ⅩⅩⅩⅧ
Oborwaire bw’omorwoti Hezekia na okogwenigwa kwaye
(2 Abar 20:1-11; 2 Amg 32:24-26)
Ⅰ Ase amatuko aria Hezekia akarwara, akaba ang’e nogokwa. Isaya omobani, mosinto bw’Amosi, agacha asare, akamoteebia, “Aya nar’Omonene agoteeba: Ebeke ang’e, amo nenyomba yao, ekiagera aye goika okwe, tokogwena.”
Ⅱ Hezekia akaonchora obosio bwaye gochia ase enyasi, agasaba Omonene,
Ⅲ akabora, “bono Omonene nagosoroire, inyora buna nabeire ngokobwatia ase obwegenwa, na ase enkoro yane yonsi, naende nakorire ayare amaronge ase obosio bwao.” Erio. Hezekia akarera nobororo.
Ⅳ Erio ring’ana ri’Omonene rigacha ase Isaya, rikamoteebia,
Ⅴ “Irana oteebie Hezekia ng’a inche Omonene, Nyasae o Daudi sokoro yaye, nigo ngoteeba iga: Naigure ogosaba kwao, narorire amariga ao. Rora, nakomentire emiaka ikomi na etano ase obogima bwao.
Ⅵ Ningotoorie aye amo nomochie oyo, korwa ase okoboko kw’omorwoti bw’Abaasuri; ning’egere omochie oyo.
Ⅶ “Eke nakio ekemanyererio asore korwa ase Omonene, ng’a naikeranie amang’ana ayio atebiire:
Ⅷ Rora, ase ekerengero gie chinsa ki’Ahasi ninkore omorengari oria otambeire ekero erioba riereerire oirane gochia magega ebitambokero ikomi.” Ase ayio erioba rikairania omorengari oye ebitambokero ikomi ase ekerengero keria.
Ⅸ Magega Hezekia, omorwoti bw’Abayuda, kagwenire korwa ase oborwaire bwaye, akariika ogoteera oko:
Ⅹ Nigo narengereretie ng’a ngochia gokwa inde ase emiaka y’oboke bwane;
ningende ase ebiita bi’aase abakuure,
naurirwe emiaka yane yatigarete.
Ⅺ Ngateeba, “Tinkorora Omonene naende ase ense y’abare moyo,
gose korora monto onde bwensi ase aba bamenyete ase ense eye y’obosiru.
Ⅻ Obomenyo bwane bwatagoirwe na korusigwa ase ’nde buna eema y’omorisia,
naringire obogima bwane buna omooroisia ebitambaa akobiringa;
nabutoirwe korwa ase egekorero;
ekero botaraira, aye nigo okoeria obogima bwane.
ⅩⅢ Nigo nkorera ase obotuko bwonsi ng’a nkonywe;
Omonene obunire amauga aane buna endo ekobuna ebi yaitire;
ekero botaraira ere nigo akoeria obogima bwane.
ⅩⅣ Nigo nkorera buna egesingororo gose ebarara;
nigo nkweumia buna riruma.
Amaiso aane arosire ase okorigereria gochia igoro.
Aye Omonene, nigo inde nemechando emenene, indwanerere!”
ⅩⅤ Inki bono ngokwana?
Omonene nere okwanire nainche,
nere omonyene okorire amang’ana aya.
Ase igo nintaare inde nobokanyeku ase emiaka yane yonsi,
ase engencho y’obororo bwonsi bw’omoyo one.
ⅩⅥ Aye Omonene, ase okoba namang’ana buna ayio, abanto nigo bakoba moyo,
na obogima bw’omoika one nao bore ase ayio,
na bono ingwenie kegima na onkore imbe moyo.
ⅩⅦ Naama! Nigo narenge nobororo obonge,
na obororo obwo bokandetera omorembe.
Ase obwanchani bwao gwatooririe omoyo one korwa ase engoro y’obosareku;
gwatugutire ebibe biane bionsi gochia magega yao.
ⅩⅧ Abare aase abakuure tibagokoiraneria ng’a mbuya mono,
abwo bakuure tibakogotogia;
abwo bakogenda ase chimbeera ime tibagosemeria obwegenwa bwao.
ⅩⅨ Omonto ore moyo nere orakoiranerie ng’a mbuya mono,
buna inche ngokoiraneria ng’a mbuya mono ase rituko ria reero;
ise abana nere agokora obwegenwa bwao bwamanyekana ase abana baye.
ⅩⅩ Omonene nantoorie;
ase ayio ntobe togoteera amatera, ase okobugia amakano aane,
ase obogima bwaito bwonsi, agwo ase enyomba y’Omonene.
ⅩⅪ Bono Isaya konya oteebire iga: “Tiga baimokie ribomba ri’amako, baribeke ase rigumba ria Hezekia, erinde agwene.”
ⅩⅫ Boigo Hezekia konya oboririe iga: “Nkemanyererio ki gekonyorokia ng’a ningende ase enyomba y’Omonene?”