Ⅲ
Ogotaigwera kwa Mwanyabaanto
Ⅰ Bono eng’iti engenda inse nigo yarenge eng’aini kobua ching’iti chinde chionsi, echi Omonene Nyasae akorete. Engiti ekaboria omokungu: “Inee! Namaene ng’a Nyasae nigo abakanetie ng’a timoria amatunda ’omote onde bwonsi ore mogondo?”
Ⅱ Omokungu oria akairaneria eng’iti eria: “Amatunda a kera omote ore ase omogondo ’natonyare koyaria
Ⅲ otatiga amatunda y’omote ore mogondo gati-gati. Nyasae nigo atokanetie titoria amatunda korwa ase omote oria gose koyakuna, toise gokora bo nigo torakwe.”
Ⅳ Eng’iti eria ekairaneria omokungu oria “Ayio tari bo ogokwa, timogokwa.
Ⅴ Nyasae nigo akwanete bo akiagera amanyete ng’a ekero moraarie amatunda y’omote oyio nigo morabwekane Nyasae mobe mokomanya amaya na amabe.”
Ⅵ Omokungu oria agachia korora omote oria buna ore omuya okoriegwa na okogwenera amaiso, na omote oria noyo bw’okoganigwa, ekiagera okobaa okomanya, agatwa amatunda aye, akaria. Erio agwo akairera omosacha oye amatunda ande nere akaria.
Ⅶ Erio agwo nyuma ko barire, bakaegwa okomanya bakamanya ng’a ngetirianda bare; erio bagatabora amato y’omoko, bakayasonerania, erio bakeboyia.
Ⅷ Emogoroba eria bakaigwa eriogi ri’Omonene Nyasae ogotaara ase omogondo, erio barabwo bakebisa mogondo gati y’emete.
Ⅸ Korende Omonene Nyasae akarangeria omonto oria, akamobooria: “Ng’ai ore?”
Ⅹ Ere akamoiraneria: “Nigo naigwa eriogi riao ase omogondo, noboa ase ayio nebisa ekiagera igo nde getirianda.”
Ⅺ Omonene akamobooria: “Ing’o ogoteebia ng’a ngetirianda ore? Inee! Nkwarire amatunda y’omote oria nagokanetie ng’a toria?”
Ⅻ Omonto oria akamoiraneria: “Omokungu oyo kwang’ete ng’a abe amo nainche, nere ong’ete amatunda y’omote oyio, na inche nkaria.”
ⅩⅢ Eri’Omonene Nyasae akabooria omokungu oria: “Ninki kiagera gwakora aya?” Omokungu oria akamoiraneria: “Neng’iti yang’ainete, nkaria.”
Omonene okorua okoragereria
ⅩⅣ Omonene Nyasae agateebia eng’iti eria,
“Ekiagera gwakorire aya,
aye bweka kwaragererigwe kobua ching’iti chionsi;
aye nenda oragendere,
na orotu orarie buna endagera ase obogima bwao bwonsi.
ⅩⅤ Inche nimbeeke obobisa ase egati yao na omokungu oyo,
na ase egati y’oroiboro rwao na oroiboro rwaye;
noroiboro orwo narogosenyente omotwe oo,
na aye nomoorome egetingiro kiaye.”
ⅩⅥ Akaonchokera omokungu, akamoteebia,
“Ninkomentere emechando emeenge ekero okoba morito,
na ekero okoibora abana nonyore obororo;
nonya nabo okogania kwao nigo korabe ase omosacha oo,
na ere nakogaambere.”
ⅩⅦ Erio agateebia Omosacha oria,
“Ekiagera kwaigwerete mokao
na okaria amatunda ’omote oria nagokanetie ng’a toria,
riroba riaragererigwe ase engencho yao.
Ase ogwechanda kwao norie okwama kwaeriroba
amatuko onsi ay’obogima bwao.
ⅩⅧ Riroba narikwamere amagwa na amageri,
na aye norie okwama kw’ebimeri bi’orosana.
ⅩⅨ Goika okore omokia na goitera ebigeri gokora riroba riame kende gionsi
omanye konyora endagera orie;
goika oirane ase riroba, ekiagera agwo nao kwarwete.
Naki aye norotu,
naende noirane ase orotu.”
ⅩⅩ Adamu akaaroka mokaye Hawa, ekiagera ere nere ng’ina bw’abare moyo bonsi.
ⅩⅪ Erio Omonene Nyasae akaroiseria Adamu na mokaye chingobo chi’amasankwa, erio agwo akababoyia.
Adamu na Hawa bagoserigwa korwa ase omogondo o Edeni
ⅩⅫ Eri’Omonene Nyasae agateeba: “Rora, omonto oyo obeire buna oyomo oito ase okomanya amaya na amabe. Tabaisa gwancherwa gochia korambora okoboko kwaye atwe amatunda ’omote bw’obogima arie, erinde abe moyo kare na kare.”
ⅩⅩⅢ Ase ayio Omonene Nyasae akamoseeria korwa ase omogondo o Edeni, akamobeka areme riroba agwo ase arwete.
ⅩⅩⅣ Ase ensemo ya moocha y’omogondo o Edeni akabeeka ebitongwa bibwate chimbaba, n’omoyio o birende ogwoka omorero okona‐koonchaonchoka chinsemo chionsi. Erio korenda onde bwensi tacha ase omote bw’obogima.