RIRUUBE RIA PAULO OMOTOMWA ASE
ABAGALATIA
Ogochaakera
Riruube ri’motomwa Paulo gochia ase abakristo ba Galatia nigo rikageire koriikwa ase omwaka 48 magega Yeso gachire ense, ekero Paulo arenge Antiokia magega yogotara kwaye kw’eritang’ani. Paulo nigo achaagete ekanisa ya Galatia aria ase omochie bw’Antiokia oyio orenge inse y’oborwoti bwa Abaruri.
Paulo nigo ariigete riruube eri erio koiraneria amaborio amange ayio aruete ase omosangerekano bw’abarokigwa aria Yerusalemu ase omwaka 48 magega Yeso gachire ense (Ogok 15). Ekero Paulo atarete Galatia, nigo anyorete ebitango ebinge kobua mono korwa ase abanto abwo baruete Boyahudi. Abanto abwo nigo bare kwegeria buna abanto batari Abayahudi abwo barigetie koba abakristo, goika ritangani babe Abayahudi goetera ase enchera yokwaroka erio bancherwe koba abakristo.
Paulo nigo ariigete riruube eri gochia ase Abagalatia erio kobaerera buya buna omonto akonyora ogwancherwa ase Nyasae. Omonto nigo akobarerwa oboronge ase okwegena korende tari ase okorenda amachiiko. Omonto ekero egenire ase Yeso nigo ogochaka kwama amatunda y’omoika omochenu. Ase riruube eri Paulo nigo akoboria abanto abwo konya bairanire magega ase engencho yamegerio amabe bairane ase okwegena gwekeene.
Paulo nigo agokoora riruube riaye ase okweera buya mono emeremo yaye, nigo agoteeba buna okorangerigwa kwaye koba omotomwa tikorueti ase Mwanyabaanto korende nigo koruete ase Nyasae, naende buna ere nigo atometwe korandia ase abanto b’ebisaku.
Okobagwa kw’egetabu eke
Ogochaakera 1:1-10
Okobua gwa Paulo gw’okoba omotomwa 1:11—2:21
Enchiri y’obuya bwa Nyasae 3:1—4:31
Obosibore bw’Abakristo na buna bagwenerete gokora 5:1—6:10
Ogokoorera 6:11-18
Ⅰ
Ogokwania
Ⅰ Inche Paulo, ere oyio okorangerigwa koba omotomwa tikwarenge korwa ase Mwanyabaanto gose goetera ase omonto, korende goetera ase Yeso Kristo, na Nyasae Tata oyomobogetie korwa ase abakuure.
Ⅱ Abaminto bonsi abare amo nainche aiga, twabakwanirie inwe abanto be chikanisa chia Galatia:
Ⅲ Obuya bobe ase more na omorembe bikorwa ase Nyasae Tata oito, na ase Omonene Yeso Kristo,
Ⅳ Akerua ere omonyene ase engencho y’ebibe biaito, erinde atotoorie korwa ase ekegori eke ekebe kia bono, koreng’ana nogwancha kwa Nyasae Tata oito.
Ⅴ Obonene bobe ase Nyasae kare na kare. Amina.
Enchiri ende eng’ao teri
Ⅵ Nakumirie ase more inwe! Ekiagera mokomotiga iga bwango ere oyobarangeretie ase obuya bwa Kristo, na koonchokera enchiri ende eng’ao.
Ⅶ Ase ekeene “enchiri ende eng’ao” teiyo, korende nigo nkoyakwana aya ase engencho mbareo abanto bande bakobaotorana na korigia koonchorana enchiri ya Kristo.
Ⅷ Korende neisa koba nintwe, gose omomalaika korwa igoro, okobaranderia enchiri ende eng’ao, otatiga eria twabaranderetie, tiga omonto oyio aragererigwe goika obosiru!
Ⅸ Buna konya twakwanire ritang’ani, bono ninkwane naende: Onye omonto okobaranderia enchiri ende eng’ao, otatiga eria mwaitaberete, oyio tiga aragererigwe goika obosiru!
Ⅹ Bono inee! Nigo eraise koigwekana gose buna inche nigo nkorigia ogwancherwa korwa ase Mwanyabaanto? Tari boigo! Keria indigetie inche nokogwenera korwa ase Nyasae! Gose, inche nigo nkorigia ogwancherwa korwa ase Mwanyabaanto? Onye nabeete nkogwenera Mwanyabaanto goika bono, anga inche tinabeete omosomba o Kristo.
Buna Paulo abeete omotomwa
Ⅺ Naki nimbamanyie inwe abaminto, ng’a enchiri eye nabaranderetie tiyarwete ase Mwanyabaanto.
Ⅻ Naki tinayenyorete korwa ase Mwanyabaanto onde, gose tinorokereretigwe na monto onde bwensi, korende ere Yeso Kristo bweka, ere omonyene akang’a inche okomaanorerwa korwa asaare ere.
ⅩⅢ Naki mwatebetigwe amang’ana y’orogendo rwane ase amatuko aetire ase edini y’Abayahudi buna inche nachandete ekanisa ya Nyasae goetania ekerengo, na buna nateemete koyesaria.
ⅩⅣ Na inche kobua abange abarenge b’ekiare kiane ase egesaku kiane natang’anete ase edini y’Abayahudi, ngakora omokia mono ase okobwata chingencho chie chisokoro chiane.
ⅩⅤ Korende Nyasae ase obuya bwaye aganchora inche ekero konya intaraiborwa korwa ase enda ya baba na akandangeria erio imokorere. Naende ekero aetetie ayio,
ⅩⅥ agancha koorokia Omwana oye ime ase ’nde erinde, indandie Amang’ana Amaya ase egati y’abanto b’Ebisaku. Erio tinarigia konyota obosemia korwa ase Mwanyabaanto onde bwensi;
ⅩⅦ gose tinatiirete kogenda Yerusalemu ase abwo barenge abatomwa b’eritang’ani ase ’nde. Korende erio kegima nkagenda Arabia, naende nkairana goika Damesiki.
ⅩⅧ Erio magega y’emiaka etato koyaetire, ngatiira kogenda Yerusalemu gokwania Petero, nkamenya amo nere ase chichuma ibere.
ⅩⅨ Korende tinaroche motomwa onde otatiga Yakobo, momura omwabo Omonene.
ⅩⅩ Ayio nkobariikera, nekeene. Nyasae namanyete buna tindi kongainereria!
ⅩⅪ Erio magega nkagenda chinsemo chia Siiria na Kilikia.
ⅩⅫ Ase chingaki echio, inche omonyene tinamanyekanete nonde ase ababwatani be chikanisa chiare Boyahudi.
ⅩⅩⅢ Korende barabwo nigo bamanyete okaoka aria bare koigwa korwa ase abande ng’a, “Ere oyotochandete ritang’ani, bono nkorandia are okwegena koria aare gosaria agwo ritang’ani.”
ⅩⅩⅣ Bagatogia Nyasae ase engencho yane.