ⅩⅩⅦ
Yakobo ogosesenigwa ise ase okong’ainereria
Ⅰ Ekero Isaka konya abeire omogotu, nonya na amaiso aye konya amerire orotutu, atari korora buya, akarangeria Esau, omwana oye omotangi, akamoteebia: “Omwana one!”
Ere agaitaba: “Nao inde aa Tata.”
Ⅱ Akamoteebia: “Rora bono inche nagotire, gose timanyeti engaki y’ogokwa kwane.
Ⅲ Bono bogoria obota n’echinsara chiao, ogende borabu otware ching’iti, ondetere chinyama.
Ⅳ Erio ondoiserie endagera engiya, eria nyanchete, oyendetere indie, erinde ngosesenie konde moyo, ntarakwa.”
Ⅴ Ko bono, ekero Isaka are gokwana nomwana oye Esau, Rebeka nigo ategererete bobisi. Ase igo, ekero Esau agendete borabu gotwara ching’iti amorentere ise,
Ⅵ Rebeka agateebia Yakobo, omwana oye: “Naigure iso ogoteebia momura omino Esau:
Ⅶ Ndetere chinyama chia borabu, ondoiserie endagera engiya indie, erio inyare kogosesenia ase obosio bw’Omonene, konde moyo, ntarakwa.
Ⅷ Ase igo, omwana one, ntegerera bono aya nkogoteebia.
Ⅸ Genda getii ase riicho, ondetere chimanwa chie chimbori ibere chingiya, na inche nimoroiserie iso endagera engiya, eria anchete.
Ⅹ Erio omoirere iso arie, erinde anyare kogosesenia ritang’ani atarakwa.”
Ⅺ Korende Yakobo agateebia Rebeka ng’ina; “Norooche Esau ominto nomonto omerete amarionya ase omobere oye, korende inche omobere one nigo ore omoterere.
Ⅻ Aande, Tata nigo arantaba‐tabe, na inche imbe ase amaiso aye buna omong’ainereria, inyerentere okoragererigwa ribaga ri’ogosesenigwa.”
ⅩⅢ Ng’ina akamoteebia: “Okoragererigwa kwao tiga kobe igoro yane; igwa aya nkogoteebia rimo rioka, genda ondetere chimanwa echio chie chimbori.”
ⅩⅣ Erio agwo akagenda, akarentera ng’ina chimanwa echio, na ere akaroisia endagera engiya, eria ise anchete.
ⅩⅤ Erio Rebeka akabogoria eanga eria engiya mono ya Esau, omwana oye omotangi; eye nigo yagachire nyomba mwaye, akayebekera Yakobo, omwana oye omoke.
ⅩⅥ Na amasankwa aria e chimanwa chie chimbori akamoboyia ase amaboko aye ne rigoti.
ⅩⅦ Erio ababeeka ase amaboko ’omwana oye Yakobo endagera eria engiya aroisetie, amo nomogati.
ⅩⅧ Yakobo akagenda agasoa nyomba mwaise, akamoteebia: “Tata!”
Nere agaitaba: “Nao inde aa. Naye ng’o, mwana one?”
ⅩⅨ Yakobo akairaneria ise iga: “Ninche Esau, omwana oo omotangi. Nakorire buna gwantebeetie; booka, oikaranse egere orie enyama y’obotwari bwane, erio onsesenie.”
ⅩⅩ Isaka akamobooria: “Omwana one, naki gwakora kwanyora ching’iti bwango iga?”
Yakobo akamoiraneria: “mboora Omonene, Nyasae oo, ochindetera.”
ⅩⅪ Erio Isaka agateebia Yakobo: “Inchuo aiga ang’e ase ’nde, ngotabatabe, erinde imanye gose naye omwana one Esau, gose tari ere.”
ⅩⅫ Yakobo akagenda agaika ise ang’e, na ere akamotaba‐taba, akabora: “Eriogi rirorio neria Yakobo, korende amaboko naya Esau.”
ⅩⅩⅢ Na ise tamomanya, ekiagera amaboko aye nigo areenge namarionya buna aya Esau omwabo. Ase igo, akamosesenia.
ⅩⅩⅣ Akamobooria: “Amaene, naye omwana one Esau?”
Yakobo akamoiraneria: “Ee, Tata ninche.”
ⅩⅩⅤ Naende Isaka akamoteebia: “Ng’ererie endagera eyio gocha ang’e aiga, omwana one, indie enyama y’obotwari bwao, erio ngosesenie.” Ase igo, akamoyeirera endagera eria na ere akaria, akamoa na edivai, akanywa.
ⅩⅩⅥ Isaka ise akamoteebia: “Omwana one, inchwo aiga ang’e ase ’nde, erio onyunyunte.”
ⅩⅩⅦ Erio akamoika ang’e, akamonyunyunta. Isaka agatiokerera rimisu rie chianga chiaye, akamosesenia, akabora:
“Naama! Rimisu ri’omwana one Esau
nigo rigotioka buna rimisu ri’omogondo omuya, osesenirie n’Omonene!
ⅩⅩⅧ Tiga Nyasae agoitororere riime rikorwa igoro na obonoru bwe riroba,
ne rigesa riao ribe rinyinge, na edivai boigo.
ⅩⅩⅨ Abanto bagokorere emeremo, na ebisaku bikoe obonene.
Obe omonene ase abamino bonsi, abana ba nyoko bagosike;
oyorakoragererie, nere naragererigwe,
na oyoragosesenie, nere nasesenigwe!”
Esau Ogosorora Isaka Amosesenie
ⅩⅩⅩ Ekero Isaka konya aikire gosesenia Yakobo, na Yakobo karure ase obosio bwa Isaka ise, Esau omwabo akairana korwa ase obotwaari bwaye.
ⅩⅩⅪ Nere boigo akaroisia endagera engiya, akarentera ise, akamoteebia: “Tata, inchwo orie endagera y’obotwari bwane, inche omwana oo, erinde onsesenie.”
ⅩⅩⅫ Isaka ise akamobooria: “Aye naye ng’o?”
Ere akamoiraneria: “Ninche Esau omwana oo, okoira kwao ogotang’ani.”
ⅩⅩⅩⅢ Erio Isaka agakumia mono na koiguswa, akabora: “Kai! Kai! Ning’o oria ocha ondetera endagera engiya, na inche naria yonsi ekero otaracha, namosesenia? Ee! Ee!, Nere bono oikire gosesenigwa!”
ⅩⅩⅩⅣ Ekero Esau achia koigwa amang’ana aya korwa ase ise, agakuura na korera ekerero ekenene mono ki’obororo, akamoteebia: “Nsesenie nainche boigo, Tata!”
ⅩⅩⅩⅤ Korende Isaka akamoiraneria: “Oyomino nigo achicha nobong’ainereria, na ere bono oirire ogosesenigwa kwao.”
ⅩⅩⅩⅥ Esau akabora: “Inee! Tari korokwa Yakobo ase oboronge? Naki eye nengaki ya kabere ang’ainereirie. Ritang’ani akaira omwando one bw’okoiborwa kw’obotangi, naende bono oirire ogosesenigwa kwane!” Naende agwo kegima akamobooria ise iga: “Inee, tontigarereti ogosesenigwa?”
ⅩⅩⅩⅦ Isaka akamoiraneria: “Rora, bono naikire komokora obeire omonene oo, na abamwabo bonsi babe abasomba baye, naende namoeire endagera y’omogondo na edivai. Inki rende bono nkogokorera aye, omwana one?”
ⅩⅩⅩⅧ Esau akabooria ise: “Ogosesenia nokomo gwoka kwabwate, Tata? Nsesenia nainche boigo, Tata ominto.” Esau agaaka egakuura, na akarera nobororo.
ⅩⅩⅩⅨ Erio Isaka ise akamoiraneria, akamoteebia,
“Rora, obomenyo bwao inabobe aare korwa ase obonoru bwe riroba,
na aare korwa ase riimi rikorwa igoro.
ⅩⅬ Omoro oo bw’esegi nogere obe moyo,
aye nomokorere oyomino emeremo;
korende engaki neche orekong’ie,
nobune rikorogoto erio akobekeire ase rigoti riao.”
ⅩⅬⅠ Esau akagecha Yakobo ase engencho y’ogosesenigwa okwo ise amosesenetie, agateeba ase omoyo oye ime: “Amatuko ay’okomoreera Tata ng’ang’e are; erio nario ndaite Yakobo.”
ⅩⅬⅡ Korende ekero Rebeka ateebigwa aya Esau, omwana oye omonene, agoteeba, agatoma omonto korangeria Yakobo, omwana oye omoke, akamoteebia: “Rora, momura omino Esau ogotianeire ng’a nkogoitare.
ⅩⅬⅢ Na bono, omwana one, igwa amang’ana aane, imoka otame gochia o Labani, momura ominto aaria Harani.
ⅩⅬⅣ Omenye aroro ase engaki enke, goika ekeririanda kia momura omino gekende.
ⅩⅬⅤ Ekero endamwamu yaye erakee, na ere ebire aya kwamokorerete, erio nintome abanto bache gokorangeria oirane korwa aroro. Nase ki ndakwerwe nainwe mwensi babere ase rituko erimo.”
Isaka Ogotoma Yakobo ase Labani
ⅩⅬⅥ Erio Rebeka agakwana na Isaka, akamoteebia: “Nigo ngechirie mono ase obogima bwane ase engencho y’abaiseke b’Abahiti. Onye Yakobo ogochia konyuoma oyomo bw’abaiseke b’Abahiti, koreng’ana buna aba bamenyete ase ensemo eye, rirorio obogima bwane inki borangwenere?”