ⅩⅤ
Ogoteera kwa Musa
Ⅰ Erio Musa na Abaisraeli bakamoterera Omonene ogoteera oko, bagoteeba:
Nimoterere Omonene, ekiagera ere obuire ase okobua okonene;
chibarasi amo nabachiriinete obarimeirie ase enyancha ime.
Ⅱ Omonene nere chinguru chiane, nimoterere ere, ere nogotooreka kwane.
Ere Nyasae one, nimotogie; ere Nyasae o tata, ninterere obonene bwaye.
Ⅲ Omonene nomorwani bwe chiseegi, Omonene nario erieta riaye.
Ⅳ Orutire chigari chia Farao amo nomoganda oye ase enyancha ime;
abarwani baye abachore obarimeirie ase enyancha embariri.
Ⅴ Amache abatubire, barimeire chindiba ime buna rigena rikorutwa.
Ⅵ Omonene, okoboko kwao gw’okorio nkore nokobua okonene,
Omonene, okoboko kwao gw’okorio ngosenyente ababisa.
Ⅶ Ase okobua kwao okonene nigo okobaiyeria inse abagokoimokera;
endamwamu yao ekobera, nigo ekobasamba buna chimboba chinyomo.
Ⅷ Ase omoika korwa ase chimioro chiao amaache akaimoka,
agatenena buna orwaki,
enyancha egakamoka goika inse kegima.
Ⅸ Omobisa agateeba, “Nimbabwatie, mbaikeere,
mbiatanane ebi ndasakore, omoyo one oisaneke;
ninsomore omoyio one o birende, nimbasirie nokoboko kwane.”
Ⅹ Naboigo ekero aye kwagusete buna omwaga, amaache akabamera;
bakamerwa buna embunde ekorimera ase amaache amange ime, yarika inse.
Ⅺ Omonene, ning’o onga buna aye ase egati ye chinyasae?
Ning’o onga buna aye ore nobonene na obochenu?
Naye ogwenerete koirokwa na gotogigwa, aye naye oyogokora amakumia.
Ⅻ Ekero kwaramborete okoboko kwao gw’okorio, ense ekabamera.
ⅩⅢ Ase chiira chiao chi’obwanchani chiria kwabarierete okaraa abanto aba kwabooretie,
ase chinguru chiao okabaikia ase obomenyo bwao obochenu.
ⅩⅣ Abanto b’ebisaku bakayaigwa, bagatengechigwa ase omoondoko,
omoichano na obororo bikabwata abamenyete Bofilisti.
ⅩⅤ Abagaambi b’Edomu bakaondoka, abanto abanene ba Moabu bakabwatwa nomotengecho,
na abanto bonsi ba Kaanani bakerusia moyo.
ⅩⅥ Omoondoko na obwoba bikababwata;
ase engencho y’okobua gw’okoboko kwao bagatenena,
bagakira‐kiri buna amagena,
goika abanto bao baetire, ee, Omonene,
goika abanto bao kwabooretie baetire.
ⅩⅦ Nobasoyie na kobabeeka ase egetunwa kiao aye omonyene,
aase aria kweroiseretie, aye Omonene,
obomenyo obochenu kwaagachete namaboko ao.
ⅩⅧ Omonene nagaambe kare na kare.
ⅩⅨ Ekero chibarasi chia Farao, amo ne chigari na abariini basoete nyancha ime, Omonene akairania amaache igoro yabo, akabatuba; korende Abaisraeli bagaeta egati y’enyancha ase ense enkamoku.
Ogoteera kwa Miriamu
ⅩⅩ Na Miriamu omobani, omoiseke omwabo Aroni, akaimokia ekebangarara kiaye, na abakungu bonsi bakamobwatia bakobugia ebibangarara biabo na goteenga.
ⅩⅪ Miriamu akabaterera ogoteera kogoteeba,
“Moterere Omonene, ekiagera ere obuire ase okobua okonene,
chibarasi amo nabachiriinete obarimeirie ase enyancha ime.”
Chinsoko chire namaache amaroro
ⅩⅫ Erio Musa agatang’ana Abaisraeli kogenda orogendo korwa ase Enyancha Embariri gochia erooro ya Suri. Bagataara ase engaki y’amatuko atato ase erooro, na tibanyora maache.
ⅩⅩⅢ Erio bagaika aase are korokwa Mara, tibanyara konywa amaache arengeo, ekiagera arenge amaroro mono. Nakio kiagerete aase aria akarokwa Mara.
ⅩⅩⅣ Agwo abanto bakemurunganeria Musa, bakamobooria, “Ninki tokonywa?”
ⅩⅩⅤ Musa akarera ase Omonene, n’Omonene akamworokia ekeng’ese kio omote. Omote oyio Musa akayoruta amaache ime, na amaache aria akaba amaansu.
Agw’Omonene akabeekera abanto amaachiko akobaraa, na agwo akaba okobateema.
ⅩⅩⅥ Akabora, “Oise koigwera aya inche Omonene oo ngokwana, na koyakora ayare boronge ase amaiso aane, na gotegerera amaachiko aane, na kobwata emeroberio yane yonsi, rirorio inche tingokobekera amarwaire ande onsi buna aria nabeekerete Abamisiri; naki ninche Omonene oo, oyogokogwenia.”
ⅩⅩⅦ Erio abanto bagaika Elimu; agwo chinsoko nchiarengeo ikomi na ibere, na emekendo emerongo etan’abere (70). Bagatoora agwo ang’e namaache.