RIRUUBE RIA KABERE RIA PAULO OMOTOMWA ASE
ABATESALONIKI
Ogochaakera
Omochando igoro yokoirana gwa Kristo eriakabere nigo ogendererete korenta obotutukanu ase ekanisa ya’batesaloniki, erio Paulo omotomwa akabariikera riruube riaye riakabere kobamanyia buna rituko riokoirana kwo’monene tiriraika. Ase riruube riaye nigo akobamanyia buna magega Omonene atarairana obobe mboike ekerengo inse yoborai bw’oria omobe (2:3) oria okoamererania na Kristo.
Omotomwa Paulo nigo akobeka abatesaloniki chinguru na kobatebia batenene bokong’u ase okwegena ime yemechando, na goetania onsi bagenderere gokora emeremo yabo ya kera rituko erio benyorere endagera.
Okobagwa kw’egetabu eke
Ogochaakera 1:1-2
Ogotogia na okoorokia obuya 1:3-12
Ogotebereria igoro y’ogocha gwa Kristo 2:1-17
Ogokuurerwa gw’okoba norogendo rogwenerete Abakristo 3:1-15
Ogokoorera 3:16-18
Ⅰ
Ⅰ Korwa ase Paulo amo na Silivano na Timotheo gochia ase abanto b’ekanisa y’Atesaloniki, abamore ase Nyasae Tata oito n’Omonene oito Yeso Kristo:
Ⅱ Obuya bobe ase more na omorembe bikorwa ase Nyasae Tata oito, na ase Omonene Yeso Kristo.
Ekiina ase ekero ki’ogocha gwa Kristo
Ⅲ Abaminto, netogwenerete komoakera Nyasae ng’a mbuya mono botambe ase engencho yaino, buna ere boronge, ekiagera okwegena kwaino gwakiinire mono, na obwanchani bwa kera oyomo oino ase oyonde nigo bogendererete komentekana.
Ⅳ Ase ayio, na intwe abanyene nigo togwetogia ase engencho yaino ase chikanisa chia Nyasae, ase engencho y’oboremereria bwaino, na okwegena more nakwo ase ogochandwa kwaino gwonsi, na emechando eye moremereretie.
Ⅴ Eke nakio ekiorokererio, ng’a ekiina kia Nyasae mboronge kere. Erio mobarwe koba abamwagweneire oborwoti bwa Nyasae, ekiagera ase engencho y’obwo mwachandirwe.
Ⅵ Naki Nyasae ororire boronge kobaakana emechando baria bakobachanda inwe,
Ⅶ na kobaa inwe abamwachandirwe ogotimokigwa amo naintwe. Aya nigo arakoreke ekero Omonene Yeso agocha koorokigwa korwa igoro amo nabamalaika n’okobua kwaye ase ekebemberi ki’omorero,
Ⅷ na kobaakana egesiomba abwo batamomanyeti Nyasae, na bataigwereti enchiri y’Omonene oito Yeso.
Ⅸ Barabwo nabanyore egesusuro ki’ogosareka, naende nabaatananwe korwa ase obosio bw’Omonene kare na kare, na korwa ase obonene bw’okobua kwaye,
Ⅹ ekero arache ase rituko riria, erinde atogigwe ase egati y’abachenu baye, na gokumigwa ase egati ya bonsi abamwegenire, ekiagera mwegenire oborori bwaito obo twabarenteire.
Ⅺ Ase ayio, nigo tokobasabera botambe, erio Nyasae oito ababare ng’a mwagweneire okorangeria kwaye. Ere aikeranie kera okogania kw’obuya, na kera emeremo y’okwegena, ase okobua kwaye,
Ⅻ erinde erieta ri’Omonene oito Yeso ritogigwe ime yaino, na inwe ime yaye, koreng’ana nobuya bwa Nyasae oito, na Omonene Yeso Kristo.