ⅩⅢ
Okoiborwa gwa Samusoni
Ⅰ Abaisraeli bagakora ebibe naende ase obosio bw’Omonene; ere akabatiga, akababeeka ase amaboko ’Abafilisti ase engaki y’emiaka emerongo ene.
Ⅱ Ase engaki eria nareengeo omonto ore korokwa Manoa. Nigo arenge korwa omochie ore korokwa Sora, omonto bw’egesaku gia Dani. Omokungu oye nigo arenge omogomba, taiborete bana.
Ⅲ Omomalaika bw’Omonene akamoorokera, akamoteebia, “Aye nigo ore omogomba, tobwati bana, korende nobe morito, erio oibore omwana omomura.
Ⅳ Ase ayio, bwerite, tobaisa konywa edivai, gose ebinyugwa ebigotindia, na tobaisa koria endagera ende yonsi ere etachenegeti,
Ⅴ ekiagera aye nobe morito, na oibore omwana omomura. Onde tabaisa kogingira etukia y’omotwe oye, ekiagera omwana oria omomura naatananwe ase Nyasae, abe Omwerwa oye korwa ase enda ya ng’ina. Ere nachake gotooria Abaisraeli korwa ase amaboko ’Abafilisti.”
Ⅵ Erio omokungu oria akageenda agateebia omosacha oye, “Omonto o Nyasae nachicha ase ’nde: nigo arenge kororekana buna omomalaika o Nyasae, nigo arenge bw’okoondokia mono. Tinamoboretie ase are korwa, nere tanteebeti erieta riaye.
Ⅶ Korende nigo anteebia ng’a nimbe morito na ing’ibore omwana omoisia, naende ng’a timbaisa konywa edivai, gose ebinyugwa bigotindia, na timbaisa koria endagera ende yonsi etachenegeti, ekiagera omwana oria naatananwe ase Nyasae abe Omwerwa oye korwa okoiborwa kwaye.”
Ⅷ Erio Manoa agasaba Omonene, agateeba, “Omonene, nagosabire, tiga omonto oria o Nyasae gwatoma atochere naende, erinde atworokererie aya togwenerete gokora ase omwana oria omomura oraiborwe.”
Ⅸ Nyasae akaigwa ogosaba kwa Manoa, na omomalaika o Nyasae agacha naende ase omokungu oria ekero aikaransete mogondo. Manoa, omosacha oye, tarenge amo nere.
Ⅹ Ase igo omokungu oria akamonyoka bwango akarangeria omosacha oye, akamoteebia, “Rora, omonto oria ochicha ase ’nde rituko riria ong’orokeire naende.”
Ⅺ Manoa akaimoka, agatunyana mokaaye. Erio agacha ase omonto oria, akamobooria, “Inee! Naye omonto oria okwana n’omorugi one?” Omomalaika oria akamoiraneria, “Ee, ninche.”
Ⅻ Manoa akamobooria, “Bono ekero amang’ana ao araikerane, naki obogima bw’omwana oria boraabe? Meremo ki arakore?”
ⅩⅢ Omomalaika bw’Omonene akamoiraneria, “Ayio onsi nateebia omorugi oo, goika ayakore.
ⅩⅣ Tabaisa koria gento kende gionsi gekorwa ase omosabibu, gose tabaisa konywa edivai n’ebinyugwa ebigotindia, gose taria endagera ende yonsi ere etachenegeti. Aya onsi namochiika, goika ayarende.”
ⅩⅤ Manoa agateebia omomalaika oria, “Koranche twagotangire, obeere aa, tokonyenyere emanwa y’embori, tokoyeroiserie orie.”
ⅩⅥ Omomalaika oria bw’Omonene akamoiraneria, “Nonya gwantanga ng’a mbeere aiga, tinkoria endagera yao, korende koraroisie ekeng’wanso ki’ogosambwa, okerue ase Omonene.” (Manoa tamanyete ng’a oria nigo arenge omomalaika bw’Omonene.)
ⅩⅦ Manoa akabora, “Toteebie buna okorokwa, erinde torue amasikani ase ore, ekero amang’ana ao araikerane!”
ⅩⅧ Omomalaika oria akamobooria, “Nase ki otagete komanya erieta riane? Erieta riane neri’ogokumia.”
ⅩⅨ Erio Manoa akaimokia emanwa y’embori amo n’okoruegwa kw’endagera, akabibeeka ase egetare, akabirua ase Omonene, oyokorete ogokumia ekero Manoa na mokaaye barigereretie.
ⅩⅩ Ekero omorero orenge gwoka gochia igoro korwa ase egesasiimero, Omomalaika bw’Omonene agatiirera ime y’omorero oria, na ekero Manoa na mokaaye barooche ayio, bagatung’ama inse bakaumama.
ⅩⅪ Korwa ekero keria omomalaika oria taoroka ase Manoa naende, gose ase omorugi oye, Erio Manoa akamanya ng’a oria nigo arenge omomalaika bw’Omonene.
ⅩⅫ Manoa agateebia mokaaye, “Amaene goika tokwe, ekiagera twarorire Nyasae.”
ⅩⅩⅢ Korende mokaaye akamoiraneria, “Onye Omonene nigo aganetie gotoita, ere anga tare gwancha ekeng’wanso ki’ogosambwa na okoruegwa kw’endagera korwa ase amaboko aito, gose gotworokia aya onsi atworokia, gose gototeebia amang’ana aya twaiguure.”
ⅩⅩⅣ Magega y’ayio omokungu oria akaibora omwana omoisia, akamoroka Samusoni. Omwana oyio agakina, n’Omonene akamosesenia.
ⅩⅩⅤ Omoika bw’Omonene ogaachaka gokora emeremo ime yaye ekero arenge ase egetwori gia Dani, agwo gati ya Sora na Esitaoli.