Ⅳ
Ogosorora gw’okoonchoka
Ⅰ Omonene oteebire iga: “Inwe Abaisraeli, onye morigetie koirana ase ’nde, ing’iranere. Motugute emegwekano yaino mogosasiima ere okogechia ase obosio bwane, motari nechitang’u‐tang’u.
Ⅱ Komoratiane ase ekeene na oboronge, mogoteeba: Ekeene, buna Omonene are moyo, rirorio abanto b’ebisaku bionsi mbesesenie ime yaye, naende mbetogie asare.”
Ⅲ Aya nar’Omonene agoteebia Abayuda na abamenyi ba Yerusalemu: “Chaka korema emegondo yaino na timobaisa kobusura ase amagwa ime.
Ⅳ Inwe Abayuda na abanto ba Yerusalemu, earokie inwe abanyene, mwerue ase Omonene! Arokia chinkoro chiaino! Motakoreti bo, rirorio endamwamu yane nigo eraoroke igoro ase more buna omorero, na omonto tari orayerimie. Ayio onsi nigo arabe nase engencho y’ogokora kwaino okobe.”
Abayuda bakogoswa negesusuro
Ⅴ Teebia Abayuda, na morarie ase Yerusalemu:
“Bugia egetureeri ase ense eye yonsi,
moake eriogi rinene, motebe:
Sangererekana amo, togende ase emechie egiteire chindwaki.
Ⅵ Imokia ekemanyererio kiorokie enchera egochia Sayoni;
tama motooreke, timobaisa goteebana,
ekiagera nkorenta nde obobe na ogosaria okonene korwa sugusu.”
Ⅶ Endo yaimokire korwa ase riraro riaye;
oria ogosiria ebisaku oimokire,
orure aase aye,
akore ense yaino ebe bosa;
emechie yaino nesarigwe ebe amaturi, atamenyiri nabaanto.
Ⅷ Ase ayio, eboyie chigunia,
morere na kweng’ereria,
ekiagera endamwamu enene y’Omonene
nigo ere ase tore, teraonchoka etotige.
Ⅸ Omonene nigo agoteeba iga: “Ase rituko erio abarwoti amo nabanene b’oborwoti tibakoba noboremu, abakuani mbaondoke na ababani mbakumie.”
Ⅹ Erio ngateba, “Aye Omonene, kwabang’ainire abanto aba ba Yerusalemu, ekiagera kwabateebeetie ng’a mbabe nomorembe, korende bono omoro obeire ang’e kobaita.”
Ⅺ Ase engaki eyio abanto aba amo naba Yerusalemu mbateebigwe ring’ana eri: “Omwaga ogosamba buna omorero noguse korwa ase ebigoro bi’erooro gochia ase abanto baane. Omwaga oyio tokoba oyo bw’okoirurera gose bw’ogosonga,
Ⅻ korende omwaga oyio ninyotome obe omotindi mono goetania. Bono ninche ndabanachere ekiina.”
Abayuda bagoetananwa nababisa
ⅩⅢ Rora, omobisa nigo agotochera buna amare, nigo abwate chigari chi’esegi chinga buna ekerambauti; chibarasi chiaye nigo chikominyoka chimbero kobua ekeongo. Obobe nobwaito! Ee, twasirigwe.
ⅩⅣ Inwe abanto ba Yerusalemu, chena chinkoro chiaino korwa ase obobe, erinde motoorigwe. Ngoika ririri moragenderere kogaacha ebirengererio bi’obobe ime yaino?
ⅩⅤ Omonto orure ase orogongo rwa Dani, orentire amang’ana neriogi rinene, nigo akoraria obobe korwa ase ense y’Efraimu.
ⅩⅥ Kurera abanto b’ebisaku ng’a amabe ngocha are; raria ase Yerusalemu, motebe: Abagochia koboera ngocha bare korwa ase ense y’aare, bagoaka eriogi ase emechie y’Abayuda.
ⅩⅦ Ekiagera Abayuda basaririe ase ’nde, ababisa babo mbaabaetanane buna abarendi b’omogondo bakoyoetanana. Omonene okwanire.
ⅩⅧ Chinchera chiaino, na ogokora kwaino, nabio biagerire amang’ana ayio abanyorire inwe. Oko nakwo ogosirigwa kwaino, na nigo kore nobororo obonge. Obororo obwo bwasoire ime ase chinkoro chiaino.
Ogoichana kwa Yeremia ase abanto baye
ⅩⅨ Obee! Obee! Obororo bw’enda yane bwabeire obonene.
Enkoro yane nigo egontwoma mono,
tinkonyara gokira;
naigure eriogi ri’egetureeri,
ogotaboborwa gw’esegi.
ⅩⅩ Obobe nigo bokoromeng’ana obobe bonde,
ense yonsi yasarigwe.
Chiema chiane chiasarigwe mobosokano;
ebietubo bie chiema chiane biatandoirwe.
ⅩⅪ Ngoika ririri ndagenderere korora ekemanyererio gi’esegi,
na koigwa eriogi ri’egetureeri rikobugigwa?
ⅩⅫ “Abanto baane nigo bare abariri,
tibamanyeti inche.
Barabwo nigo bare buna abana batari nobong’aini,
tibamanyeti gento kende.
Nigo bare aboge mono ase ogokora ebibe,
korende tibamanyeti gokora amaya.”
Amaroro a Yeremia ay’ogosaria kogochi‐gocha
ⅩⅩⅢ Nkarigereria ense, nkarora yabeire bosa, gento tikiarengeo;
nkarigereria gochia igoro, na oborabu bonde tibwarengeo.
ⅩⅩⅣ Nkarigereria gochia ase ebitunwa, nkarora birobio bigotengechigwa,
na ebigoro bionsi bikonyegerigwa gochia aaria na aaria.
ⅩⅩⅤ Nkarigereria, nkarora omonto taiyo nonya noyomo;
chinyoni chionsi konya chiatamire.
ⅩⅩⅥ Nkarigereria, nkarora ense yarenge kwama, yabeire erooro,
emechie yaye yonsi yasarigwe,
ekaba amatombe ase obosio bw’Omonene,
ase engencho y’endamwamu yaye enene.
ⅩⅩⅦ Aya nar’Omonene agoteeba:
“Ense yonsi nesarigwe etigare bosa,
korende tinkoyesiria kegima.
ⅩⅩⅧ Ase engencho eyio ense nereere na kweumia,
igoro nchionchoke chimwame ti,
ekiagera ninche nakwanire, naganirie gokora ayio;
tinkonyara gweitia gose koonchora ebirengererio biane.”
ⅩⅩⅨ Abanto ba kera omochie mbatame
ekero baraigwe amariogi ’abariini chibarasi na ay’abwo babwate amata,
mbatame gochia ase amanani, bebise ase ebitare ime.
Emechie yonsi netigare bosa,
nonya nomonto oyomo tagotigara aroro.
ⅩⅩⅩ Aye oyo gwatigirwe bosa na gwasarigwe,
ninki orengereretie ekero okobeeka chianga chimonyinga,
naende ogwechabera n’ebinto bie chitaabu,
na gosata amaiso ao?
Nigo ogwechabera bosa.
Abanchi bao bagochayire,
na nigo bakorigia gosiria obogima bwao.
ⅩⅩⅪ Naigure okorera buna okw’omokuungu okobina aibore;
ekerero ekenene buna eki’oyo okoibora omwana omotangi.
Okorera okwo nigo kore okorera gwa Sayoni, omoiseke one,
ngwesacha are ang’use omoika,
okorambora amaboko aye, okorera:
“N akuure! Nkong’ita bare!”