ⅩⅩⅥ
Nyasae nae abanto baye obobui
Ⅰ Ase rituko erio ogoteera oko ngoterwe ase ense y’Abayuda;
“Intwe nigo tomenyete ase omochie omokong’u.
Omonene otoeire ogotooreka kobe chindwaki ne chiburi chiaito.
Ⅱ Igora ebiita bi’omochie oyio,
erinde egesaku kere noboronge na obwegenwa kenyare gosoa imeo.
Ⅲ Omonto ore nebirengererio ebironge asore,
aye Omonene nigo okomoa omorembe omoikeranu,
ekiagera agosemeretie.
Ⅳ Mosemerie Omonene botambe, ekiagera Omonene nere egetare gia kare na kare.
Ⅴ Ere okeeirie abanto abwo beimokereretie igoro,
otagoire omochie oria ochongororogete gochia igoro,
oyoiyeirie inse kegima,
ee, oyoiyeirie inse ase riroba.
Ⅵ Amagoro ’abaanto abataka nayotiringere inse,
na ay’abaremerwa nayotache.”
Ⅶ Enchera y’abanyene oboronge nenteremu;
naye okoyekora yaba enteremu.
Ⅷ Aye Omonene, intwe nigo tokoganyete kogocha konacha ebiina biao;
okona‐koinyora erieta riao nakwo kore okogania kw’emioyo yaito.
Ⅸ Omoyo one nigo ogokogania ase obotuko,
omoika ore ime yane nigo ogokorigia kobogokiamoka.
Ekero orarente ebiina biao igoro ase ense,
abanto bamenyeteo nigo bakweorokereria oboronge.
Ⅹ Omokori amabe naisa gwanchererigwa,
takweorokereria oboronge;
ekero are ase ense egokora oboronge nigo arakore ay’obokorekanu,
takorora obonene bw’Omonene.
Ⅺ Aye Omonene kwaramboire okoboko kwao,
korende barabwo tibagokorora.
Tiga barore risemi obwate ase abanto bao, erinde basooke;
omorero osambete ababisa bao, tiga obasambe nabarabwo.
Ⅻ Aye Omonene, notorentere omorembe,
ekiagera emeremo twabeire togokora, naye kwabeire gokoyetokorera.
ⅩⅢ Aye Omonene, Nyasae oito, abanene bande babeire bagotogaambera,
korende erieta riao rioka nario tomanyete.
ⅩⅣ Barabwo bakuure, tibakoba moyo naende,
babeire amarengari, tibakoboka;
ase ayio kwabaeire egesusuro na kobasiria,
kwabasiririe, tibakoinyorwa nonya ng’ake.
ⅩⅤ Aye Omonene, gwakorire egesaku eke kementekane;
ee, gwakementekanirie;
ase ayio aye gwatogigwe,
kwagareeirie ense y’egesaku eke.
ⅩⅥ Aye Omonene, ekero baarenge nemechando nigo bakorigetie,
ekero kwabaete egesusuro,
nigo bagosabeete mono.
ⅩⅦ Aye Omonene,
nigo twabeete asore buna omokungu ore morito,
okobina aibore,
ekero engaki yaye yaikire, nigo akoromwa nobororo.
ⅩⅧ Intwe twabeire tore barito,
twabeire tokobina na kweganchorana,
korende ekero twaiborete tokaibora embeo bosa.
Titorenteti ogotooreka konde ase ense,
gose abanto tibaiboretwe ase ense.
ⅩⅨ Abanto baino bakwete mbabe moyo naende;
emebere y’abakwete neboke.
Inwe abwo moraire ase amaroba ime,
boka, motere nomogooko!
Riime riao nigo rire eri’oborabu;
riroba ndibairanie abakwete.
Ekiina na ogokorwa oboyia
ⅩⅩ Inwe abanto baane, inchwo mosoe ase chiero chiaino mwesiekere aroro; mwebise aroro ase engaki enke, goika endamwamu eyio ebe yaetire.
ⅩⅪ Rora, Omonene ngosoka are korwa aase aye, ae abanto bamenyete ase ense egesusuro ase engencho y’ebibe biabo. Okomocha kw’ogoiterwa kw’amanyinga ase ense nkobe maiso marore, na ense tekogenderera kobisa abanto abwo baitetwe.