ⅬⅣ
Obwanchani Omonene ase Abaisraeli
Ⅰ Aye ore omogomba otaiborete, tera;
aye otana kobina ase okoibora,
aka eriogi rinene ri’ogotera kw’omochengo!
Omonene oteebire ng’a abana b’oyo otigetwe bosa
nigo bare abange kobua ab’oyo obwate omosacha.
Nab’Omonene agoteeba.
Ⅱ “Gareyia aase okobeeka eema yao;
orambore ebitambaa bi’eema yao.
Tobaisa gotiga korambora chingori na gokong’ia ebirochi!
Ⅲ Aye norande gochia ensemo y’okorio na ey’okobee,
na oroiboro rwao ndoire chinse chi’ebisaku
na gokora emechie yasaretigwe emenywe naende.
Ⅳ “Tobaisa koiroka, ekiagera togosookigwa;
toichana, ekiagera togosookigwa;
mbwebe obosooku kwarenge nabwo korwa oboke bwao,
na tokoinyora nonya ng’ake ogochaywa kw’oboboraka bwao,
Ⅴ Omotongi oo nere omosacha oo,
Omonene bw’Emeganda nario erieta riaye.
Ere oyore Omochenu bw’Abaisraeli nere Omobooria oo;
nigo akorokwa Nyasae bw’ense engima.”
Ⅵ Nyasae oo nigo agoteeba iga:
“Inche Omonene nakorangeirie aye ore buna omokungu bwangetwe,
oichaanete ase omoyo oye,
ee, nakorangeirie aye ore buna omokungu oseretigwe ekero arenge omoriakari.
Ⅶ Nigo nagotigete ase engaki enke mono,
korende ninkororere amaabera amange, nkoiranie.
Ⅷ Ekero nabeete nekeririanda ekenene,
nigo nabisete obosio bwane korwa asore ase engaki enke,
korende ase obwanchani bwa kare na kare ninkororere amaabera.”
Nab’Omonene, oyore Omobooria oo atebiire.
Ⅸ “Amang’ana aya nigo are ase ’nde buna aria abeete ekero kia Nuhu.
Nigo natianete ng’a amaache buna aria achete ekero kia Nuhu, tagocha ase ense naende;
naboigo natianire ng’a tinkogenderera koba nendamwamu asore,
gose tinkogotogonyera.
Ⅹ Nonya nebitunwa nabiisa kong’anya, na ebigoro bitengeche,
obwanchani bwane bogendererete botambe tibokorua asore,
na okobwatana kwane kw’omorembe tioboseemiagerigwa.”
Nab’Omonene, oyogokororera amaabera, agoteeba.
Yerusalemu bw’amatuko agochi‐gocha
Ⅺ Aye omochie ochandire,
aye kwabeire gokoruta‐rutwa gochia aaria na aaria nomoubera,
otari koremigwa nonde,
rora, ninkoagacha namagena ao akomeka‐meka,
nimbeeke oboroso bwao namagena e rigori rinene akorokwa safiro.
Ⅻ Ning’agache emerobiri yao namagena akorokwa agati,
na ebiita biao mbiagache namagena akorokwa sumaridi,
ne chindwaki chiao chionsi nchiagache namagena ande e rigori rinene.
ⅩⅢ “Abana bao bonsi mbabe bakworokererigwa n’Omonene,
na omorembe omonge nobe amo nabarabwo.
ⅩⅣ Goetera ase oboronge nokong’igwe;
ogokorerwa bobe tigokogoika ang’e,
ekiagera gento kende tikeri kerakoirokie;
tokoba nobwoba, ekiagera eke gekwoboyia tigekogoika ang’e.
ⅩⅤ Omonto oraseegete esegi, tari inche ndamotome;
onde bwensi oraseegete esegi asore,
nigo aragwe ekero agokorwania.
ⅩⅥ “Naama! Natongire omoturi bw’ebioma,
oyio ogoutera omorero bw’amakara
na aroisie ebirwanero buna bigwenerete koba.
Boigo natongire omosaria bw’okobisaria.
ⅩⅦ Ebirwanero biaroisigwe ase ogokorwania, tibikonyora okobua,
kera oromeme rorakoimokere kogosoera,
aye norobue ase ekiina.
Oyo noro omwando bw’abasomba baane inche Omonene,
na oboronge bwabo obokorwa ase ’nde.”
Nab’Omonene atebiire.