ⅩⅩ
Okobokigwa kwa Yeso
(Mat 28:1-10; Mar 16:1-8; Luk 24:1-12)
Ⅰ Bono ase rituko rie ritang’ani ri’echuma Mariamu; Magidalena akagenda ase oboina kobogokiamoka, ekero botarakiamoka buya, akarora ng’a rigena riarusigwe korwa ase oboina.
Ⅱ Erio akagenda bwango goika ase Simioni Petero, na ase omworokigwa oria onde, oria Yeso anchete, akabateebia, “Barusirie Omonene korwa ase oboina, korende titomanyeti aase bamobeka.”
Ⅲ Petero agasoka, akagenda amo nomworokigwa oria onde, bakabwatia enchera kogenda oboina.
Ⅳ Bakaminyoka chimbero bonsi babere amo. Omworokigwa oria onde akaminyoka bwango kobua Petero, akaba oyo bw’eritang’ani goika ase oboina,
Ⅴ agatung’ama, akarora ebitambaa bireo, korende tasoa ime.
Ⅵ Erio Simioni Petero agacha, akamotunyana, agasoa oboina ime, akarora ebitambaa bireo,
Ⅶ na egetambaa keria ki’omotwe oye tikiabekire amo nebitambaa binde, korende nigo kiaringire, kebekire ao gioka.
Ⅷ Erio agwo omworokigwa oria onde orenge bw’eritang’ani goika ase oboina agasoa, akarora, akeegena.
Ⅸ Naki konya tibaramanya ririiko, ng’a nemogwenerete koboka korwa ase abakuure.
Ⅹ Erio aborokigwa baria bakagenda chinsobo.
Yeso okoorokera Mariamu Magidalena
(Mar 16:9-11)
Ⅺ Korende Mariamu nigo ateneine isiko ang’e noboina, okorera; nabo gakorera, agatung’ama, akarigereria ime ase oboina.
Ⅻ Erio akarora abamalaika babere, barenge ne chianga chindabu, baikaransete, oyomo ase omotwe, naende oyomo ase amagoro, agwo aase omobere o Yeso obegetwe.
ⅩⅢ Barabwo bakamobooria, “Omokungu, inki okorera?”
Akabairaneria, “Nekiagera barusirie Omonene one, na timanyeti aase bamobeka.”
ⅩⅣ Kagokwana aya akeonchora gochia magega, akarora Yeso oteneine, tamanya ng’a n’Yeso.
ⅩⅤ Yeso akamoteebia, “Omong’ina, ninki okorera? Ning’o okorigia?”
Ere agakaga ng’a nomorendi bw’omogondo, akamoteebia, “Omonene, onye naye kwamoira, nteebia aase kwamobeka, na inche nimorusie.”
ⅩⅥ Yeso akamoteebia, “Mariamu.”
Ere akeonchora, akamoteebia ase Ekeiberania, “Raboni!” (Okoonchorwa kwaye, Omworokia).
ⅩⅦ Yeso akamoteebia, “Tonkuna, ekiagera tindagenda ase Tata one, korende genda ase abaminto, obateebie, ng’a nkogenda nde ase Tata one oyore Iso oino, ase Nyasae one oyore Nyasae oino.”
ⅩⅧ Mariamu Magidalena akagenda, agateebia aborokigwa amang’ana ng’a, “Narorire Omonene”, naende ng’a omotebirie aya.
Yeso okoorokera abatomwa
(Mat 28:16-20; Mar 16:14-18; Luk 24:36-49)
ⅩⅨ Ase omogoroba bwe rituko rie ritang’ani ri’echuma, na ebisieri kobiasiekirwe aase agwo aborokigwa barenge, ekiagera bairogete Abayahudi, Yeso agacha, agatenena gati‐gati akabateebia, “Omorembe obe ase more!”
ⅩⅩ Gakwanire aya, akaborokia amaboko aye ne rikere riaye. Erio aborokigwa bakagoka kobachia korora Omonene.
ⅩⅪ Yeso akabateebia eria kabere, “Omorembe obe ase more! Buna Tata antomete, naboigo nainche nabatomire inwe.”
ⅩⅫ Gakwanire aya, akabautera omoika, akabateebia, “Nyora Omoika Omochenu.
ⅩⅩⅢ Bande bonsi morabere ebibe, baabeirwe; naende bande bonsi morasiekere ebibe, basiekeirwe.”
Yeso okoorokera Thomas
ⅩⅩⅣ Ko Thomas, oyomo bwa baria ikomi na babere, oyokorokwa Barongo, tarenge amo nabarabwo ekero Yeso achete.
ⅩⅩⅤ Erio aborokigwa bande bakamoteebia, “Twarorire Omonene.” Korende ere akabateebia, “Ntarochi amaboko aye na ebimanyererio bi’emesumari, na kobeeka ekiara kiane aase emesumari yamobetete, na kobeeka okoboko kwane rikere riaye ime, tinkwegena nonya ng’ake.”
ⅩⅩⅥ Magega y’amatuko atano na atato aborokigwa baye nao barenge naende ase enyomba eria ime, na Thomas amo nabarabwo. Yeso agacha ekero ebisieri bisiekire, agatenena gati‐gati, akabora, “Omorembe obe ase more!”
ⅩⅩⅦ Erio agateebia Thomas, “Renta aiga ekiara kiao. Orore amaboko aane. Renta okoboko kwao, okobeke ase rikere riane; toba oyotegeneti, korende oyo bwegenete.”
ⅩⅩⅧ Thomas akamoiraneria, “Omonene one, na Nyasae one!”
ⅩⅩⅨ Yeso akamoteebia, “Iga kwegena ekiagera kwandora; mbare nomogooko abatarochi ko begenire.”
Engencho yagerete enchiri eye ekarikwa
ⅩⅩⅩ Nabo mbire ebikone binde ebinge Yeso akorete ase amasio y’aborokigwa baye bitarikiri ase egetabu eke,
ⅩⅩⅪ korende ebi biarikirwe, erinde monyare kwegena ng’a Yeso nere Kristo, Omwana o Nyasae; naende ase okwegena mobe nobogima ase erieta riaye.