EGETABU
KI’ABAGAAMBI
Ogochaakera
Egetabu ki’Abagambi nigo kebwate emegano eyio yarigetwe korwa ase engaki Abaisraeli barenge bamincha y’amachiiko korwa engaki eria basoete Kanaani goika engaki Abarwoti bachagete kogamba. Omonene agachoora korwa ase abanto b’egesaku ki’Abaisraeli, abaraai ikomi na babere, ase okobatenenera gokora chiseegi gati yabo amo n’abanto b’ebisaku biabaetanaine. Aba tibarenge abanachi ebiina gose abaraai b’egesaku gionsi gia Israeli, koreende ere Omonene akabaa omoika bw’okorenta obobui aase abanto baye Abaisraeli. Ase egati yaaba bonsi, ere Omonene akaorokia obonene na okobua Kwaye ase egati yabo. Abande ase egati yaaba nigo baamenyete ase ebiro ebitaambe na gokora amang’ana amaange, Samusoni boigo, abande ase egati yaaba nigo bamenyete ase engaki enyeng’e ase omogano obo. Aba nabwo bakorokwa Abagaambi naende baagerete egetabu eke gekorokwa eki’Abagaambi.
Egetabu eke nigo gekogendereria omogano bw’Abaisraeli magega y’ogokwa kwa Joshua Kerokio nigo kegotworokia obobui ase okomosemeria Nyasae, na obosooku ase Abaisraeli buna togosooma korwa “Kera omonto nigo arenge gokora kende gionsi arooche kemogwenerete ase ebirengererio biaye ere omonyene.” Omonene tagendererete naende koba omorwoti bwa Abaisraeli. Erio chiamate chia Abaisraeli chikabagekana; barabwo bagaochogana na kobwatana amo n’abanto b’ebisaku binde abwo bataamosigete Nyasae; erio ekamobetereri’Omonene kobaa egesusuro nonya barenge abanto Baye. Barabwo bakabugwa na gwoswa bakaba abasomba. Ekero bamorerereete Omonene, akabaa abagaambi bakababooria korwa ase ababisa baabo.
Okobagwa kw’egetabu eke:
Ayakorekanete goika ogokwa kwa Yoshua 1:1—2:10
Abagaambi b’Abaisraeli 2:11—16:31
Amang’ana ao ao 17:1—21:25
Ⅰ
Abayuda n’Abasimioni bakomobwata Adoni‐Bezeki
Ⅰ Magega Yoshua gakuure, Abaisraeli bakamoboori’Omonene, “Mbanto ba gesaku ki ase egati yaito barabe b’eritang’ani kobachiera Abakaanani ase esegi?”
Ⅱ Omonene akabairaneria, “Abayuda ’mbabe ab’eritang’ani kogeenda; rora, nayebeekire ense eria ase amaboko abo.”
Ⅲ Abayuda bakabateebia Abasimeoni bamwabo, “Inchuo tobwaterane, inwe motiire amo naintwe gochia ase orogongo orore omwando oito, tobarwanie Abakaanani. Erio naintwe ’natogende boigo amo nainwe ase orogongo rwaino rore.” Ase ayio Abasimeoni bagaitaba kogeenda amo nabarabwo.
Ⅳ Erio Abayuda bakageenda korwana esegi, n’Omonene akababeeka Abakaanani n’Abaperisi ase amaboko abo; Abayuda bagaita abanto chiribu ikomi agwo Bezeki.
Ⅴ Bakababua Abakaanani n’Abaperisi; bakanyora Adoni‐Bezeki agwo, erio bakamorwania.
Ⅵ Adoni‐Bezeki agatama, korende Abayuda bakamominyokia, bakamobwata na komonacha ebiara biaye ebinene bi’amaboko nebi’amagoro.
Ⅶ Erio Adon‐Bezeki agateeba, “’Nababerete Abarwoti emerongo etano n’ebere, abwo ebiara biabo ebinene bi’amaboko n’ebi’amagoro bianachetwe, barenge gochoora amatori korwa nyaaro y’emesa yane. Na bono Nyasae ong’iraneirie egesiomba buna inche nabakorerete barabwo.” Erio akarentwa Yerusalemu, agakwera aroro.
Abayuda bakoyebua emechie ya Yerusalemu na Heburoni
Ⅷ Abayuda bakayorwania Yerusalemu na koyoira. Bagakenyana abanto b’aroro na kobaita, erio bagasaamba omochie oyio n’omorero.
Ⅸ Magega y’ayio bagatirimboka kobarwania Abakaanani abamenyete ase ense y’ebigoro, na kororia Irianyi, boigo Negebu, na ase ense omweya.
Ⅹ Naende bakageenda kobarwania Abakaanani abamenyete ase omochie o Heburoni, oyio ase amatuko amagega omanyekanete buna Kiriati‐Ariba. Bakababua abaSesai, ab’Ahimani, na abaTalimai.
Otinieli okoyobua omochie o Debiri
Ⅺ Korwa agwo Abayuda bakageenda kobarwania abanto b’omochie o Debiri, oyio ase amatuko amagega omanyekanete buna Kiriati‐Seferi.
Ⅻ Kalebu agateeba, “Onde bwensi orayochiere omochie o Kiriati‐Seferi na koyoira, inche nimoe omoiseke one Akisa abe mokaaye.”
ⅩⅢ Otinieli, mosinto o Kenasi, omomura omoke omwabo Kalebu, akayobua omochie oyio. Erio Kalebu akamoa Akisa, omoiseke oye, akaba mokaaye.
ⅩⅣ Ekero Akisa aigete bw’Otinieli, akamobooria Otinieli amosabe isebiara amoe omogoondo. Erio agwo Akisa agaika korwa etigere igoro, na Kalebu akamobooria, “Ninki oganetie?”
ⅩⅤ Akisa akamoiraneria, “Nekeegwa ’nganetie, ekiagera ’ngwansogetie okang’ira ase ense enyomo ya Negebu. Ase ayio, ing’a chinsooko chi’amaache.” Kalebu akamoa chinsooko chia amaache chia rogoro amo n’echia maate.
Obobui bw’ abanto b’eamate ya Yuda na eya Benjamini
ⅩⅥ Abanto b’ororeeria rw’oyomo bw’Abaakeni, ise biara Musa, bakageenda amo n’Abayuda korwa ase Omochie bw’Emekendo gochia erooro, Irianyi y’Aradi, ase ense ya Yuda, na bakamenya ase egati y’ abanto b’aroro.
ⅩⅦ Abayuda bakageenda amo n’Abasimeoni bamwabo, bakabarwania Abakaanani aria Sefati na kobabua. Bakayosaria omochie oria kegima; magega y’ayio bagasiria erieta riaye bakayoroka Horima.
ⅩⅧ Abayuda bakayeira Gasa, n’Asikeloni, na Ekironi, amo ne chinsemo chiaetanaine emechie eyio.
ⅩⅨ Omonene nigo arenge amo n’Abayuda, na barabwo bakayeira ense y’ebitunwa, korende tibanyaarete goseeria abanto bamenyete ase ense omweya, ekiagera abanto abwo nigo babwate chigari chi’ebioma.
ⅩⅩ Na buna Musa ateebete, Kalebu akaegwa omochie o Heburoni, nere agaseeria abanto batato b’ororeeria rw’Anaki korwao.
ⅩⅪ Korende abanto b’eamate ya Benjamini tibaabaseretie Abayebusi, abanto bamenyete Yerusalemu. Ase ayio Abayebusi nigo bagendererete komenya Yerusalemu amo n’Ababenjamini nonya ngoika reero iga.
Abanto b’eamate ya Yusufu bakobabua a b’omochie o Beteli
ⅩⅫ Omonene nigo arenge amo n’abanto b’eamate ya Yusufu. Barabwo bakageenda kobarwania abanto b’omochie o Beteli.
ⅩⅩⅢ Bagachitoma chirooti gochia Beteli. Agwo ase amatuko akare omochie oyio nigo omanyekanete buna Lusu.
ⅩⅩⅣ Abanto baria chirooti bakamorora omonto oyomo ogosoka korwa ase omochie oria, bakamoteebia, “Tworokie ng’ai toranyaare gosoera ime y’omochie oyo, naintwe ’ntogokorere amaya.”
ⅩⅩⅤ Akaborokia ase baranyare gosoera gochia omochie oria. Barabwo bakabakenyana abanto bande bonsi, bakamotiga omonto oria amo neamate yaye bare moyo.
ⅩⅩⅥ Omonto oria akageenda ase ense y’Abahiti, akayoagaacha omochie oye aroro, akayoroka Lusu, buna orenge korokwa omochakano; naende nabo okorokwa goika reero iga.
Chinsemo chi’ense echio Abaisraeli batairete
ⅩⅩⅦ Abanto b’eamate ya Manase tibaabang’anyetie abanto bamenyete Beti‐Sehani, na Taanaki, na Dori, na Ibileamu, na Megido, amo n’ebichie biabo. Korende Abakaanani baria ’mbagendererete komenya ase ense eria.
ⅩⅩⅧ Agwo magega, ekero Abaisraeli babeire ne chinguru, bakabetereria Abakaanani baabakorere emeremo emekong’u, korende tibaabang’anyetie korwa ense eria.
ⅩⅩⅨ Abanto b’eamate ya Efraimu tibaabang’anyetie Abakaanani abamenyete ase omochie o Geseri. Ase igo Abakaanani bakagenderera komenya ase egati yabo.
ⅩⅩⅩ Abanto b’egesaku gia Sabuloni tibaabang’anyetie abanto bamenyete ase emechie ya Kitironi na Nahalali. Ase ayio Abakaanani baria bakagenderera komenya agwo ase egati yabo, korende bakabetererigwa kobakorera emeremo emekong’u.
ⅩⅩⅪ Abanto b’egesaku gi’Aseri tibaabang’anyetie abanto bamenyete ase emechie y’Ako, na Sidoni, n’Alabu, n’Akisibu, na Heliba, n’Afeki, na Rehobu.
ⅩⅩⅫ Nabo Abaaseri bagendererete komenya ase egati y’Abakaanani, ababiare b’ense eria, ekiagera barabwo tibang’anyetigwe korwao.
ⅩⅩⅩⅢ Abanto b’eamate ya Nafutali tibaabang’anyetie abanto bamenyete ase emechie ya Beti‐Semesi na Beti‐Anati. Ase igo bakaba bakomenya ase egati y’ Abakaanani, ababiare b’ense eria, bakabetereria abanto ba Beti‐Semesi na Beti‐Anati kobakorera emeremo emekong’u.
ⅩⅩⅩⅣ Abaamori bakamiga abanto b’egesaku gia Dani gochia ense y’ebigoro gose tibaabatigerete ribaga batirimboke gochia ase ense omweya,
ⅩⅩⅩⅤ Abaamori bakabwaterera ensemo yabo y’egetunwa kia Heresi, n’Ayaloni, na Shaalabimu, korende abanto b’eamate ya Yusufu bakabaengera, bakababetereria babakorere emeremo emekong’u.
ⅩⅩⅩⅥ Agwo aase ensinyo ya sugusu ya Sera, orobebe rw’Abaamori rokabeekerwa ase egetirimboko gia Akirabimu.