Ⅹ
Ⅰ Naki ayare ime y’amachiiko nekiriri gioka ki’amang’ana agochi‐gocha, gose tari ekieni ekenyene. Ase ayio, ebing’wanso biria biria biare koruegwa kera omwaka botambe tibiarenge konyara kobaikerania abwo baare kobirua.
Ⅱ Onye mbianyarete, Inee, anga tibiatigetwe, tibikoruegwa? Naki onye abwo baare kobirua bakoorire gochenwa ara rimo, anga tibare kwerora ng’a mbare nebibe naende.
Ⅲ Korende ebing’wanso ebio nigo bikobainyoria igoro y’ebibe kera omwaka.
Ⅳ Naki amanyinga e chieeri na aye chimbori takonyara korusia ebibe.
Ⅴ Ase ayio, Kristo kagosoa ase ense nigo agoteeba,
“Ebing’wanso na ebiruegwa tikwabiganetie,
korende omobere kwandoiseirie.
Ⅵ Ase ebing’wanso bi’ogosambwa, na ebing’wanso bi’ebibe,
tikwagogetigwe nabirobio.
Ⅶ Erio ngakwana: Nachire gokora ogwancha kwao, Nyasae,
buna eriikire igoro yane ase egetabu.”
Ⅷ Agwo ritang’ani nigo agoteeba, “Ebing’wanso, na ebirugwa, na ebing’wanso bi’ogosambwa, na ebing’wanso bi’ebibe tikwabiganetie, gose tikwagogetigwe nabirobio”, nonya birobio biare korentwa buna amachiiko are goteeba.
Ⅸ Erio akabora, “Rora, nachire gokora ogwancha kwao.” Igo akarusia ebie ritang’ani, erinde abeeke egia kabere.
Ⅹ Ase ogwancha okwo twanyorire ogochenwa ase okoruegwa kw’omobere o Yeso Kristo ara rimo rioka.
Ⅺ Kera Omokuani nigo are gotenena rituko ase rituko ase obokoreri bwaye na korua ebing’wanso biria, na birobio tibiare konyara korusia ebibe nonya ng’ake.
Ⅻ Korende ekero Kristo aruete ekeng’wanso ekemo gioka ase ebibe kerabe goika kare na kare, nigo aikaransete ensemo y’okoboko gw’okorio kwa Nyasae.
ⅩⅢ Erio oganyete goika ababisa baye babekwe inse y’amagoro aye.
ⅩⅣ Naki ase okoruegwa okomo obaikeranirie ase amatuko onsi abwo bachenirwe.
ⅩⅤ Naki Omoika Omochenu noro otobereire kirori. Naki ritang’ani nigo agoteeba iga:
ⅩⅥ “Oko nakwo okobwatana ndache kobwatana nabarabwo
magega y’amatuko ayio, Omonene oteebire:
Nimbeke amachiiko aane ase chinkoro chiabo ime,
ninyarike ase ebirengererio biabo.”
ⅩⅦ Naende nigo agoteeba,
“Ebibe biabo, na ogosaria kwabo tinkobiinyora naende nonya ng’ake.”
ⅩⅧ Gaki, okorusigwa kw’ebibe gokorabeo, rirorio ekerugwa ase engencho y’ebibe tigekobao naende.
Tiga toike ang’e na kobwata okoorokia gwaito
ⅩⅨ Ase ayio, baminto, ntore noboremu bw’ogosoa Aase Aachenu goetera ase amanyinga a Yeso,
ⅩⅩ ase enchera enyia ere moyo, eye atoigorerete, egoetera ase etoto, engencho yaye omobere oye.
ⅩⅪ Naende ntore n’Omokuani Omonene igoro y’enyomba ya Nyasae.
ⅩⅫ Ase ayio, toike ang’e ne chinkoro chire nekeene, tobe nobomaene oboikeranu ase okwegena, ne chinkoro chiaito chianyororokerigwe oborabu, tichigotogambia, twasibiigwe ase emebere yaito namaache amaya.
ⅩⅩⅢ Tiga tobwate mono okoorokia kw’ogosemeria gwaito, totari konyegerigwa; ekiagera ere oyoriete eira nomwegenwa.
ⅩⅩⅣ Naende twechanderane intwe ase intwe, na kobeekana chinguru ase obwanchani, na ase ogokora okuya.
ⅩⅩⅤ Titotiga gosangererekana amo, buna engencho y’abande ere, korende toremanie intwe ase intwe, kobua mono ekiagera morooche ng’a Rituko riria riaikire ang’e.
ⅩⅩⅥ Naki onye togokora ebibe moeneno magega gotwaikire komanya ekeene, keng’wanso kende tikeri ase engencho y’ebibe.
ⅩⅩⅦ Korende eke totigaretie nobwoba bw’okoganya ekiina, na omorero omotindi ogwoka, ogocha gosiria abwo bakoengereria.
ⅩⅩⅧ Omonto oyorenge gochaaya amachiiko a Musa nigo arenge goitwa okwa, atari konyora amaabera, ase okoberwa kirori nabaanto babere gose batato.
ⅩⅩⅨ Inee! Naki morooche? Omonto oria otanchete Omwana o Nyasae, na kobara amanyinga y’okobwatana, achenetwe naro, koba egento kia bosa, oria okoreire Omoika bw’amaabera obogeechi, tiyamogwenerete ere anyore egesusuro ekenene kobua?
ⅩⅩⅩ Naki ntomanyete ere oyokwanete, “Egesiomba nekiane, inche ning’akane,” naende, “Omonene nere oragambie abanto baye.”
ⅩⅩⅪ Okogwa ase amaboko a Nyasae ore moyo, eri nering’ana ri’okoondokia.
ⅩⅩⅫ Korende moinyore amatuko e ritang’ani, magega komwabarerigwe omobaso igo mwaremereretie okoamererania okonene kw’ogochandwa.
ⅩⅩⅩⅢ Engaki ende mokarorerigwa ase okoramwa na ogochandwa maiso marore, na engaki ende mokabwatana nabwo bakoreretwe ayio.
ⅩⅩⅩⅣ Naki mwabarorerete amaabera baria barenge ase ebisibo, mogancha nomogooko kourwa chinibo chiaino, ekiagera mwamanyete ng’a inwe abanyene more nenibo eyere engiya kobua, erabeo kare na kare.
ⅩⅩⅩⅤ Ase ayio, timotuguta oboremu bwaino, ekiagera mbore neng’eria enene.
ⅩⅩⅩⅥ Naki iigo ebagwenerete mobe noboremereria, erinde komwaikire gokora ogwancha kwa Nyasae monyore aya mwarieretwe eira.
ⅩⅩⅩⅦ “Naki nkere ekero egeke mono,
ere oyore gocha nachiche, gose tagotebana gocha,
ⅩⅩⅩⅧ korende omonyene oboronge one nabe moyo ase okwegena,
na, karasukwane, omoyo one tokogokigwa nere.”
ⅩⅩⅩⅨ Korende intwe titori ase abwo bagosukwana na gosira, korende ase abwo bare nokwegena ase okoegera emioyo yaito.