ⅬⅫ
Ⅰ Ase engencho ya Sayoni tinkonyara gokira,
na ase engencho ya Yerusalemu tingotimoka,
goika oboronge bwaye bororekane buna okobara kwe risase,
na ogotooreka kwaye kororekane kore buna ekemore kegwoka.
Ⅱ Abanto b’ebisaku mbarore oboronge bwao,
na abarwoti bonsi barore obonene bwao;
erio aye orokwe erieta riyia,
rirarue ase omonwa bw’Omonene.
Ⅲ Aye nobe egutwa enseera y’obonene ere ase okoboko kw’Omonene,
na esombe y’omogaambi ere ase okoboko kwa Nyasae oo.
Ⅳ Tokogenderera korokwa “Oyotigetwe”,
na ense yao tekogenderera korokwa “Eyetigire bosa”,
korende norokwe “Oyo inche Omonene nagokigwe nere”,
na ense yao nerokwe “Eye enyuomire”,
ekiagera Omonene nigo agokirie naye,
na ense yao nenyuomwe.
Ⅴ Buna omomura akonyuoma omoiseke omwekuungi,
naboigo na abamura bao barakonyuome;
na buna omonywomi akogokera omoriakari oye,
naboigo Nyasae oo arakogokere.
Ⅵ Aye Yerusalemu,
nabekire abarendi igoro ase chindwaki chiao.
Abwo tibagokira nonya ng’ake, omobaso na obotuko.
Inwe aba mokomorangeri’Omonene mokonywe,
timobaisa gokira gose gotimoka,
na timotiga Omonene atimoke,
Ⅶ goika abe oiraneirie Yerusalemu amaya aye
na koyokora obe ogotogigwa ase ense.
Ⅷ Omonene orire eira na gotiana oramborete okoboko kwaye gw’okorio,
na ase okoboko kwaye gw’okobua, ogoteeba:
“Tinkorua endagera yao ng’ee ababisa bao bayerie,
na abanto b’ebisaku ebiaao tibakonywa edivai yao gwakoreire emeremo emekong’u.
Ⅸ Taibo, korende abwo barayegese nabwo barayerie, erio batogie Omonene;
na abwo baratore amasabibu nabwo baranywe edivai,
agwo ase chigoora chi’Aase aane Aachenu.”
Ⅹ Eta, eta, mosoere ase ebiita,
moroiserie abanto enchera;
ticha enchera eyio eimokerere igoro,
rusia amagena korwa aroro;
tenenia ekemanyererio abanto bakerore.
Ⅺ Naama! Omonene oraririe amang’ana ase ense yonsi, ogoteeba:
“Teebia abanto ba Sayoni ng’a ogotooreka kwaino kwabereire ang’e;
Omonene ngocha are obwate eng’eria yaye,
na okonyora kwaye nigo gotang’aine bosio bwaye.”
Ⅻ Barabwo mbarokwe “Abanto abachenu”,
na “Ababoorigwe n’Omonene,”
na aye omonyene norokwe “Omochie origigwe”,
na “Omochie otatigwe.”