ⅬⅩ
Obonene bwa Sayoni ase amatuko agochi‐gocha
Ⅰ Imoka obare, ekiagera omobaso oo ochire,
na obonene bw’Omonene bwakobareire.
Ⅱ Rora, omosunte notube ense,
na omosunte ekerima notube abanto b’ebisaku,
korende aye, Omonene nakomorekere,
na obonene bwaye mbororekane igoro yao.
Ⅲ Abanto b’ebisaku mbang’uswe nomobaso oo,
na abarwoti mbache, bang’uswe namasase akobara korwa asore.
Ⅳ Imokia amaiso ao igoro, origererie chinsemo chionsi,
abanto bonsi basangererekanire amo bagocha asore.
Abamura bao mbache korwa aare
na abaiseke bao mbabogorigwe namaboko, barentwe.
Ⅴ Ekero orarore ayio nobe nomogooko, ogirigente;
enkoro yao netwoma‐twome na kogareea,
ekiagera obotenenku obore ase enyancha mbogochere,
na obw’abaanto b’ebisaku mborentwe asore.
Ⅵ Amaicho amange e chingamia amo ne chimori chiabo
narentwe asore korwa Midiani na Efa.
Abanto bonsi ba Seba mbache asore,
mbarente chitaabu na ubani, bararie ogotogigwa kw’Omonene.
Ⅶ Amaicho onsi e chitugo korwa ense ya Kedari nasangererigwe arentwe asore,
chimingichi chia Nebayoti nchigokorere;
nchichiche ase egesasiimero kiane chiruegwe, nainche nchianchere,
na igo ninkore enyomba yane y’obonene ebe nobonene goetania.
Ⅷ Mbarabi aba bagoeta buna amare agoeta igoro,
aba banga buna amaruma akoiruruka gochia ase ebiswa biabo?
Ⅸ Abanto bamenyete ase ebisinka na ase chinse chire ang’e nenyancha
mbanganye inche Omonene;
chimeeri chia Tarisisi nchibe chintang’ani
korenta abanto bao bakorwa chinse chi’aare;
mbarentane chifeta ne chitaabu chie chinse echio.
Ebinto ebio nigo biraarentwe ase ogotogia erieta ri’Omonene, Nyasae oo,
ere ore Omochenu bw’Abaisraeli,
ekiagera okoeire obonene.
Ⅹ Abanto b’ebisaku ebiaao mbaagache chindwaki chiao,
na abarwoti babo mbabe bakogokorera.
Ekero narenge nendamwamu, nigo nakorenterete amaakwa,
korende ase obwanchani bwane nakororeire amaabera.
Ⅺ Omobaso na obotuko ebiita biao
mbibe biigoire botambe, tibigosiekwa,
na abanto mbabe bagokorentera obotenenku bw’ebisaku,
na abarwoti babo babe bakobatang’ana.
Ⅻ Abanto b’ebisaku na ab’amarwoti abaraange kogokorera mbasirigwe,
ee, abanto abwo nigo barasirigwe kegima.
ⅩⅢ Obonene bwa Lebanoni mborentwe bobe obwao,
emetarakwa na emeuru, na emebunduki,
nerentwe gochabera aase Obomenyo bwane Obochenu bore,
na inche ninkore aase amagoro aane agotenena abe nobonene.
ⅩⅣ Abana b’abwo bagokorerete bobe,
mbache asore bagotung’amere na koumama.
Abwo bonsi bagochayete mbatung’ame ase amagoro ao;
mbakoroke Omochie bw’Omonene,
Sayoni bw’Oyore Omochenu bw’Abaisraeli.
ⅩⅤ Aye nigo kwarenge omochie otigetwe na kogechwa,
monto onde tarenge goeta ime yao,
korende bono ningokore obe nobonene goika kare na kare,
na aye nobe omochie oraarente omogooko ekiaare ase ekiaare.
ⅩⅥ Aye nogonke amabeere ’abaanto b’ebisaku,
nogonke korwa ase ebikuba bi’abarwoti;
aye nomanye ng’a inche Omonene, ninche Omotooria oo,
ninche Omobooria oo, Omobui o Yakobo.
ⅩⅦ Ninkorentere chitaabu ribaga rie chitaai,
ne chifeta ribaga ri’ebioma,
ne chitaai ribaga rie chibao,
na ebioma ribaga ri’amagena.
Ninkore abateneneri bao babe ab’omorembe,
na abwo bagokogaambera babe bakogokorera ay’oboronge.
ⅩⅧ Amang’ana ’obotindi takoigugwa ase ense yao,
gose ay’ogosaria na ogosiria ase chimbebe chiao ime.
Nigo oraroke chindwaki chiao “Ogotooreka”,
na ebiita biao “Ogotogigwa.”
ⅩⅨ “Erioba tirigokobareria omobaso ase engaki y’omobaso,
gose omotienyi togokoa oborabu ase obotuko,
korende Omonene nere orabe omobaso oo o kare na kare;
na Nyasae oo nabe obonene bwao bokomeka‐meka.
ⅩⅩ Erioba riao tirikorimera nonya ng’ake,
gose omotienyi oo togosira,
ekiagera Omonene nere orabe omobaso oo o kare na kare,
na amatuko ao ay’omoichano naere.
ⅩⅪ Abanto bao bonsi mbabe abanyene oboronge,
mbaire ense ebe eyabo kare na kare;
barabwo nigo barabe ekemeri kiane nasimegete,
emeremo y’amaboko aane,
erio inche ntogigwe.
ⅩⅫ Oyore omoke nabuche abe chilifu,
na oyo otari na nguru nabe egesaku kere nokobua.
Inche ninche Omonene;
ekero engaki yane eraike ning’ayererie ayio.”