ⅩⅬⅧ
Ogosirigwa kw’Abamoabu
Ⅰ Aya nar’Omonene bw’Emeganda, Nyasae bw’Abaisraeli, agoteeba igoro y’Abamoabu:
“Obobe nobwa Nebo, ekiagera osarigwe!
Kiriataimu onyorire obosooku, ekiagera obwatirwe,
chindwaki chiaye chiatagoirwe na obosooku bwachire,
Ⅱ ogotogigwa kw’Abamoabu gwasirire.
Ababisa bare Hesiboni barobeirie gokora ense eria bobe.
Nigo bagoteebania: Inchuo tosirie abanto baye
tibaabaisa koba egesaku naende.
Aye omochie o Madimena boigo nokirigwe‐kiri,
omoro nokobwatie korwa magega.
Ⅲ Eriogi ri’okorera nariigugwe korwa Horonaimu, rigoteeba:
Ogotigara bosa na ogosirigwa okonene.
Ⅳ “Ense ya Moabu yasarigwe,
abana baye nigo bakorera mono.
Ⅴ Nigo bagotiira gochia Luhiti bakorera;
ekero bagotirimboka korwa Horonaimu,
eriogi ri’okorera kw’ogosirigwa nigo rikoigugwa.
Ⅵ Tama! Motoorie obogima bwaino,
mobe buna etigere y’orosana etigarete yoka ase erooro.
Ⅶ “Ekiagera inwe mosemeretie emeremo yaino, na obotenenku bwaino,
inamwoswe moirwe ase obosomba,
na enyasae eria Kemosi neirwe ase obosomba,
amo nabakuani baye na abanene b’obogambi bwaye.
Ⅷ Oyio ogosaria na gosiria nachiche ase kera omochie,
mochie onde togotooreka.
Rikura amo nense omweya nabisarigwe,
buna Omonene atebiire.
Ⅸ “Kae ense ya Moabu chimbaaba, eirurukere etame;
emechie yaye yonsi nesirigwe, ebe amaturi atamenyiri na monto.
Ⅹ Oragererigwe omonto oria ogokora emeremo y’Omonene nobworo,
na oragererigwe oria ogotanga omoro oye toitera amanyinga.
Emechie y’Abamoabu egosirigwa
Ⅺ “Abamoabu babeire barendire bamenyete ase obotoereru korwa ase oboke bwabo. Babeire buna edivai etarakenonorwa korwa ase eturubo. Tibana koumorwa korwa ase ekebekerero ekemo gochia ase ekende, gose tibana gwoswa bairwe ase obosomba. Ase ayio rimisu riabo nabo rigendererete koba buna riarenge, na ogotioka kwabo tikwana koonchoka.
Ⅻ “Ase ayio, bono amatuko ngocha are, ndatome abaumori baabaumore, erinde ebibekerero ebio bitigare bibe bosa, erio biatwe.
ⅩⅢ Na abanto ba Moabu nabarore obosooku ase enyasae eria Kemosi, buna Abaisraeli baroche obosooku ase enyasae ya Beteli oyio basemeretie.
ⅩⅣ “Naki mogoteeba: Intwe nabarwani chituoni,
abanto tore ne chinguru ase okorwana esegi?
ⅩⅤ Oyogosaria na gosiria ense ya Moabu na emechie yaye ochire;
abamura baye bare abaya mono baitirwe.
Nabo omorwoti, oyore Omonene bw’Emeganda, oteebire.
ⅩⅥ Emechando y’Abamoabu yabeire ang’e mono,
na egeku nigo gekoayerera kobacheera.
ⅩⅦ “Inwe abwo momenyete ase chinsemo chiaye chionsi,
nainwe abwo momanyete erieta riaye, morere!
Motebe: Naki enyimbo eria ere nokobua na obonene yabunirwe!
ⅩⅧ Inwe abanto ba Diboni, ika korwa ase obonene bwaino,
moikaranse inse ase amaroba;
oyio ogocha gosiria Abamoabu nabachere inwe;
atagore chindwaki chiaino chinkong’u.
ⅩⅨ Inwe abanto momenyete Aroeri,
tenena ase enchera ensemo, motengere!
Moborie abasacha abwo bagotama, na abakungu abagwetooria:
Mang’ana ki ayio akorekire?
ⅩⅩ Ense ya Moabu yasookigwe, ekiagera yasirigwe;
rera na kweumia!
Teebia abamenyete ase chinsemo chi’orooche rw’Arinoni ng’a
ense ya Moabu yasirigwe kegima.
ⅩⅪ “Ekiina kianachirwe igoro y’ense eraire eimokererete igoro ya Holoni, na Yahasa, na Mefaati,
ⅩⅫ na Diboni, na Nebo, na Beti‐Dibulataimu,
ⅩⅩⅢ na Kiriataimu, na Beti‐Gamuli, na Beti‐Meoni,
ⅩⅩⅣ na Kerioti, na Bosira, na emechie yonsi y’ense ya Moabu ere aare na ang’e.
ⅩⅩⅤ Ching’unchara chi’Abamoabu chiabutoirwe, na amaboko abo abunirwe.” Nab’Omonene atebiire.
Abamoabu bagokanywa koba abaitongo
ⅩⅩⅥ “Kae Abamoabu banywe batinde, ekiagera beimokereirie igoro mamincha y’Omonene. Barabwo mbaroke, naende begara‐garie ime ase amaroki abo, abanto mbaabasekerere.
ⅩⅩⅦ Inee! Inwe timwabasekererete Abaisraeli? Abwo banyorekanete bare ase ekeombe ki’abaibi? Gose nase ki mwarenge gosinga‐singisia emetwe yaino ekero mware gokwana igoro yabo?
ⅩⅩⅧ “Inwe abanto momenyete Moabu, karue ase emechie yaino, mogende komenya ase ebitare, mobe buna riruma rikoagacha egeswa kiaye ime y’omwenya bw’egetare.
ⅩⅩⅨ Twaigure igoro y’oboenenu bw’Abamoabu; nigo bare abaenenu mono. Twaigure buna beimokereirie igoro, na buna bagwekaga na koba nobomwenu, na buna bare ne chinkoro chi’obwerori.
ⅩⅩⅩ Inche Omonene nigo imanyete ribero riabo. Ogwetogia kwabo nigo kore okw’obong’ainereria, naboigo nogokora kwabo kore.
ⅩⅩⅪ Ase engencho eyio, nindeere ense ya Moabu, nindeere abanto bonsi ba Moabu, boigo nindeere abanto ba Kiri‐Heresi.
ⅩⅩⅫ Inwe abanto ba Sibuma, nimbareere mono kobua koreera abanto ba Yaeseri. Aye omochie o Sibuma nigo onga buna omosabibu, ne chinsagia chiao chiarandire gochia ng’umbu y’enyancha, chiaikire enyancha ya Yaeseri. Korende ekero kie rigesa omosaria ochire gosaria emesabibu na okwama kwabo.
ⅩⅩⅩⅢ Omogoko na omochengo biarusigwe korwa ase ense ya Moabu eyio ekwama ase obonge. Nasiririe edivai korwa ase ebimitero; monto onde tari okomita edivai ogoteera ore nomochengo. Eriogi rigoakwa tiriri eri’omogooko.
ⅩⅩⅩⅣ “Abanto ba Hesiboni na ab’Eleale nigo bakorera, na eriogi riabo riaigurwe goika Eleale na Yahasi; boigo ndigugwe korwa ase Soari goika Horonaimu na Egilati‐Selisia. Na amaache a Nimirimi nakame na gosira.
ⅩⅩⅩⅤ Ninsirie Abamoabu, abwo bakorua ebing’wanso agwo aase aimokererete igoro na gosamba ubani ase enyasae yabo.
ⅩⅩⅩⅥ “Ase igo enkoro yane nigo ekobareera Abamoabu na abanto ba Kireresi, ase eriogi buna eri’ekeroria. Obonda benyorerete bwasirigwe.
ⅩⅩⅩⅦ Kera omonto akigite etukia y’omotwe oye, ogingire ne chinderu chiaye boigo. Abanto bonsi nabeekebe amaboko abo, na kweboyia chigunia ebinema biabo.
ⅩⅩⅩⅧ Ase chinyomba chionsi chi’ense ya Moabu, na ase chinchera chiaye, okorera gw’okweumia gwoka nakoigweke aroro, ekiagera naatire ense ya Moabu buna enyongo egwatwa, eyio monto onde atari gwechandera. Nab’Omonene atebiire.
ⅩⅩⅩⅨ Abanto nkorera bare, bagoteeba: Naki Abamoabu baitirwe na gosirigwa. Naki Abamoabu baonchoire amagega abo bare nobosooku, babeire egento ki’ogosekererigwa na eki’ogoichanerwa ase abanto bonsi abaabaetanaine.”
Abamoabu tibagotooreka
ⅩⅬ Aya nar’Omonene agoteeba: Egesaku gete nkeiruruke bwango buna ekeongo, kerambore chimbaaba chiaye igoro y’Abamoabu.
ⅩⅬⅠ Emechie amo ne chindwaki chire chinkong’u mbibwatwe. Ase rituko erio chinkoro chi’abasikari ba Moabu bare chituoni nachiondoke; barabwo babe buna abakungu bakobina ase okoibora.
ⅩⅬⅡ Abanto ba Moabu nabasirigwe kegima tibagenderera koba egesaku, ekiagera beimokereretie igoro mamincha y’Omonene.
ⅩⅬⅢ Inwe abamomenyete Moabu, omoondoko, na eirima, na omoeto, nigo bibaganyete. Omonene oteebire ayio.
ⅩⅬⅣ Onde bwensi oratame ase engencho y’omoondoko nagwe ase eirima, na oyo orasoke korwa ase eirima nabwatwe nomoeto. Nindete ayio igoro y’Abamoabu ase omwaka ndabae egesusuro kiabo. Nab’Omonene atebiire.
ⅩⅬⅤ Abare gotama bagatenena ase ekiriri kia Hesiboni batari ne chinguru. Omorero okarua ase Hesiboni, chimeme chi’omorero korwa ase ense ya Sihoni, ogasaria amasio ’Abamoabu, na ogasamba ebiototeri bi’emetwe y’abanto banchete esegi.
ⅩⅬⅥ Obobe nobwaino, inwe abanto ba Moabu! Abanto bagosasiima Kemosi basirigwe. Abana baino abamura boosirwe, na abaiseke baino bairirwe obosomba.
ⅩⅬⅦ Korende ase amatuko agochi‐gocha ning’iranerie Abamoabu amaya abo. Nabo inche Omonene natebiire.
Ayio naro arakoreke ase Abamoabu.