Ⅸ
Ⅰ Onye ndiria omotwe one ore koba buna ensoko y’amaache,
na amaiso aane buna orooche rw’amariga,
nigo nare korera omobaso na obotuko
ase engencho y’ogoitwa kw’abaanto baane bakwete.
Ⅱ Onye ndiria nare konyora aase ngotimokera ase erooro,
anga nagenda aare, ntige abanto baane,
ekiagera bonsi nabatomani, bagosasiima emegwekano;
barabwo nomoganda bw’abasigaani.
Ⅲ Abanto abwo nigo bagokumba chimeme chiabo buna amata;
oborimo nigo bomentete koba obonge kobua ekeene ase ense yabo.
Omonene nigo agoteeba iga:
“Nigo bagendererete komenta ebibe ase ebibe binde,
gose tibamanyeti inche.”
Ⅳ Kera omonto goika erite korwa ase omogisangio oye,
gose onde tabaisa kwegena oyomwabo,
ekiagera kera oyomo nomoitania,
are na kera omogisangio nigo agoetanana gokwana amang’ana ’obogenki.
Ⅴ Kera omonto nigo akong’aina omogisangio oye;
nonya noyomo tari gokwana ekeene,
ekiagera banaririe chimeme chiabo gokwana oborimo.
Nigo bagokwana oborimo goika berosirie ase ogokora amabe.
Ⅵ Omonene oteebire ng’a ase omenyete abanto nigo bagokora oborianania ase oborianania bonde.
Na obong’ainereria ase obong’ainereria bonde,
bangire konyigwera.
Ⅶ Ase ayio, aya nar’Omonene bw’Emeganda agoteeba:
“Nimbanyititore ase okobachena na kobateema.
Ngento ki rende ndanyare gokorera abanto baane?
Ⅷ Chimeme chiabo nigo chinga buna chinsara chigoita,
ekiagera nigo chigokwana amang’ana ’obong’ainereria.
Kera omonto nigo agokwana amang’ana ’omorembe ase omogisangio oye ase ebikoba igoro,
korende ime ase enkoro yaye nigo akoroberia komotegera omotego.
Ⅸ Inee! Tinkobaa egesusuro ase engencho y’amang’ana ayio?
Tinkweruseria egesiomba ase egesaku kenga buna eke?”
Nab’Omonene akwanire.
Ⅹ “Nindere ase engencho y’ebitunwa, ninyeumie ase engencho y’amarisia e chirooro,
ekiagera biomire na gosareka.
Monto onde tagoeta ase egati yabo, na amariogi e chiombe chikwana tari koigugwa;
chinyoni ne ching’iti chi’orosana chiatamire chiachiire.
Ⅺ “Ninsarie Yerusalemu obe ebinge chi’amaturi
na amakuruma e chisese chi’orosana.
Ninsarie emechie ya Yuda ebe bosa
aase omonto atanyare komenya.”
Ⅻ Aye Omonene ng’ai omonto omong’aini are oyoranyare komanya engencho y’amang’ana aya? Ning’o aye Omonene gwakwanire nere, oyio oranyare goteeba egekogera ense yabeire ritongo, na yasarekire buna erooro omonto atanyare goeta ase egati yaye?
ⅩⅢ Omonene nigo akoiraneria: “Aya nigo akorekanire, ekiagera batigire ogochika kwane nabaete, bangire konyigwera na kobwatia chinchera chiane.
ⅩⅣ Basaririe na babwatirie ebirengererio bie chisokoro chiabo, batunyanire chinyasae chikorokwa Baali, buna chisokoro chiabo chiaborokereretie.
ⅩⅤ Ase ayio, aya nar’Omonene bw’Emeganda, Nyasae bw’Abaisraeli, agoteeba: Rora, nae abanto aba ebimeri ebiroro barie, na amaache are nobosongo banywe.
ⅩⅥ Nimbaserie gochia ase ebisaku ebio barabwo gose chisokoro chiabo chitabimanyete, nimbatomere abasikari bare nemioro baabaite baabasirie kegima.”
Abanto ba Yerusalemu bakorera ng’a bakonywe
ⅩⅦ Aya nar’Omonene bw’Emeganda agoteeba:
“Rengereria amang’ana aya!
Rangeria abakungu abamanyete kobokia amagombo bachiche!
Toma abanto barangerie abakungu abegerete ayio bachiche!”
ⅩⅧ Abakungu abwo tiga baayerere gocha barere na kobokia amagombo ase tore,
erinde amariga aiteke korwa ase amaiso aito,
na amaiso aito aichorwe naro.
ⅩⅨ Eriogi ri’okorera riaigwekanire korwa Sayoni, rikobora:
Twasirigwe kegima!
Twanyorire obosooku obonene.
Goika torue ase ense yaito,
ekiagera ababisa batagoire chinyomba chiaito.
ⅩⅩ Inwe abakungu, igwera ring’ana ri’Omonene;
amato aino tiga aigwe ring’ana akwanire.
Orokereria abaiseke baino bamanye kobokia amagombo,
na kera omokungu orokererie omogisangio oye amanye kweumia.
ⅩⅪ Amakweri aeteire ase ebibao biaito,
asoire ase chinyomba chiaito chi’obonene, aitire abana ase chinchera,
na abasae ase chichiiro.
ⅩⅫ Kwana: “Aya nar’Omonene agoteeba:
Abanto mbakwe, na emebere yabo esiarerwe aande onsi,
ebe buna esike ase emegondo,
na buna emesaima yatigetwe nabagesi,
onde takoyesangereria.”
ⅩⅩⅢ Aya nar’Omonene agoteeba:
“Omonto omong’aini tabaisa gwetogeria obong’aini bwaye, gose
oyore omonene obonene bwaye,
gose oyore omonda obonda bwaye.
ⅩⅩⅣ Korende onye omonto origetie gwetogia,
tiga etogie ng’a namanyete inche,
ekiagera inche Omonene nigo inde nobwanchani botari koera.
Ngokora ayare ay’ekeene na oboronge ase ense,
ekiagera ayio naro akongokia.
Ninche Omonene nakwanire.”
ⅩⅩⅤ Naende Omonene nigo agoteeba: “Rora, amatuko ngocha are, inche ndabae egesusuro abanto baria bonsi baarogete, ko nonya nabo nigo bare buna abatarogeti.
ⅩⅩⅥ Abanto abwo nabwo aba: Abamisiri, na Abayuda, na Abaedomu, na Abaamoni, na Abamoabu, amo nabaanto bonsi bamenyete ase erooro, abwo bakonacha chitukia chiabo mesia. Abanto aba bonsi b’ebisaku tibarogeti, boigo na Abaisraeli bonsi tibarogeti ase chinkoro chiabo ime.”