OMOCHAKANO
Ogochaakera
Egetabu eke kiomochakano nigo gekworokia ogotongwa gw’ense n’omochaakano bw’enyomba ya Israeli. Omonene nigo aganetie emeremo yaye y’obotongi ebe emeikeranu. Ase igo, Omonene akarua ekerenga kiaye ase ense gochia: ase Adamu, ase Nuhuh, ase Aburaamu, ase Isaka, na ase Yakobo. ’Omonene bweka omonyene orwete omoroberio bw’obogaambi ataboririe n’onde na tabetereretie borai obwo ase monto onde bwensi atongete. Omochakano n’egetabu gekworokereria buna ekebe na amakweri biachete ase ense. Kera engaki Mwanyabaanto nagwete ase amatemwa, korende kera ekero, Omonene nigo aroisetie omoroberio bw’okomotooria. Ase igo, Omonene omonyene agachoora korwa ase Mwanyabaanto abanto gete, baria ere aganetie kobwaterana nabwo ase ogoikerania omoroberio oyio; erio ere Mwanyabaanto amomanye na komwancha Omonene. Abanto bonsi korwa kera eamate, ’nkweboria bare amaborio y’engencho enene kegima buna aya: Naki ense yachaagete? Ng’ai omonto omotang’ani aruete? Ninki gekogera omonto agokwa? Ekero omonto agokwa ’ng’ai agochia? Amaborio aya nayengencho mono ase mwanyabaanto, na amairanerio aya abekire erang’o ase kera eamate; na kera eamate yarigirie koyairaneria ayio ase emegano ao ao koreng’ana n’okomanya kwaye. Ensemo entang’ani, ime y’egetabu ki’omochakano (Omochakano 1-11), nigo tokonyora omogano bw’ekeene bw’Abaisraeli na buna omogano oyio okoreterera chiamate chinde chi’ense korwa kare na kare goika reero iga. Ensemo ya kabere Abaisraeli (Omochakano 12-50) nigo bagoitona chisokoro chia abanto b’enyomba ya Israeli. Imeo, egetabu eke nigo tokorora okorangerigwa gwa Abramu na Sara korwa enka yabo gochia ase ense ekorokwa Harani. Ase igo, okoba okwegena na oboigweri bw’Abramu gochia ase Omonene, Nyasae akamoriera eira ’ng’a nabe na abana abange ase ororeeria rwaye. Naende Omonene akamoa Kanaani, ense y’omwando bw’enyomba ya Israeli. Egetabu eke nigo kiarigetwe gotoorokia emegano y’abanto abegeni na korenda okwegena koria
Okobagwa kw’egetabu eke:
Obotongi bw’ebitongwa bionsi na obwa Mwanyabaanto 1:1—2:25
Omochakano bw’ebibe na emechando 3:1-24
Korwa Adamu goika Nuhu 4:1—5:32
Nuhu na etoigo 6:1—10:32
Omorobiri o Babiloni 11:1-9
Korwa Shemu goika Aburaamu 11:10-32
Abagaaka abanene: Aburaamu, na Isaka, na Yakobo 12:1—35:29
Ororeeria rwa Esau 36:1-43
Yusufu na bamura bamwabo 37:1—45:28
Abaisraeli bamenyete Misiri 46:1—50:26
Ⅰ
Omogano bw’ogotongwa g’wense
Ⅰ Agwo omochakano Nyasae agatonga igoro na ense,
Ⅱ Bono ense tiyarenge na kieni kende, gose kende gionsi tikiareengeo, n’omosunte ekerima nigo oyetubete, na Omoika o Nyasae ogatoeerera igoro y’amaache.
Ⅲ Erio Nyasae agachiika: “Tiga oborabu bobeo,” erio kegima oborabu bokabao.
Ⅳ Nyasae akagokigwa na keria aroche. Erio agaatanana oborabu korwa ase omosunte,
Ⅴ akaroka oborabu boria omobaso, na omosunte akayoroka obotuko. Erio agwo rikaba mogoroba, naende bokaba maambia, rituko rie ritang’ani.
Ⅵ Erio Nyasae agachiika, “Tiga oboiko bobe egati‐gati y’amaache, erio bwatanane amaache korwa ase amaache ande.”
Ⅶ Igo Nyasae agakora oboiko boria, bogaatanana amaache ayare inse y’eaanga korwa ase amaache ayare igoro y’oboiko; ayio akaba boigo.
Ⅷ Akaroka oboiko boria igoro. Erio agwo rikaba mogoroba, naende bogakia mambia, rituko ria kabere.
Ⅸ Naende Nyasae agachiika, “Tiga amaache ayare inse y’erioba asangererekane aase aamo, egere ense enyomo erorekane;” ayio akaba boigo.
Ⅹ Akaroka aase aria aomo ense, na amaache aria asangererekanete amo akayaroka chinyancha. Nyasae akarora ayio ng’a namaya.
Ⅺ Erio agachiika agateeba: “Tiga ense emere ebimeri bigokina, buna ebimeri bikorua na emete ekwama amatunda are ne chimbusuro chire imeo, kera oyomo ase egesaku kiaye ekenyene” ayio akaba boigo.
Ⅻ Na ense ekamera ebimeri bionsi, na Nyasae akarora ng’a ayio namaya.
ⅩⅢ Erio agwo rikaba mogoroba, naende bogakia mambia, rituko ria gatato.
ⅩⅣ Erio Nyasae agachiika “Tiga emebaso ebe ase oboiko bw’aaria igoro, bwatanane omobaso korwa ase obotuko; erio ebe ebimanyererio bikworokia ebiro bi’amatuko, ne chingaki, n’emiaka,
ⅩⅤ ebe emebaso ase oboiko aaria igoro, boyee ense omobaso na oborabu,” ayio onsi akaba boigo.
ⅩⅥ Erio Nyasae agakora emebaso ebere emenene, Risase rigaambere ekero kia mobaso n’omotienyi ogaambere ekero kia botuko; agakora ne ching’enang’eni boigo.
ⅩⅦ Akayebeka ase eanga aaria igoro, eyee ense oborabu,
ⅩⅧ egaambere omobaso na obotuko, na gwatanana oborabu korwa ase omosunte. Nyasae akarora ayio ng’a namaya.
ⅩⅨ Erio agwo rikaba mogoroba, naende bogakia mambia, rituko ria kane.
ⅩⅩ Naende Nyasae agachiika, “Tiga amaache atware obonge bw’ebitongwa bire moyo, ne chinyoni chikoiruruka igoro ase ense, chigoetanana inse y’eaanga ya igoro.”
ⅩⅪ Erio Nyasae agatonga ebitongwa ebinene bire ase amaache ime, amo n’ebitongwa binde bionsi bimenyete ase amache ime, boigo agatoonga chinyoni. Nyasae akarora ng’a ayio namaya.
ⅩⅫ Erio akabisesenia bionsi, agateeba ebitoongwa biria bimenyete amaache ime bisaraare biichore ime ase chinyancha, naende agateebia chinyoni chisaraare ase ense.
ⅩⅩⅢ Erio agwo rikaba mogoroba, naende bogakia mambia, rituko ria gatano.
ⅩⅩⅣ Naende Nyasae agachiika, “Tiga ense etware ebitongwa bire moyo, kera egesaku n’engencho yaye. Ching’iti chigotugwa, n’echikwagura, ne ching’iti chi’orosana, kera egesaku nengencho yaye” ayio akaba boigo.
ⅩⅩⅤ Ase igo Nyasae agakora ching’iti chi’orosana, Nyasae akarora ng’a ayio namaya.
ⅩⅩⅥ Erio Nyasae agateeba: “Bono tiga tokore omonto; ase omogwekano oito, otobwekaine. Nigo arabe n’echinguru agaambere chinswe chia nyancha, ne chinyoni chikoiruruka igoro, ne ching’iti chigotugwa, ne ching’iti chionsi chi’orosana, na ense yonsi, ne ching’iti chionsi chinene n’echinke.”
ⅩⅩⅦ Nabo Nyasae agatonga Mwanyabaanto ase omobwekano oye omonyene; ase omobwekano o Nyasae ere akamotonga. Agatonga omosacha na omokungu,
ⅩⅩⅧ akabasesenia, akabateebia: “Moibore, mosarare, moichore ase ense, na moyegaambere. Ngokobeeka inde ogaambere chinswe, ne chinyoni, n’echingiti chionsi chi’orosana.
ⅩⅩⅨ Nabaeire kera ekemeri gekwama chimbusuro, na kera omote okwama amatunda ebio nabio biraabe endagera yaino.
ⅩⅩⅩ Korende ching’iti chi’orosana ne chinyoni chionsi nachieire ebimeri ebibese bionsi bibe endagera yabo.” Ayio onsi akaba boigo.
ⅩⅩⅪ Nyasae akarora ebinto ebio bionsi akorete, na birobio nigo biareenge ebiya mono. Erio agwo rikaba mogoroba, naende bogakia mambia, rituko ria gatano na rimo.