase emeremo ende yonsi Abaisraeli baare gokora nigo baare gokorigwa ase obotindi.
ⅩⅤ Omorwoti o Misiri agachiika Sifura na Pua, abaiboria b’Abaiberania, akabateebia,
ⅩⅥ “Ekero mokorigereria abakungu b’Abaiberania kobakoibora, morigererie mwana ki oiborwa; onye nomoisia, momoite, korende karabe omoiseke, momotige abe moyo.”
ⅩⅦ Korende abaiboria baria nigo bamoirogete Nyasae, tibakorete buna omorwoti o Misiri abateebeetie, korende barabwo bagatiga abana abamura bakaba moyo.
ⅩⅧ Erio Omorwoti o Misiri akarangeria abaiboria baria, akababoria, “Nase ki mwakorire iga Mwatigire abana abaisia bakoiborwa bare moyo.”?
ⅩⅨ Abaiboria baria bakairaneria Farao, “Abakungu b’Abaiberania tibari buna aba Abamisiri; barabwo nabaango ase okoibora, nigo bakoibora ritang’ani omoiboria ataraika.”
ⅩⅩ Nyasae agakorera abaiboria baria amaya, na Abaisraeli bakagenderera komenteka na koba ne chinguru mono.
ⅩⅪ Na ekiagera abakungu baria abaiboria bamoirogete Nyasae, ere akabasesenia, na barabwo bakenyorera chinyomba chiabo.
ⅩⅫ Erio Farao agachiika abanto baye bonsi, akabateebia, “Kera omwana omoisia oraiborwe ase Abaiberania, momotugute ase orooche rwa Naeli, korende kera omwana omoiseke momotige abe moyo.”