Ⅴ
Ororeeria rwa Adamu
Ⅰ Oyo noro omoroberio bw’ororeeria rw’Adamu. Ekero keria Nyasae atongete Mwanyabaanto, akabaroisia ase omogwekano oye omonyene.
Ⅱ Ere akabatonga omosacha na omokungu, akabasesenia, akabaroka Mwanyabaanto.
Ⅲ Ekero Adamu konya amenyire emiaka rigana erimo na emerongo etato (130), akaba ise bw’omwana omomura omobwekaine, ore ekieni kiaye ere omonyene, akamoroka Seti.
Ⅳ Magega y’okoiborwa gwa Seti, Adamu akagenderera komenya goika emiaka ende amagana atano na atato (800), erio akaba ise bw’abana baabande, abamura na abaiseke.
Ⅴ Ase oboamo Adamu nigo amenyete, emiaka amagana kianda, na emerongo etato (930), erio agakwa.
Ⅵ Ekero Seti konya amenyire emiaka rigana erimo, na etano (105), akaibora Enosu.
Ⅶ Magega y’okoiborwa kwa Enosu, Seti akamenya naende emiaka ende amagana atano na atato, na etano na ebere (807), akaba ise bw’abana bande, abamura na abaiseke.
Ⅷ Ase oboamo, Seti nigo akoorete emiaka amagana kianda, na ikomi na ebere (912), erio agakwa.
Ⅸ Ekero Enosu amenyire emiaka emerongo kianda (90), akaba ise Kainani.
Ⅹ Magega y’okoiborwa gwa Kainani, Enosu nigo amenyete emiaka amagana atano na atato, na ikomi na etano (815), akaba ise bw’abana bande, abamura na abaiseke.
Ⅺ Ase oboamo, Enosu nigo akoorete emiaka amagana kianda, na etano (905), erio agakwa.
Ⅻ Ekero Kainani konya emenyire emiaka emerongo etano na ebere, (70), akaibora Mahalaleli.
ⅩⅢ Magega y’okoiborwa kwa Mahalaleli, Kainani nigo amenyete emiaka amagana atano na atato, na emerongo ene (840), akaba ise bw’abana bande, abamura na abaiseke.
ⅩⅣ Ase oboamo, Kainani nigo amenyete emiaka amagana kianda, na ikomi (910), erio agakwa.
ⅩⅤ Ekero Mahalaleli emenyire emiaka emerongo etano nomo, na etano (65), akaibora Yaredi.
ⅩⅥ Magega y’okoiborwa kwa Yaredi, Mahalaleli nigo amenyete emiaka amagana atano na atato, na emerongo etato (830), akaba ise bw’abana bande, abamura na abaiseke.
ⅩⅦ Ase oboamo, Mahalaleli nigo amenyete emiaka amagana atano na atato, na emerongo kianda, na etano (895), erio agakwa.
ⅩⅧ Ekero Yaredi amenyire emiaka rigana erimo, na emerongo etano nomo, na ebere (162), akaibora Enoku.
ⅩⅨ Magega y’okoiborwa kwa Enoku, Yaredi nigo amenyete emiaka amagana atano na atato (800), akaba ise bw’abana bande, abamura na abaiseke.
ⅩⅩ Ase oboamo, Yaredi nigo amenyete emiaka amagana kianda, na emerongo etano nomo, na ebere (962), erio agakwa.
ⅩⅪ Ekero Enoku amenyire emiaka emerongo etano nomo, na etano (65), akaibora Metusela.
ⅩⅫ Magega y’okoiborwa kwa Metusela, Enoku akaba ogotaara amo na Nyasae ase emiaka amagana atato (300), erio akaba ise bw’abana bande, abamura na abaiseke.
ⅩⅩⅢ Ase oboamo, Enoku akamenya nemiaka amagana atato, na emerongo etano nomo, ne etano (365),
ⅩⅩⅣ akaba ogotaara amo na Nyasae. Erio tachikororekana naende, ekiagera Nyasae nigo amoirete.
ⅩⅩⅤ Ekero Metusela amenyire emiaka rigana erimo, na emerongo etano na etato, na etano na ebere (187), akaibora Lameki.
ⅩⅩⅥ Magega y’okoiborwa kwa Lameki, Metusela nigo amenyete emiaka amagana atano na abere, na emerongo etano na etato, na ebere, (782), akaba ise bw’abana bande, abamura na abaiseke.
ⅩⅩⅦ Ase oboamo, Metusela nigo akoorete emiaka amagana kianda, na emerongo etano nomo, na kianda (969), erio agakwa.
ⅩⅩⅧ Ekero Lameki amenyire emiaka rigana erimo na emerongo etano na etato, na ebere (182), akaba ise omwana omomura,
ⅩⅩⅨ akamoroka Nuhu agateeba: “Oyo nere oratoremie intwe ase emeremo yaito, na obokong’u bwaito, ase riroba eri Omonene aragereretie.”
ⅩⅩⅩ Magega y’okoiborwa kwa Nuhu, Lameki akamenya emiaka amagana atano, na emerongo kianda, na etano (595), akaba ise bw’abana bande, abamura na abaiseke.
ⅩⅩⅪ Ase oboamo, Lameki akamenya emiaka amagana atano na abere, na emerongo etano na ebere, na etano na ebere (777), erio agakwa.
ⅩⅩⅫ Ekero Nuhu amenyire emiaka amagana atano (500), akaba ise bw’abana abamura, nabwo Shemu, na Hamu, na Yafeti.