Ⅷ
Omokuani Omonene bw’okobwatana okoyia na okuya kobua
Ⅰ Gaki, ring’ana rinene ri’ayio togokwana nario eri: Ntore n’Omokuani Omonene buna iga, oikaransete ensemo ya borio y’ekerogo ki’Obonene aria igoro,
Ⅱ omokoreri bw’aase aachenu na obw’Eema y’ekeene, eye Omonene aagachete, gose tari Mwanyabaanto.
Ⅲ Naki kera Omokuani omonene nigo are kobekwa ase okorua ebiegwa na ebing’wanso. Ase ayio yamogwenerete Omokuani oyo boigo abe negento akorua.
Ⅳ Onye nabeete ase ense, anga tabeti Omokuani, ekiagera mbareo abare korua ebiegwa buna amachiiko achigete.
Ⅴ Abwo baare gokorera ayare omogwekano bw’amang’ana are igoro, na ekiriri ki’ayio. Naki ekero Musa arenge koroisia Eema eria, Nyasae akamoteebia, “Rigereria, okore ebinto bionsi ase omogwekano bw’oria kworogetigwe ase egetunwa.”
Ⅵ Korende bono Kristo onyorire obokuani bore obuya kobua, koreng’ana buna ere are omobwatania bw’okobwatana okuya kobua, okwo kwagachetwe ase chiira chingiya kobua.
Ⅶ Naki onye okobwatana koria kw’eritang’ani kwarenge tikori na komocha, anga ribaga tiriarigetigwe ase koria gwa kabere.
Ⅷ Naki Nyasae nigo akonyora okomocha ime yabo ekero agoteeba
“Omonene oteebire iga: Rora, amatuko ngocha are
ekero ndakorere abanto b’enyomba ya Israeli
na ab’enyomba ya Yuda okobwatana okoyia.
Ⅸ Okobwatana oko tigokoba buna koria nakorete ne chisokoro chiabo,
ase rituko riria nababwatete amaboko abo
ase okobarusia korwa ase ense ya Misiri.
Ekiagera tibagendererete ase okobwatana kwane,
inche tinabechanderete, Omonene oteebire.
Ⅹ Naende Omonene nigo agoteeba iga:
Oko nakwo okobwatana ndakore n’Abaisraeli
magega y’amatuko aria:
Nimbeke amachiiko aane ase ebirengererio biabo,
ninyarike ase chinkoro chiabo ime;
inche nimbe Nyasae obo,
na barabwo mbabe abanto baane.
Ⅺ Barabwo tibakworokererania kera omonto nomogisangio oye,
gose kera omonto noyomwabo, ogoteeba: Momanye omonene,
ekiagera bonsi pi mbamanye inche,
korwa omoke mono goika omonene mono.
Ⅻ Naki nimbaabere obobe bwabo, na ebibe biabo tinkobiinyora naende.”
ⅩⅢ Ase ogokwana igoro y’okobwatana okoyia nigo akorire koria kw’eritang’ani kobe ogokoro, na koria kwabeire ogokoro na kogota, ng’ang’e kore gosira.