Ⅰ +Abaisraeli bakabua abarwoti na bakaira ense yarenge ng’umbu, moocha ya Yorodani, korwa rigoko ri’Arinoni goika egetunwa kia Herimoni, amo n’Ekerubo Ekiomo, ensemo ya moocha. Abarwoti abwo nabwo aba: Ⅱ Oyomo obo nere Sihoni, omorwoti bw’Abaamori. Ere nigo amenyete Hesiboni, akagamba korwa Aroeri ore ensinyo ye rigoko ri’Arinoni, na korwa gati‐gati ye rigoko riria goika orooche rwa Yaboki, orore ribebe ri’Abaamoni. Ense eyio nekeng’ese kia Gileadi. Ⅲ Naende akaba okogamba ase rikura ria Yorodani, moocha y’enyancha ya Galili goika Beti‐Yesimoti, ensemo ya moocha y’Enyancha y’omonyoo*, eyere ase orogongo rwa Araba†, gochia Irianyi goika ebitirimboko bi’egetunwa gia Pisiga.

Ⅳ Naende bakabua Ogi, omorwoti o Basani, oyorenge oyomo bw’Abarefai abwo batigarete. Ere nigo amenyete ase Asitaroti na Edirei, Ⅴ akaba okogamba ase egetunwa kia Herimoni, na ase Saleka, na ase Basani engima goika orobebe rw’Abagesuri na Abamaaka, amo nekeng’ese kende kia Gileadi goika orogongo rwa Sihoni, omorwoti o Hesiboni. Ⅵ +Abarwoti abwo konya babuirwe na Musa omosomba bw’Omonene amo n’Abaisraeli. Musa, omosomba bw’Omonene, konya oeire Abareubeni na Abagadi, amo nekeng’ese ki’egesaku kia Manase, ense eria ebe eyabo.

Ⅶ Yoshua na Abaisraeli bakabua na goita abarwoti bonsi abamenyete bosongo ya Yorodani, gochakera Baali‐Gadi ase ebate ya Lebanoni goikera egetunwa kia Halaki, kegotiirerwa gochia Edomu. Yoshua agaatananera kera egesaku ki’Abaisraeli ense eria ekaba eyabo. Ⅷ Ense eria ekabwaterania ense y’ebitunwa, na ense omweya, na Ekerubo Ekiomo, na ebitirimboko bi’ebitunwa, amo nerooro, na Negebu, na ense y’Abahiti, na ey’Abaamori, na ey’Abakanaani, na ey’Abaperisi, na ey’Abahivi, na ey’Abayebusi. Abarwoti abwo babuetwe nabwo aba: Ⅸ Omoruoto o Yeriko, na oyo bwa Ai, ang’e na Beteli, Ⅹ na oyo o Yerusalemu, na oyo o Heburoni, Ⅺ na oyo o Yarimuti, na oyo o Lakisi, Ⅻ na oyo bw’Egiloni, na oyo o Geseri, ⅩⅢ na oyo o Debiri, na oyo o Gederi, ⅩⅣ na oyo o Horima, na oyo bw’Aradi, ⅩⅤ na oyo o Libuna, na oyo bw’Adulamu, ⅩⅥ na oyo o Makeda, na oyo o Beteli, ⅩⅦ na oyo o Tapua, na oyo o Heferi, ⅩⅧ na oyo bw’Afeki, na oyo o Lasaroni, ⅩⅨ na oyo o Madoni, na oyo o Hasori, ⅩⅩ na oyo o Simuroni‐Meroni, na oyo bw’Akisafu, ⅩⅪ na oyo o Taanaki, na oyo o Megido ⅩⅫ na oyo o Kedesi, na oyo o Yokinamu, ang’e na Karimeli, ⅩⅩⅢ na oyo o Dori, ase orogongo rwa Dori, na oyo o Goimu ase Giligali, ⅩⅩⅣ na oyo o Tirisa. Abarwoti abwo bonsi nigo barenge emerongo etato nomo (31).