ⅩⅩⅤ
Ebiegwa bi’Obomenyo Obochenu Omonene
(Okong’ 35:4-9)
Ⅰ Omonene agakwana na Musa, akamoteebia,
Ⅱ “Bateebie Abaisraeli ng’a bandetere ebiegwa; aye obisangererie korwa ase kera omonto oyoranche kobirua ase ’nde.
Ⅲ Na ebiegwa orasangererie korwa ase bare nabio ebi: chitaabu, ne chifeta, ne chitaai;
Ⅳ chiusi chi’amarionya chire buru, ne chimonyinga, ne chimbariri; egatani engiya na amanya e chimbori;
Ⅴ amasankwa e chimingichi aakire etaago, na amasankwa amaterere e ching’iti chia rooche, ne chibao chi’emekonge;
Ⅵ amaguta e chitaaya, na ebinto bi’okoroisia amaguta akwaakwa abachore, na ebi’okoroisia ubani ye rimusu rigiya;
Ⅶ amagena e rigori rinene, buna oiniki na ayande, akobekwa ase egesibao ki’Omokuani na ase egesembe kiaye.
Ⅷ Obateebie bandoiserie Obomenyo Obochenu, na inche inyare komenya ase egati yabo.
Ⅸ Mondoiserie Obomenyo na ebinto bionsi ebirabeo, buna ndakworokie.”
Esanduki yamachiiko
(Okong’ 37:1-9)
Ⅹ “Mondoiserie Esanduki ye chibao chi’omokonge. Obotambe bwaye bobe obw’ekerengo ki’amaboko abere na ekeng’ese, na obogare bwaye okoboko okomo na ekeng’ese, na obotambe bwaye gochia igoro okoboko okomo na ekeng’ese.
Ⅺ Oyeome netaabu echenire ime na isiko, oyeetananie omong’orooria bw’etaabu.
Ⅻ Okore chibonyi inye chi’echitaabu, ochibeke ase amagoro aye ane, ibere ase kera ensemo.
ⅩⅢ Obaache emiaro ebere y’emekonge, oyeoome netaabu.
ⅩⅣ Osoyie emiaro eyio ase chibonyi ime ase okobogoreria Esanduki eria.
ⅩⅤ Emiaro eyio goika ebe ime ase chibonyi echio, terusigwao.
ⅩⅥ Ime y’Esanduki eria obeke chibao echi chiriikire oborori, echi ndakoe.”
Oboikaranso bwa amaabera
ⅩⅦ “Oroisie ekemumeko gi’etaabu echenire kebe Oboikaranso bwa amaabera. Obotaambe bwaye bobe ekerengo ki’amaboko abere na ekeng’ese, na obogare bwaye okoboko okomo na ekeng’ese.
ⅩⅧ Naende okore emegwekano y’ebitongwa bibere bibwate chimbaba ey’etaabu esunyuntire, oyebeke ase chinsinyo ibere chi’Ekerogo Kiamaabera,
ⅩⅨ oyomo ase kera ensinyo. Oyekore ebe egento ekemo n’Ekerogo kia Amaabera.
ⅩⅩ Ebitongwa bibwate chimbaba abwo barambore chimbaaba chiabo igoro y’ekerogo kiamaabera, babobekere ekiriri, na amasio abo abe achikaine, na barabwo barigererie ekerogo kiamaabera.
ⅩⅪ Oterekerere ekerogo kia amaabera igoro y’Esanduki eria. Erio obeke imeo chibao echi chiriikire oborori, echi ndakoe.
ⅩⅫ Agwo ninchiche ng’umerane naye. Korwa igoro y’ekerogo kia amaabera, gati‐gati y’ebitongwa bibwate chimbaba aba babere bare igoro y’Esanduki ere ne chibao chiriikire oborori, nimbe ngokwana naye igoro y’amachiiko aya ngochia koa Abaisraeli goetera asore.”
Emesa y’emegati erabe ekoruegwa ase Nyasae
(Okong’ 37:10-16)
ⅩⅩⅢ “Oroisie emesa ye chibao chi’emekonge. Obotambe bwaye bobe obw’ekerengo ki’amaboko abere, na obogare bwaye okoboko okomo, na obotambe bwaye gochia igoro okoboko okomo na ekeng’ese.
ⅩⅩⅣ Oyeome netaabu echenire, oyeetananie omong’ororia bw’etaabu.
ⅩⅩⅤ Erio obeke orosingo robe nobogare bong’ana egesanyi gi’okoboko, na oroetananie omong’ororia bw’etaabu.
ⅩⅩⅥ Okore chibonyi inye chi’echitaabu ase emesa eria, ochibeeke ase chikoona inye ase amagoro aye,
ⅩⅩⅦ ang’e norosingo; na emiaro esoigwe imeo, erinde emesa enyare kobogorerigwa.
ⅩⅩⅧ Obaache emiaro eria korwa ase emekonge, oyeome netaabu, nero emesa erabogorerigwe.
ⅩⅩⅨ Oroisie chinteru na ebitaabo ase ubani, ne chisani, korwa ase ebio bagocha koumora ebinyugwa ebikoruegwa. Obiroisie bionsi korwa ase chitaabu chichenire.
ⅩⅩⅩ Ase emesa eyio obeke emegati erabe ekoruegwa ase ’nde, imbe nkoyerora botambe.”
Ekebekerero gie chitaaya
(Okong’ 37:17-24)
ⅩⅩⅪ “Oroisie ekebekerero gie chitaaya gi’etaabu echenire esunyuntire, okeroisie na enterekerero amo ne ritina na emegwekano y’amamumu na ebisicha, bionsi bibe egento ekemo.
ⅩⅩⅫ Chinsagia isano nemo chibe chigosoka korwa ase ritina, isato korwa ase ensemo eyemo, na isato korwa ase ensemo ende.
ⅩⅩⅩⅢ Orosagia rwe ritang’ani robe nemegwekano etato y’ebisicha binga buna ebi’omolozi, kera ekemo kebe ne rimumu na egesicha, na orosagia rwa kabere boigo robe nemegwekano etato y’ebisicha binga buna ebi’omolozi; ne chinsagia chionsi isano nemo chibe boigo.
ⅩⅩⅩⅣ Ritina rinyene ri’ekebekerero keria ribe nemegwekano ene y’ebisicha binga buna ebi’omolozi, kera ekemo kebe ne rimumu na egesicha.
ⅩⅩⅩⅤ Rimumu erimo ribe inse ya kera chinsagia ibere chigosoka korwa ase ritina. Ase ayio amamumu abe inse ye chinsagia echio isano nemo, chiroisigwe chibe egento ekemo ne ritina.
ⅩⅩⅩⅥ Amamumu ayio amo ne chinsagia biroisigwe bibe egento ekemo ne ritina, bionsi biroisigwe korwa ase ribomba erimo ri’etaabu echenire esunyuntire.
ⅩⅩⅩⅦ “Oroisie chitaaya isano na ibere, ochibeke igoro y’ekebekerero keria, erinde chimoreke gochia bosio.
ⅩⅩⅩⅧ Ebinachi ne chindogio chiaye biroisigwe korwa ase chitaabu chichenire.
ⅩⅩⅩⅨ Okorere chitaabu chichenire chikiro emerongo etano ase okoroisia ekebekerero gie chitaaya amo nebikorero biaye.
ⅩⅬ Origererie buya obikore buna nakworogetie ase egetunwa.”