Ⅺ
Obwanchani bwa Nyasae ase abanto baye abasaria
Ⅰ “Ekero Israeli arenge omwana, nigo namwanchete,
na korwa Misiri nkarangeria omwana one.
Ⅱ Buna bagendererete korangerigwa,
nabo bagendererete kona‐kwerusanania.
Nigo babete bakorua ebing’wanso ase chinyasae Baali,
na bagasamba ubani ase emegwekano baarenge gosasiima.
Ⅲ Ninche norokereretie Abaefraimu gotaara,
nkababogoria namaboko aane,
korende abanto abwo tibamanyete ng’a nigo naganetie kobagwenia.
Ⅳ Nigo nabang’usete ne chingori chinyororo,
ee, ne chingori chi’obwanchani.
Nigo nororobetie rikorogoto igoro ye chinsea chiabo,
ngekumba gochia inse nkabarageria.
Ⅴ “Barabwo mbairane gochia ase ense ya Misiri, na Abaasuri mbaabagambere, ekiagera bangire koirana gocha ase ’nde.
Ⅵ Omoro nogwere emechie yabo nobotindi, nosarie emekorogoto y’ebiita biabo na gosaria kende gionsi ase engencho y’emeroberio yabo abanyene.
Ⅶ Abanto baane nigo banchete gontiga, nonya bakorangerigwa gochia ase Oyore Igoro Mono, onde tari okomotogia, nonya noyomo.
Ⅷ “Inwe Abaefraimu, naki ndakore mbatige?
Inwe Abaisraeli, naki ndakore mbatige morue asende?
Naki ndakore mbatige buna natigete Adima?
Naki ndakore mbakorere buna nakorerete Seboimu?
Enkoro yane nigo egwoka,
na amaabera aane onsi abokire ime yane.
Ⅸ Tinkobaa egesusuro konde nendamwamu egwoka,
gose tingosiria Abaefraimu naende,
ekiagera inche nigo ’nde Nyasae, tindi Mwanyabaanto.
Inche nigo inde Omochenu imenyete ase egati yaino,
na tingocha ase more inde nekeririanda.
Ⅹ “Abanto abwo mbabwatie Omonene; ere narume buna endo, ee, narume, na abanto baye mbache korwa bosongo bakoiguswa.
Ⅺ Mbairuruke buna chinyoni korwa Misiri, bache bakoiguswa, na buna amaruma korwa ase ense y’Asuri. Nimbabeeke bamenye ase chinka chiabo.” Nabo Omonene ateebire.
Abaisraeli amo Abayuda bakogaambigwa
Ⅻ Abaefraimu nigo bang’etananire n’amang’ana ’oborimo, na Abaisraeli boigo n’amang’ana ’obong’ainereria; n’Abayuda nigo bagendererete gosaria ase Nyasae, oria ore Omochenu na Omwegenwa.