ⅩⅪ
Emechie y’Abalawi
Ⅰ Abateneneri be chiamate chi’Abalawi bagaacha ase Eleazari, Omokuani, na Yoshua, mosinto o Nuni, na ase abateneneri be chiamate chi’ebisaku bionsi bi’Abaisraeli,
Ⅱ bagakwana nabarabwo agwo Silo, bakabateebia, “Omonene nigo achigete goetera ase Musa ng’a toegwe emechie ase tokomenya, amo namarisio, ase chitugo chiaito chirarisie.”
Ⅲ Ase igo Abaisraeli bakaa Abalawi emechie gete amo namarisio arengeo korwa ase emiando yabo, koreng’ana buna Omonene achigete.
Ⅳ Obomera bokagwera chiamate chi’Abakohati buna iga: Abalawi abarenge b’ororeria rwa Aroni, Omokuani, bakanyora emechie ikomi na etato korwa ase egesaku kia Yuda, na egia Simioni, na ekia Benjamini, buna obomera bwabagwerete.
Ⅴ Na Abakohati abatigarete bakanyora emechie ikomi korwa ase chiamate chi’egesaku ki’Efraimu na ekia Dani, na ekeng’ese kia Manase, buna obomera bwabagwerete.
Ⅵ Abagerisoni bakanyora emechie ikomi na etato korwa ase chiamate chi’egesaku gia Isakaru, na egi’Aseri, na ekia Nafutali, na ekeng’ese ki’egesaku kia Manase agwo Basani, buna obomera bwabagwerete.
Ⅶ Abamerari bakanyora emechie ikomi na ebere ase chiamate chiabo korwa ase chiamate chi’egesaku kia Rubeni, na ekia Gadi, na egia Sabuloni.
Ⅷ Nabo Abaisraeli baete Abalawi emechie eyio amo namarisio arengeo, ase ogoaka obomera, buna Omonene konya achiikire goetera ase Musa.
Ⅸ Korwa ase egesaku kia Yuda, na egia Simioni bakarua emechie eyio egwatorwa aiga.
Ⅹ Obomera bw’eritang’ani bokagwera abanto b’ororeria rwa Aroni, eamate eyemo y’Abakohati, abarenge Abalawi.
Ⅺ Barabwo bakaegwa Kiriati‐Ariba (noro Heburoni), ase ense y’ebitunwa ya Yuda, amo namarisio aetanaineo. (Ariba nigo arenge sokoro y’Anaki.)
Ⅻ Korende emegondo amo nebichie bi’omochie oyio konya baeire Kalebu, mosinto o Yefune, bikaba omwando oye.
ⅩⅢ Eye nero emechie abanto b’ororeria rwa Aroni Omokuani baetwe: Heburoni, omochie oyio abaiti ba mosiabano baare gotamera, na Libuna,
ⅩⅣ na Yatiri, na Esitemoa,
ⅩⅤ na Holoni, na Debiri,
ⅩⅥ na Aini, na Yuta, na Beti‐Semesi, emechie kianda, amo namarisio arengeo, korwa ase ebisaku ebio bibere.
ⅩⅦ Korwa ase egesaku kia Benjamini bakaegwa Gibeoni, na Geba,
ⅩⅧ na Anatoti, na Alamoni, emechie ene, amo namarisio arengeo.
ⅩⅨ Emechie yonsi abanto b’ororeria rwa Abakuani baetwe nigo yarenge ikomi na etato; bakayeegwa, amo namarisio arengeo.
ⅩⅩ Abanto be chiamate chinde chi’Abakohati, abarenge Abalawi, bakaegwa emechie korwa ase egesaku gi’Efraimu, buna obomera bwabagwerete.
ⅩⅪ Bakaegwa Sekemu, omochie oyomo abaiti ba mosiabano baare gotamera, ase ense y’ebitunwa y’Efraimu, na Geseri,
ⅩⅫ na Kibusaimu, na Beti‐Horoni, emechie ene, amo namarisio arengeo.
ⅩⅩⅢ Na korwa ase egesaku gia Dani bakaegwa Eliteke, na Gibetoni,
ⅩⅩⅣ na Ayaloni, na Gati‐Rimoni, emechie ene, amo namarisio arengeo.
ⅩⅩⅤ Na korwa ase ekeng’ese ki’egesaku kia Manase bakaegwa Taanaki na Gati‐Rimoni, emechie ebere, amo namarisio arengeo.
ⅩⅩⅥ Abanto be chiamate echio chi’Abakohati nigo baetwe emechie eyio ikomi, amo namarisio arengeo.
ⅩⅩⅦ Abagerisoni, chiamate chinde chi’Abalawi, bakaegwa korwa ase ekeng’ese ki’egesaku kia Manase Golani o Basani, omochie abaiti ba mosiabano baare gotamera, na Besitera, emechie ebere, amo namarisio arengeo.
ⅩⅩⅧ Na korwa ase egesaku gia Isakaru bakaegwa Kisioni, na Daberati,
ⅩⅩⅨ na Yarimuti na Eni‐Ganimu, emechie ene, amo namarisio arengeo.
ⅩⅩⅩ Korwa ase egesaku gi’Aseri bakaegwa Misali, na Abidoni,
ⅩⅩⅪ na Helikati, na Rehobo, emechie ene, amo namarisio arengeo.
ⅩⅩⅫ Na korwa ase egesaku kia Nafutali bakaegwa Kedesi o Galili, omochie abaiti ba mosiabano baare gotamera, na Hamoti‐Dori, na Karitani, emechie etato, amo namarisio arengeo.
ⅩⅩⅩⅢ Nabo abanto be chiamate chionsi chi’Abagerisoni baetwe emechie ikomi na etato, amo namarisio arengeo.
ⅩⅩⅩⅣ Korwa ase egesaku gia Sabuloni, Abalawi abatigarete, chiamate chia Merari, bakaegwa emechie ya Yokinamu, na Karita,
ⅩⅩⅩⅤ na Dimuna, na Nahalali, emechie ene, amo namarisio arengeo.
ⅩⅩⅩⅥ Na korwa ase egesaku kia Rubeni bakaegwa Beseri, na Yahasi,
ⅩⅩⅩⅦ na Kedemoti, na Mefaati, emechie ene, amo namarisio arengeo.
ⅩⅩⅩⅧ Korwa ase egesaku kia Gadi bakaegwa Ramoti o Gileadi, omochie abaiti ba mosiabano baare gotamera, na Mahanaimu,
ⅩⅩⅩⅨ na Hesiboni, na Yaeseri, emechie ene, amo namarisio arengeo.
ⅩⅬ Nabo abanto b’eamate ya Merari, abatigarete ase chiamate chi’Abalawi, baetwe emechie ikomi na ebere, buna obomera bwabagwerete.
ⅩⅬⅠ Emechie yonsi y’Abalawi eyarenge ase egati y’omwando bw’Abaisraeli nigo yarenge emerongo ene, na etano na etato, amo namarisio arengeo.
ⅩⅬⅡ Kera omochie bw’eyio nigo orenge namarisio aetanaineo, Nabo arenge ase emechie eyio yonsi.
Abaisraeli bakoira ense eria
ⅩⅬⅢ Ase ig’Omonene akaa Abaisraeli ense eyio yonsi arierete chisokoro chiabo eira ng’a nabayee; barabwo kobayeeirwe bakamenya aroro.
ⅩⅬⅣ Omonene akabaa obotoereru ase chinsemo chionsi, buna arierete chisokoro chiabo eira ase ogotiana. Onde tarenge ase ababisa babo obabuete, ekiagera Omonene abegete ababisa babo bonsi ase amaboko abo.
ⅩⅬⅤ Nab’Omonene aikeranetie chiira chionsi chingiya echi abarierete Abaisraeli. Ende teri etaikeranetigwe.