ⅩⅩⅩⅤ
Yakobo okogenda Beteli
Ⅰ Rituko erimo Nyasae agateebia Yakobo: “Imoka, otiire ogende omenye Beteli, oagachere Nyasae egesasiimero aroro, Nyasae, oyo okoorokerete ekero kware gotama korwa ase Esau momura omino.”
Ⅱ Erio Yakobo agateebia abanto baye amo naabwo bonsi baarenge komo: “Rusia emegwekano y’ebinyasae ebigeni b’ebisaku, ebi mobwate ase egati yaino, mwesibie inwe abanyene, moonchorerie chianga chiaino.
Ⅲ Toimoke totiire gochia Beteli, erinde ing’agachere Nyasae egesasiimero aroro, Nyasae oyonyigwete ekero keria nareenge nobokong’u, akaba amo nainche ase orogendo rwane rwonsi.”
Ⅳ Barabwo bakaa Yakobo emegwekano y’ebinyasae ebigeni bionsi ebio babwate, na ebigera babeegete ase amato abo, na Yakobo akabitindeka inse y’omote okorokwa omwaloni, oyorenge ang’e na Sekemu.
Ⅴ Ekero baimogete kogenda orogendo rwabo, okoondokia gokarua ase Nyasae, gokabwata abanto b’emechie eria yabaetanaine; Ase igo tibanyara komonyookia basinto ba Yakobo.
Ⅵ Yakobo amo nabwo bonsi baarenge nere bagaika omochie o Lusu, Omochie oyio naende noro okorokwa Beteli, oyio ore ime y’ense ya Kaanani
Ⅶ Agwo akaagacha egesasiimero, Akaaroka aase aria Eli‐Beteli, ekiagera agwo nao Nyasae aorokerete Yakobo, ekero areenge gotama korwa ase oyomwabo.
Ⅷ Agwo Debora, omoreri o Rebeka, agakwa, agatindekwa inse y’omote okorokwa omwaloni. Aase agwo akarokwa Aloni‐Bakuti.
Ⅸ Erio naende Nyasae akaorokera Yakobo, ekero Yakobo areenge korwa Padan‐Aramu, Nyasae akamosesenia.
Ⅹ Agwo Nyasae akamoteebia,
“Erieta riao n’Yakobo,
bono tokorokwa Yakobo naende,
korende nigo orarokwe Israeli.”
Ase igo, akamoroka Israeli.
Ⅺ Naende Nyasae akamoteebia,
“Inche Nyasae Omobui,
genderera gosarara, obuche.
Egesaku na emeganda y’ebisaku nigo erarue asore,
na abarwoti mbarue asore.
Ⅻ Na ense eye naete Aburaamu na Isaka,
ninkoyee aye na ororeeria rwao rorache korwa magega yao.”
ⅩⅢ Erio Nyasae akaimoka akagenda igoro, akarwa asare, agwo ase areenge gokwana nere.
ⅩⅣ Yakobo agatenenia rigena buna esiiro aase aria Nyasae akwanerete amo nere, akaumora ekeng’wanso gi’ekenyugwa amo namaguta igoro yaye.
ⅩⅤ Igo Yakobo akaaroka aase aria Nyasae akwanerete amo nere Beteli.
Ogokwa kwa Raeli
ⅩⅥ Erio bagachaaka orogendo rwabo korwa Beteli, ekero batigairie orogendo oroke baike Efarati, Raeli agachaaka kobina ase okoibora, akaba nobokong’u bw’okoibora.
ⅩⅦ Ekero areenge koromwa mono, omoiboria akamoteebia: “Toondoka, ekiagera naende nomwana omoisia oraibore.”
ⅩⅧ Agwo akaba okogireka ase ogokwa; na ekero areenge ang’e ase ogokwa, Akamoroka omwana oyio Ben‐Oni, korende ise akamoroka Benjamini.
ⅩⅨ Erio Raeli agakwa, agatindekwa agwo ase enchera ekogenda Efarati, nao Bethlehemu.
ⅩⅩ Na Yakobo agatenenia rigena ri’ekeinyorio ase embeera ya Raeli, nao rire goika reero iga.
ⅩⅪ Erio Israeli akaimoka, akagenda, agatenenia eema yaye ng’umbu y’omoorobiri o Ederi.
Abamura ba Yakobo
ⅩⅫ Engaki eria Israeli amenyete ase ense eria, Rubeni akagenda akaraara na Bilia, omokungu o ise, oria o sere-sere, na Israeli akaigwa amang’ana ayio.
Abamura ba Yakobo nigo baarenge ikomi na babere.
ⅩⅩⅢ Abana abamura ba Lea nabwo aba: Rubeni, omwana omotangi o Yakobo, na Simioni, na Lawi, na Yuda, na Isakaru, na Sabuloni.
ⅩⅩⅣ Abana abamura ba Raeli nabwo Yusufu na Benjamini.
ⅩⅩⅤ Abana abamura ba Bilia, omoiseke omosomba o Raeli, nabwo Dani na Nafutali.
ⅩⅩⅥ Abana abamura ba Silpa, omoiseke omosomba o Lea, nabwo Gadi na Aseri. Aba nabwo abana abamura Yakobo aiboreretwe agwo Padan‐Aramu.
Ogokwa kwa Isaka
ⅩⅩⅦ Yakobo agaika ase omochie o Isaka ise aaria Mamure, ang’e na Kiriati-Ariba, nao Heburoni, agwo ase Aburaamu na Isaka bamenyete buna abamenyi.
ⅩⅩⅧ Isaka nigo akoorete emiaka rigana erimo, na emerongo etano na etato (180).
ⅩⅩⅨ Erio Isaka ero agakwa, agasangerereka amo nabaanto baye, ore omogotu kegima, omonto bw’emiaka emenge, na abamura baye, Esau na Yakobo, bakamotindeka.