EGETABU KIA
HAGAI
Ogochaakera
Buna togotebigwa ase omochakano bw’egetabu eke, Hagai nigo arandetie gochakera omwaka okabere bw’okogamba gwa Dario omorwoti o Persia, ase omwaka 520 nyuma Yeso ataraiborwa, ase emiaka 20 nyuma y’Abayahudi abwo barenge obosomba aria Babiloni gwancherwa n’Omorwoti o Persia koirana sobo. Ekeombe ki’eritangani ki’Abaisraeli nigo kiairanete sobo gochakera omwaka 538 nyuma Yeso ataraiborwa. Nyuma y’Abayahudi koirana sobo, nigo bachagete emeroberio y’okoagacha oboyia Hekalu eyio yasaretigwe n’Ababuloni ase omwaka 587 nyuma Yeso ataraiborwa. Korende barabwo konya bakuure omoyo nakio gekogera omobani akobabeka omoyo bagenderere koagacha. Nigo akobarareria buna Hekalu enyia nigo erabe engiya mono goetenia eria entang’ani (2:1-9) na buna okoagacha kwaye ngokore obokayayu n’obotaka obwo bwanyorete abanto ba Nyasae (2:10-20).
Hagai nigo abegete abanto omoyo ase amang’ana aye, ayio ababegete chinguru abanto b’engaki yaye babe n’omokia na gokora emeremo bare n’ogosemeria ase amang’ana amayia ayio Nyasae abaariganeirie.
Okobagwa kw’egetabu eke
Omonene ogochika Hekalu eagachwe naende 1:1-15
Amang’ana ’oboremia na ay’ogosemeria 2:1-23
Ⅰ
Omonene ogochika Hekalu eagachwe naende
Ⅰ Ase rituko rie ritang’ani, omotienyi o gatano na rimo, omwaka o kabere, ekero Dario arenge omorwoti, ring’ana ri’Omonene rigatomwa goetera ase Hagai omobani, rigacha ase Serubabeli mosinto o Sealitieli, oyorenge omogabana bw’Abayuda, na ase Yoshua Omokuani omonene, mosinto o Yehosadaki.
Ⅱ Aya naro Omonene bw’Emeganda agoteeba: “Abanto aba nigo bagokwana ng’a engaki teraika ekero enyomba y’Omonene egwenerete koagachwa naende.”
Ⅲ Erio ring’ana ri’Omonene rigacha goetera ase Hagai omobani, rikaboria:
Ⅳ “Inee! Eye nero engaki inwe mogwenerete komenya ase chinyomba chinyasi chiabo chitubire ne chibao chingiya, ekero enyomba eye egendererete koba ritombe?”
Ⅴ Ase ayio bono, aya naro Omonene bw’Emeganda agoteeba: “Inwe rengereria buna chinchera chiaino chiabeire.
Ⅵ Nigo mokobusura chimbusuro chinyinge, korende mwagesa chinke; nigo mokoragera, korende timori koigota; nkonywa more, korende timori goisaneka; nigo mokobeeka chianga, korende timori koigwa riberera; oyo okonyora eng’eria, nigo akoyenyora erinde oyebeka ase omobuko obochogete.
Ⅶ Ase ayio, aya naro Omonene bw’Emeganda agoteeba: Rengereria buna amang’ana aino abeire.
Ⅷ Tiira gochia ase ebitunwa igoro, morente emete moagachere enyomba eye, erio nario ndagokigwe nero, naende inyeorokie ng’a inche ninde nobonene.” Nabo Omonene atebiire.
Ⅸ “Nigo mwasemeretie monyore ebinge, korende mokanyora ebike; na ekero mwabirentete inka, nkabirurukia bikagenda. Inche Omonene bw’Emeganda nigo nkobaboria: Nase ki yabeete bo? Nekiagera enyomba yane yatigirwe egendererete koba ritombe, na kera oyomo oino nigo echanderete enyomba yaye omonyene.
Ⅹ Ase engencho eyio, riime rikorwa igoro riatangirwe na ense tekwama endagera.
Ⅺ Narentire eguru‐gura ase ense, na ase ebitunwa, na ase endagera, na ase emesabibu, na ase emezeituni, na ase kende gionsi kegokina ase riroba. Boigo nayerentire ase abanto, na ase emeremo yonsi abanto bagokora.”
Abanto bakoigwera ay’Omonene achigete
Ⅻ Erio Serubabeli, mosinto o Sealitieli, na Yoshua Omokuani omonene, mosinto o Yehosadaki, amo nabatigari bonsi b’abaanto bakaigwera eriogi ri’Omonene, Nyasae obo, na amang’ana ’omobani Hagai, oyio Omonene, Nyasae obo, atomete; abanto bakaba bakomoiroka Omonene.
ⅩⅢ Erio Hagai, omotomwa bw’ Omonene, agakwana nabaanto amang’ana ’Omonene, akabateebia, “Omonene nigo agoteeba iga: Inche nigo inde amo nainwe.”
ⅩⅣ Erio Omonene agasukia omoika o Serubabeli mosinto o Sealitieli, oyorenge omogabana bw’Abayuda, na oyo o Yoshua Omokuani omonene, mosinto o Yehosadaki, na oyo bw’abatigari bonsi b’abaanto. Bonsi amo bagacha bagakora emeremo ase enyomba y’Omonene bw’Emeganda, Nyasae obo.
ⅩⅤ Ayio nigo akorekanete ase rituko ri’emerongo ebere na kane, omotienyi o gatano na rimo, omwaka o kabere bw’okogamba kw’omorwoti Dario.