RIRUUBE RI’ERITANG’ANI RIA
YOHANA
Ogochaakera
Riruube rieritang’ani korwa ase Yohana nigo ribwate ebirenga bibere: Kobeka abasomi baye omoyo bagenderere komenya n’oboamate obuya na Nyasae boigo nomwana oye Yeso Kristo, boigo na kobakuurera batige kobwatia amorokererio y’oborimo ayio agosaria oboamate obo. Amegerio ayio nigo aigekire ase okwegena ng’a obobe nigo bogocha korwa ase okobwatana n’ense eye nase igo Yeso omwana o Nyasae tarenge mwanyabaanto. Aborokia abwo nigo bare kwegeria ng’a gotorigwa n’ogosiborwa korwa ase ogwechandera obogima ase ense eye; nainde nigo bakworokereria ng’a ogotoreka tikobwati boamate n’embwa gose ogwancha abande.
Ase ogokana amegerio aya, omoriki bweriruube eri nigo akoorokia buya mono buna Yeso Kristo nigo arenge Mwanyabaanto borongo, nainde nigo akobeka chinguru buna baria bonsi begenire Yeso oyo na komwancha Nyasae goika banchane barabwo ase barabwo.
Okobagwa kw’egetabu eke
Ogochaakera 1:1-4
Omobaso na omosunte 1:5—2:29
Abana ba Nyasae na abana ba Saitani 3:1-24
Ekeene na obosiru 4:1-6
Emeremo y’obwanchani 4:7-21
Okwegena kw’obobui 5:1-21
Ⅰ
Ring’ana ri’obogima
Ⅰ Nigo tokobarikera igoro y’ering’ana ri’obogima, erio riarengeo korwa omochakano, eri twaigwete, eri twaroche namaiso aito, eri twarigereretie, nonya namaboko aito akaribwata.
Ⅱ Obogima obwo bokaorokigwa, na intwe tokaborora na kobobera kirori; na intwe igo tokabaraareria inwe obogima obwo bwa kare na kare, obwo bwarenge ase Tata na koorokigwa ase tore.
Ⅲ Eri twarorire na koigwa, eri naboigo tokobaraareria inwe, erinde nainwe monyare kobwatana naintwe. Okobwatana gwaito nigo kore amo na Tata na Omwana oye Yeso Kristo.
Ⅳ Nkobariikera tore aya, erinde omogooko oito oikeranigwe.
Nyasae nomobaso
Ⅴ Aya naro amang’ana twaigwete korwa asare, na tokobaraareria inwe, ng’a Nyasae nomobaso, gose mosunte onde bwonsi tori ime asare.
Ⅵ Onye togoteeba ng’a twabwatanire nere, naende togendererete ase omosunte, igo twatebiire oborimo, gose ayare ay’ekeene titori koyakora.
Ⅶ Korende onye tokogenda ase omobaso, buna ere are ase omobaso, rirorio twabwatanire intwe ase intwe, na amanyinga a Yeso, Omwana oye, nigo agotosibia ebibe biaito bionsi.
Ⅷ Onye togoteeba ng’a titori na bibe, iga tokweng’aina, gose ekeene tikeri ime yaito.
Ⅸ Gatorabiorokie ebibe biaito, ere nomwegenwa na omonyene oboronge, natwabere ebibe biaito, na atosibie korwa ase ogotaba boronge gwonsi.
Ⅹ Onye togoteeba ng’a titokoreti ebibe, twakorire Nyasae koba omonyaborimo, gose ring’ana riaye tiriri ime yaito.