ⅬⅠ
Babiloni okogenderera kogambigwa
Ⅰ Aya nar’Omonene agoteeba: “Rora, inche ninseegete omoika bw’ogosiria Babiloni na abanto bamenyete aroro bare mamincha yane.
Ⅱ Ase rituko riria ri’emechando nintomere abanto ba Babiloni abairuri baabairure, batige ense yabo ebe bosa.
Ⅲ Timobaisa gotiga abarwani bakumbe amata na korasa chinsara chiabo, gose kobeeka chigoti chi’ebioma. Timororera abamura b’aroro amaabera. Mosirie abarwani baye b’esegi bonsi pi.
Ⅳ Abanto abwo mbaitwe ase ense y’Abakalidayo, babe bakwete ase chinchera chi’emechie yabo.
Ⅴ Nyasae, Omonene bw’Emeganda, tatigeti Abaisraeli na Abayuda, nonya ense yabo yabeire nebibe ebinge ase Nyasae ore omochenu bw’Abaisraeli.
Ⅵ Tama korwa Babiloni, kera omonto atoorie obogima bwaye. Timobaisa gosirigwa ekero ense eyio eraegwe egesusuro kiaye, ekiagera eye nero engaki Omonene akorusia egesiomba, ayeakane buna koreng’ana nogokora kwaye kore.
Ⅶ Babiloni nigo yarenge buna egekombe gi’etaabu ase okoboko kw’Omonene; ebisaku bionsi bi’ense bikanywera korwa ase kerokio bigatinda. Ebisaku bikanywa edivai ya Babiloni, erio bigatinda, bikaba buna chibarimo.
Ⅷ Babiloni ogure mobosokano na gosirigwa, Yoreere mobogorie amaguta akogwenia amaote aye, ande nabo ense eria erabaise kogwenigwa.
Ⅸ Nanga nabo twagwenetie Babiloni, korende togwenetigwe. Togende, totige Babiloni; kera omonto agende ase ense yaye, ekiagera obobe bwa Babiloni bwaikire igoro nonya nase amare.
Ⅹ “Omonene otorenteire oboronge bwaito. Inchuo torarie ase Sayoni emeremo y’Omonene, Nyasae oito.
Ⅺ “Tieria chinsara! Imokia chinguba! Omonene oseegetire emeika y’abarwoti b’Abamedi, ekiagera nigo aroberetie gosiria Babiloni. Ekio negesiomba Omonene akoruseria Hekalu yaye.
Ⅻ Tenenia ebendera ase chindwaki chia Babiloni! Kora oborendi bobe obokong’u ase okobeeka abarendi. Beka abanto bebise na koboa, ekiagera Omonene orobeirie na goikerania amang’ana aria akwanete ase abanto bamenyete Babiloni.
ⅩⅢ Aye omenyete aase amaache amange are, ore omonda bwe chinibo chinyinge, korende omoerio oo oikire, naboigo na okogania kwao okonge.
ⅩⅣ Omonene bw’Emeganda bwetianirie ogoteeba: Ekeene, ninkorentere abanto abange mono buna chingige, bachiche gokorwania, na barabwo nabakobue na baake eriogi ri’obobui.”
Amatera ay’okomotogia Omonene
ⅩⅤ “Omonene nere otongete ense ase okobua kwaye,
nere oyetenenetie goetera ase obong’aini bwaye,
na ase okomanya kwaye akarambora igoro.
ⅩⅥ Ekero agokwana neriogi riaye,
amaache are igoro nigo akoruma.
Nigo agokora ritaturi riaimokerera igoro korwa ase chinsinyo chi’ense.
Nigo akomesia na korenta embura,
naende orenta omwaga ogusa korwa ase ebigachero biaye.
ⅩⅦ Kera omonto nigo are omoriri, tamanyeti gento,
na kera omooroisia etaabu nigo agosookigwa nemegwekano yaye y’ogosasimwa,
ekiagera emegwekano eyio ney’obong’ainereria,
tebwati omoika ime yaye.
ⅩⅧ Eyio nigo ere bosa, nesekererwe,
ekero eraegwe egesusuro, nesirigwe.
ⅩⅨ Korende oyore egetari o Yakobo tagwekaini emegwekano eyio;
nere otongete ebinto bionsi.
Abaisraeli nigo bare egesaku ki’omwando oye;
Omonene bw’Emeganda nario erieta riaye.”
Babiloni nenturago y’Omonene
ⅩⅩ “Aye nenturago na ekerwanero kiane gi’esegi;
goetera asore ning’ake ebisaku bibe ebisamunye,
ninsirie amarwoti.
ⅩⅪ Goetera asore ninsamunyore chibarasi na abanto bachiriinete;
ninsamunyore ne chigari na abagochigendia.
ⅩⅫ Goetera asore ninsamunyore abasacha na abakungu,
ninsamunyore abanto abagotu na abake,
ninsamunyore abamura na abaiseke;
ⅩⅩⅢ goetera asore ninsamunyore abarisia ne riicho riabo,
ninsamunyore abaremi ne chiombe chiabo;
boigo goetera asore ninsamunyore abagabana na abachiki.”
Egesusuro kia Babiloni
ⅩⅩⅣ Omonene nigo agoteeba iga: “Agwo ase amasio aino ning’akane Babiloni na Abakalidayo bonsi obobe bwabo bwonsi bakorete ase Sayoni.
ⅩⅩⅤ Aye egetunwa kegosiria, gwasiririe ense yonsi, rora, inche nabeire mamincha yao; nindambore okoboko kwane asore; nkobwate ngoturunkanie korwa ase emienya y’ebitare, erio nkoonchore obe egetunwa giasambirwe.
ⅩⅩⅥ Igena rinde tirikorusigwa asore ribe eri’ekoona, gose kobekwa ase oboroso, korende aye nosarigwe ogenderere koba ritongo kogenderera botambe.” Nab’Omonene atebiire.
ⅩⅩⅦ “Tenenia ebendera y’esegi igoro ase ense! Bugia egetureeri ase egati y’ebisaku! Beka ebisaku ang’e birwanie Babiloni. Rangeria amarwoti ayorwanie, ee, rangeria Ararati, na Mini, na Asikenasi. Chora abatang’ani b’esegi bayoumokere. Renta chibarasi chinyinge buna chingige chikogosa.
ⅩⅩⅧ Beka ebisaku ang’e biche korwania Babiloni. Rangeria abarwoti b’Abamedi amo nabagabana na abakoonyi babo, na kera ense ere ase obogambi bwaye.
ⅩⅩⅨ Erio ense etengeche na koiguswa ase obororo, ekiagera omooroberio Omonene bw’ogosaria Babiloni noikeranigwe, na ere nasirie ense eyio ebe bosa temenywa na monto.
ⅩⅩⅩ Abarwani chituoni ba Babiloni batigire korwana esegi. Nigo bagendererete kobeera ase chiburi ime, ekiagera tibari ne chinguru, babeire buna abakungu. Chinyomba chia Babiloni chiasambirwe, na emekorogoto yabo y’ebiita yabunirwe.
ⅩⅩⅪ Omominyoki oyomo naminyoke aumerane noyonde, na omotomwa oyomo naminyoke aumerane noyonde, kogenda goteebia omorwoti o Babiloni ng’a omochie obwatirwe ase chinsemo chiaye chionsi,
ⅩⅩⅫ naende ng’a ebiambokero biabwatirwe, amaagacho ogwekengera asambirwe nomorero, na abasikari baondokire.
ⅩⅩⅩⅢ Aya nar’Omonene bw’Emeganda, Nyasae bw’Abaisraeli, agoteeba: Abanto ba Babiloni babeire buna ekeooreri gi’okoorera kiaroisigwe ase ogotachwa. Engaki netigarete enke, erio rigesa riaye riike.
ⅩⅩⅩⅣ “Nebukadinesaro, omorwoti o Babiloni, ondiire, onsegenyire;
ontigire inde bosa buna ekebekerero getabwati gento.
Omerire inche buna enchoka ekomera egento.
Oichoirie enda yaye n’ebinto biane ebiya,
ontigire inde bosa.
ⅩⅩⅩⅤ Obobe bw’obotindi bwakoretwe ase ’nde na ase abaminto
nabobekwe igoro ya Babiloni.
Tiga abanto ba Sayoni bateebe:
Okomocha kw’ogoiterwa kw’amanyinga aito,
tiga kobe igoro ase Abakalidayo.”
Nyasae nakonye Abaisraeli
ⅩⅩⅩⅥ Ase ayio aya nar’Omonene agoteeba: “Naama! Nimbarwanerere inwe, mbaruserie egesiomba. Ninkamie enyancha ya Babiloni, nkamie ne chinsoko chiaye chionsi.
ⅩⅩⅩⅦ Babiloni nosirigwe obe etui y’amatongo ase chisese chi’orosana chiramenye. Abanto tibakomenya aroro, korende nigo barabe bagoichanigwa na koyochecheria.
ⅩⅩⅩⅧ Abanto ba Babiloni nabaronye amo buna chindo chikoronya; nabarere buna chindo chinsae.
ⅩⅩⅩⅨ Ekero bare ne ribero rinene, nimbakorere omoyega, erinde banywe, batinde na kogoka. Erio baraare chitoro chintambe, tibaboka. Nabo inche Omonene natebiire.
ⅩⅬ Nimbarente banyenywe buna chimanwa chi’eching’ondi, ne chimingichi amo ne chigoree chikonyenywa.”
Ogosirigwa kwa Babiloni
ⅩⅬⅠ “Naki Sesaki, nero Babiloni, eyere ogotogigwa gw’ense yonsi, yabwatirwe na koondokia ebisaku binde!
ⅩⅬⅡ Enyancha yaumokire igoro ase Babiloni, emerindo y’enyancha yayetubire.
ⅩⅬⅢ Emechie y’ense eyio yasirigwe yabeire ey’okoondokia, yabeire enyomo na erooro, ense etamenyiri na monto onde, na Mwanyabaanto onde tagoeta aroro.
ⅩⅬⅣ Ning’ee enyasae Beli ya Babiloni egesusuro, nindusie korwa ase omonwa oye ebi yamerete. Ebisaku tibikogenderera gocha ase enyasae eyio.
“Chindwaki chia Babiloni chiagure.
ⅩⅬⅤ Inwe abanto baane, tama morue aroro! Kera omonto atoorie obogima bwaye korwa ase endamwamu enene y’Omonene.
ⅩⅬⅥ Timokwa emioyo, gose timoiroka, ekero moraigwe amang’ana agocha ase ense. Omwaka oyomo nigo moraigwe amang’ana gete, na omwaka onde moigwe ayande. Boigo obotindi nigo bore ase ense, na omogambi oyomo nigo akorwana noyonde.
ⅩⅬⅦ Ase ayio, amatuko ngocha are, ekero ndarente egesusuro ase emegwekano y’ogosasimwa ya Babiloni. Ense eyio yonsi nenyore obosooku, na abanto baye mbaiterwe aroro agwo.
ⅩⅬⅧ Erio igoro na ense, na ebinto bionsi bireo, mbitere nomochengo, ekero abasaria bararue sugusu gocha gosaria Babiloni. Nabo inche Omonene natebiire.
ⅩⅬⅨ Babiloni goika esirigwe, ekiagera yagerete Abaisraeli abange bagakwa, naende boigo yaitete abanto abange mono b’ense yonsi.”
Amang’ana a Nyasae ase Abaisraeli bamenyete Babiloni
Ⅼ “Inwe abamwatoorekire korwa ase emioro, genda, timobaisa goteebana. Mong’inyore inche Omonene, ekero more ase ense y’aare, moyorengererie mono Yerusalemu.
ⅬⅠ Inwe nigo mogoteeba: Intwe twanyorire obosooku, ekiagera twabeire togochecherigwa. Obosooku bw’ogochaywa bwatubire amaiso aito, ekiagera abanto b’egesaku ekegeni basoire Aase Aachenu ime ye hekalu y’Omonene oito.
ⅬⅡ Inche Omonene nigo ngoteeba iga: Ase engencho eyio, rora, amatuko ngocha are, ekero ndanachere emegwekano egosasimwa ya Babiloni ekiina na abanto bonsi baakirwe chingoma nababe bakonakweumia ase ense eyio yonsi.
ⅬⅢ Babiloni, noisa gotiira gochia igoro, noisa kwegitera chindwaki chinkong’u, ne chintambe gochia igoro, inche nintome abagosiria bayosirie. Inche Omonene nakwanire.”
Babiloni okogenderera gosirigwa
ⅬⅣ “Tegerera moigwe ekerero gekorwa Babiloni.
Eriogi ri’ogosirigwa okonene riarure ase ense y’Abakalidayo.
ⅬⅤ Inche Omonene nasiririe Babiloni;
nakiririe amariogi amanene arengeo.
Emerindo egocha aroro nigo ekoeera buna amaache amange,
eriogi riabo rinene nigo riraigugwe.
ⅬⅥ Abagosiria bachire gosiria Babiloni;
abarwani baye chituoni bairirwe,
amata abo abunirwe.
Inche Omonene nigo inde Nyasae bw’ogoakana egesiomba,
ekeene goika ngeakane kegima.
ⅬⅦ Ninyoisie na gotindia abanene b’oborwoti bwa Babiloni
na abanto baye abang’aini;
na abagaambi baye, na abachiki baye, na abarwani baye chituoni.
Barabwo mbaraare chitoro chintambe, tibaboka.
Nabo inche omorwoti inde Omonene bw’Emeganda ngoteeba.”
ⅬⅧ Aya naro inche Omonene bw’Emeganda ngoteeba:
Chindwaki chinetu chia Babiloni nachiyerigwe inse,
na ebiita biaye ebitambe gochia igoro mbisambwe nomorero.
Emeremo abanto bagokora nebe bosa; ebisaku nigo bikwerosia bosa ase emeremo erasambwe nomorero.
Amang’ana a Yeremia agotomwa gochia Babiloni
ⅬⅨ Aya naro amang’ana Yeremia omobani achigete Seraya mosinto o Neria, omochokoro o Maaseya, ekero agendete Babiloni amo na Zedekia, omorwoti bw’Abayuda, ase omwaka o kane bw’okogamba gwa Zedekia. Seraya nigo arenge omoteneneri bw’aase agotimokerwa.
ⅬⅩ Yeremia akarika ase egetabu obobe bwonsi bware gocha konyora Babiloni, amo namang’ana ande onsi igoro ya Babiloni.
ⅬⅪ Yeremia agateebia Seraya, “Ekero oraike Babiloni, orore ng’a gwasomire amang’ana aya onsi.
ⅬⅫ Erio otebe: Aye Omonene gwateebire ng’a nosirie aase aiga kegima, gento kende tikemenyao, Mwanyabaanto gose ching’iti, na ense eye nesirigwe ebe erooro kogenderera botambe.
ⅬⅩⅢ Na ekero gwakoorire gosoma egetabu eke, oyesiberanie rigena, oyerute ime ase orooche rw’Eufarati.
ⅬⅩⅣ Erio otebe iga: Naboigo Babiloni erarimere, gochia inse, teimoka naende nonya ng’ake, ase engencho y’obobe nkorenta ase ense eyio, goika obwo bobagoyie.” Amang’ana a Yeremia aereire aiga.