EGETABU KIA
HABAKUKI
Ogochaakera
Nigo ekageire buna Habakuki nigo akorete emeremo yaye y’obobani ase ense ya Yuda ase emiaka 600 nyuma Yeso ataraiborwa. Eye nigo yarenge engaki y’okogamba kwa Yehoyakini. Ase chingaki echio oborwoti bwa Babiloni nabwo bwarenge oborwoti bw’echinguru mono aria moocha ya gati, oborwoti obo nigo bwarwanetie amarwoti ande nakoyabua nakoira chinibo chiabo, obomo bw’amarwoti ayio mboria bwa Yuda. Habakuki akaamereria ring’ana erio ri’egesaku eke ekebe ki’ebibe kororeria keria egeke. Akaboria iga ase 1:13 nase ki (Nyasae) ogokira ekero ababe bagosiria abanto. Okoiraneria kwa Nyasae nkoria nga ere nakore egento ase chingaki chiaye na goika engaki eyio: abeimokereria igoro mbasirigwe; korende abanyaboronge mbabe moyo ase okomwegena Nyasae (2:4).
Ensemo y’omoerio y’egetabu eke nigo ere ey’amasabo, nase ogosaba okwo omobani nigo agokwanera igoro y’obonene bwa Nyasae, boigo obeka chinguru mono ring’ana ri’okoba n’okwegena ase Nyasae.
Okobagwa kw’egetabu eke
Habakuki okwemurunganeri’Omonene, n’Omonene okomoiraneria 1:1—2:4
Abatari abanyaboronge bakonacherwa ekiina 2:5-20
Ogosaba kwa Habakuki 3:1-19
Ⅰ
Ⅰ Aya naro amang’ana amakong’u omobani Habakuki aroche ase okorora.
Habakuki okorera, ekiagera oboronge tiboiyo
Ⅱ Aye Omonene, ngoika ririri ndabe nkorera ng’a onkonye, naye tori konyigwa? Gose ngoika ririri ndabe ngokorangeria ase engencho y’obotindi, naye tori gontooria?
Ⅲ Naki gwantigire narorire amabe buna aya? Naki ondigereretie ing’etananire nemechando? Ogosirigwa na ogokorerwa bobe nigo bire ase obosio bwane; amariomana na ogotaigwana nigo bireo.
Ⅳ Ase engencho eyio amachiiko tari ne chinguru, na oboronge tibori gokorwa. Abakori amabe nigo baetanaine abanyaboronge, na ebiina nigo bikonachwa bobe.
Omonene okoiraneria Habakuki
Ⅴ “Rigereria morore ayare ase egati y’abanto b’ebisaku, mokumie na goichanigwa. Ngochia gokora inde ring’ana ase amatuko aino, eri motegene moise koriteebigwa.
Ⅵ Naama! Nindete Abakalidayo, egesaku keria kere egetindi, naende kere ne chinkoro chigwoka, kegoeta ase chinse chionsi kemenye ase obomenyo botari obwabo.
Ⅶ Barabwo nabaanto bakoondokia na kwoboyia; oboronge bwabo na okobua kwabo nigo bikorwa ase barabwo abanyene.
Ⅷ “Chibarasi chiabo nigo chikominyoka bwango kobua chingo, nigo chire chintindi kobua chisese chi’orosana chigotwara mogoroba; abariini babo be chibarasi nigo bagochararacharara. Ee, abariini babo be chibarasi nigo bakorwa aare, nigo bakoiruruka buna ekeongo kegochia kobwata eke gekoria.
Ⅸ “Abanto abwo bonsi nigo bagocha gokora ay’obotindi. Nigo bakorigereria gochia bosio bare nomokia buna omwaga okorwa moocha; nigo bagosangereria abasibwa abange buna omokenye.
Ⅹ Nigo bagochecheria abarwoti, na gosekerera abagaambi. Nigo bagochaaya kera eburi enkong’u, baagacha chiburi chiabo, babua bachiira.
Ⅺ Erio baeta bwango buna omwaga, bagenderera gochia bosio; abanto abwo bare abamochi, ne chinguru chiabo nachio enyasae yabo.”
Habakuki okorera ase Omonene naende
Ⅻ Aye Omonene, Nyasae one, Omochenu one, tari aye oreo korwa kare na kare? Ase ayio titogokwa. Aye Omonene, egetare giaito, aye kwabachikiire batogambie ekiina, kwababekire batoe egesusuro ki’ogotorongeyia.
ⅩⅢ Aye ore namaiso amaachenu mono atari korigereria amabe na aya atari ay’oboronge, naki orakore oremererie korora abanto batari abegenwa, na okire‐kiri ekero abakori amabe bagosiria abare abanyaboronge kobabua?
ⅩⅣ Aye gwakorire abanto babe buna chinswe chi’enyancha, na buna ebitongwa bikwagura bitabwati omogambi obo.
ⅩⅤ Barabwo nigo bakobabwata nebigobanio biabo baabakurura nekeonga kiabo na kobasangereria ase ekeonga kiabo bakorubera; erio bagoka na gochenga.
ⅩⅥ Ase ayio nigo bakorua ebing’wanso ase ekeonga kiabo na kogesambera ubani, ekiagera ebinto ebio nabio bikobanyorera ebinoru na endagera enyinge.
ⅩⅦ Inee! Abwo nigo bagochia konakorusia abanto b’ebisaku ase ekeonga kiabo baabasirie batari namaabera?