ⅩⅬⅥ
Abamisiri bakobugwa agwo Karikemisi
Ⅰ Ring’ana ri’Omonene rigacha ase Yeremia omobani igoro y’ebisaku.
Ⅱ Ring’ana eri rigakwanwa igoro ya Misiri, na igoro y’abarwani b’esegi ba Farao Neko, omorwoti o Misiri, abarenge ang’e norooche rw’Eufarati agwo Karikemisi, abwo Nebukadinesaro, omorwoti o Babiloni, abuete ase omwaka o kane bw’okogamba kwa Yehoyakimu mosinto o Yosia, omorwoti bw’Abayuda:
Ⅲ Beka chinguba ne ching’aya ang’e,
mogende bosio ase esegi.
Ⅳ Inwe abariini chibarasi beka chibarasi ang’e mochiriine.
Beka ebigogwa biaino bi’ebioma, mwebeke ang’e,
tieria amatimo aino.
Beka chigoti chiaino chi’ebioma.
Ⅴ Ninki kiagera aya ndoche akorekire?
Baondokire na koirana magega;
abarwani babo chituoni babuirwe,
batamire ase okoayerera batari korigereria magega;
obwoba nigo bore ase chinsemo chionsi. Nab’Omonene atebiire.
Ⅵ Baria bamanyete kominyoka chimbero tibakonyara gotama,
nonya nabarwani bare chituoni tibagotooreka.
Agwo sugusu, ang’e norooche rw’Eufarati, bagochirwe na kogwa.
Ⅶ Ning’o oyo onga buna orooche rwa Naeli rwaichoire,
oyo onga buna chindooche chiaichoire amaache?
Ⅷ Misiri nigo ekoimokerera igoro buna orooche rwa Naeli.
Nigo ekoimokerera igoro buna chindooche chiaichoire amaache.
Misiri eria egateba, Ninyimokerere igoro ntube ense,
ninsarie na gosiria emechie na abanto bamenyeteo.
Ⅸ Chiika chibarasi chigende bosio,
ne chigari chigende ne chinguru.
Tiga chituoni chi’esegi chigende bosio:
Abaetiopia na Abaputi, nabwo ababogoria be chinguba,
na Abaludi nabwo abarwaneri amata.
Ⅹ “Rituko riria neri’Omonene, Nyasae bw’Emeganda;
rituko ri’okorusia egesiomba,
eruserie egesiomba, ase ababisa baye.
Omoro nobarie oigote kegima;
nonywe amanyinga abo oichore.
Omonene, Nyasae bw’Emeganda, nabe nekeng’wanso
ase ense ya sugusu, ang’e norooche rw’Eufarati.
Ⅺ Inwe abanto ba Misiri more buna abaiseke abekungi,
tiira gochia ase Gileadi monyore amaguta akogwenia.
Namoisa konyora amariogo amange abosa ase more,
okogwenigwa tikori ase more.
Ⅻ Abanto b’ebisaku baigure amang’ana igoro y’obosooku bwaino,
na ebirero biaino biaichoire ase ense,
ekiagera omorwani etuoni ogochirwe na kogwa igoro ase etuoni ende.
Bonsi bagwereranire amo.”
Nebukadinesaro ogocha
ⅩⅢ Ring’ana eri nario Omonene atebeetie Yeremia igoro y’ogocha kwa Nebukadinesaro, omorwoti o Babiloni, ase okobua ense ya Misiri:
ⅩⅣ “Kwana aya ase Misiri, moyararie ase Migidoli,
ee, yararie ase Memifisi na Tapenesi:
Tenena, bwebeke ang’e,
ekiagera omoro nosirie ase chinsemo chiao chionsi.
ⅩⅤ Nase ki abanto baino bare ne chinguru batamire?
Tibatenenete, ekiagera Omonene abaseretie.
ⅩⅥ Agatiga emeganda yaino ekagochwa na kogwa,
erio bagakwana na goteebania Omonto ase omonto:
Imoka, toirane ase abanto baito,
ase ense yaito twaiboreretwe,
totame korwa ase omoro bw’abagotochanda.
ⅩⅦ “Nigo bakorera igoro ya Farao, omorwoti o Misiri, na komooroka
Omosiru oyosiririe chingaki chiaye.
ⅩⅧ Omorwoti, oyore Omonene bw’Emeganda, nigo agoteeba iga:
Ekeene, buna inde moyo,
oyomo onga buna Tabori ase egati y’ebitunwa binde
na onga buna Karimeli, egetunwa kere ang’e nenyancha,
ngocha are.
ⅩⅨ Inwe abanto ba Misiri,
beka chigurube chiaino ang’e,
mong’anye mogende ase obosomba,
ekiagera Memifisi nosirigwe otigare bosa, otamenyiri na monto.
ⅩⅩ Misiri nigo onga buna ritororo rigiya,
korende ekiaramba kiarure sugusu na kiayorasire.
ⅩⅪ Abarwani esegi barangeretigwe gokonya nigo banga buna chimori chinoru.
Beonchoire batamire bonsi amo,
gose tibakonyara gotenena korwana esegi.
Naki rituko ri’emechando yabo riabaikeire;
eye nengaki bakoegwa egesusuro kiabo.
ⅩⅫ Misiri nigo egochura neriogi ringa buna eri’eng’iti egwekurura.
Ababisa ba Misiri nigo bagocha bare ne chinguru.
Nigo bagocha bare nebisire buna abagochia kogecha chinko.
ⅩⅩⅢ Omonene nigo agoteeba ng’a mbageche rinani ri’ense eria
nonya rire rinoru mono ritaetwe nonde,
ekiagera abwo nigo bare abange mono kobua chingige,
tibakonyara kobareka.
ⅩⅩⅣ Abanto ba Misiri nabanyore obosooku,
nababekwe ase amaboko ’abaanto bakorwa sugusu.”
ⅩⅩⅤ Omonene bw’Emeganda, Nyasae bw’Abaisraeli, nigo agoteeba iga, “Rora, nkorenta nde egesusuro igoro ase Amoni, enyasae ya Tebesi, na ase Farao na Misiri, na ase chinyasae chi’ense eyio, na ase abarwoti b’aroro, na ase Farao omonyene, na ase abanto bonsi baria bamosemeretie.
ⅩⅩⅥ Nimbabeeke ase amaboko abwo bakorigia gosiria obogima bwabo, na ase okoboko kwa Nebukadinesaro, omorwoti o Babiloni, na ase abasomba baye. Korende magega y’ayio abanto nabamenye ase ense ya Misiri, buna engaki ya kare. Nab’Omonene atebiire.”
Omonene natoorie abanto baye
ⅩⅩⅦ “Korende inwe abanto ba Yakobo, abasomba baane, timoiroka.
Inwe Abaisraeli, timokwa emioyo.
Naama! Nimbatoorie korwa ase ense y’aare.
Abanto ba Yakobo nabairane bamenye ase obotoereru na korendwa,
na monto onde tari oraboboyie.
ⅩⅩⅧ Omonene nigo agoteeba iga:
Inwe abanto ba Yakobo, abasomba baane,
timoiroka, ekiagera inche nigo inde amo nainwe.
Ninsirie kegima ebisaku bionsi
ebio ase nabasiarerete gochia,
korende inwe tinkobasiria kegima.
Nimbae inwe egesusuro gi’okobarongeyia ase oboronge,
tinkobatiga nonya ng’ake timbaa egesusuro.”