Ⅶ
Yeso okogwenia omosomba bw’omotang’ani bw’abarwani bekerumi
(Mat 8:5-13)
Ⅰ Magega Yeso gakorire gokwana amang’ana onsi aria arigetie abanto baigwe, agasoa Kapernaumu.
Ⅱ Omosomba oyomo bw’omotang’ani bw’abarwani rigana konya onyarekire nigo arenge ang’e nogokwa; ere nomonto anchete mono.
Ⅲ Agachia koigwa amang’ana igoro ya Yeso, agatoma asare abagaaka b’Abayahudi komoboria ache agwenie omosomba oye.
Ⅳ Na barabwo bagachia goika ase Yeso, bakamosorora, bakaboora, “Nagwenerete omokorere ring’ana eri,
Ⅴ ekiagera nanchete abanto baito, naende natoagacherete esinagogi yaito.”
Ⅵ Yeso akagenda amo nabarabwo. Goika agachia koba tari are ase enyomba yaye, oria omotang’ani bw’abarwani agatoma abasani asare, okomoteebia, “Omonene, tibwerosia, ekiagera inche ting’isaini aye orasoe inse y’ekerama kiane.
Ⅶ Ase ayio nigo neroche ng’a ting’isaini gocha ase ore; korende kwana ring’ana rioka, na omosomba one nagwene.
Ⅷ Naki inche nomonto mbekire inse ase okobua, naende ninde nabasikari inse yane. Kondateebie oyo: Genda, ogenda, na oyonde: Inchuo, ocha; na omosomba one: Kora iga, okora.”
Ⅸ Yeso agachia koigwa aya, agakumia asare, akeonchorera omoganda orenge komotunyana, akabora, “Nabatebirie: Nonya nase Abaisraeli tindanyora okwegena okore buna oko.”
Ⅹ Nabo baria batometwe bagachia koirana nyomba mwaye, bakanyora omosomba oria otimokire.
Yeso okobokia omwana omomura bw’omoboraka
Ⅺ Magega ase aya akagenda omochie okorokwa Naini; aborokigwa baye bakagenda amo nere, na abanto abange.
Ⅻ Nabo, agachia goika ang’e ase egeita ki’omochie, rora, agwo nkiarengeo egetondo kebogoirie gocha isiko, omwana omomoima ase ng’ina, na ng’ina nomoboraka orenge, na abanto abange b’omochie mbarenge amo nere.
ⅩⅢ Na ekero Omonene achia komoorora akamororera amaabera, akamoteebia, “Torera!”
ⅩⅣ Akagenda ang’e, agakuna esanduki; baria babogoretie esanduki bagatenena. Erio agakwana, “Omomura, nagotebirie, imoka!”
ⅩⅤ Omonto oria egetondo akaboka, agaikaransa, agachaaka gokwana. Yeso akamomoa ng’ina.
ⅩⅥ Omoondoko okabwata bonsi, bagatogia, Nyasae, bakaboora, “Omobani omonene oorokire ase egati yaito!” Na “Nyasae ocheire abanto baye!”
ⅩⅦ Chinkuma chiaye chigasarera ase ense yonsi ya Boyahudi, na ense yonsi yaetanaine.
Abatomwa korwa ase Yohana omobatisi
(Mat 11:2-19)
ⅩⅧ Aborokigwa ba Yohana bakamoteebia aya onsi,
ⅩⅨ erio Yohana akarangeria babere ase aborokigwa baye, akabatoma ase Omonene komoboria, “Aye naye oria ogocha, gose toganye omoao?”
ⅩⅩ Ekero abanto abwo baikire asare, bakamoteebia, “Yohana Omobatisi ototomire ase ore, okobora: Aye naye oria ogocha, gose toganye omoao?”
ⅩⅪ Ase engaki eria Yeso akagwenia abanto abange abarenge namarwaire, na emechando, na babwatire n’Omoika omobe; na abange abarenge emeuko akabaramokia amaiso abo, bakarora.
ⅩⅫ Akabairaneria, akabateebia, “Genda moteebie Yohana ayamwarora na aya mwaigwa: Abarenge emeuko nkorora bare, abarenge amagata ngotaara bare, abarenge noborwaire bwa ukoma basibekire, abarenge emetino nkoigwa bare, abare ebitondo nkobokigwa bare, na abataka nkoranderigwa bare amang’ana amaya.
ⅩⅩⅢ Nasesenirie onde bwensi otagochiri nainche.”
ⅩⅩⅣ Na abatomwa baria ba Yohana bachia kogenda, agachaaka goteebia omoganda igoro ya Yohana, “Inki mwachiete korora aria ase erooro? Egetonto gekonyegerigwa nembeo?
ⅩⅩⅤ Ninki mwachiete korora? Nomonto oboyirie chianga chinterere? Rigereria, abakweboyia chianga chingiya mono, na koria obwansu bw’omogooko, nigo bare ase chinyomba chi’abarwoti.
ⅩⅩⅥ Ninki mwachiete korora? Omobani? Ee, nabateebirie: Oyore omonene kobua omobani,
ⅩⅩⅦ ekiagera oyio nere amang’ana aya ariikire igoro yaye,
“Rigereria, inche natomire omotomwa one ase obosio bwao,
oyo oratang’ane koroisia enchera yao.
ⅩⅩⅧ Nigo nkobateebia: Ase baria baiboire nabakungu, mobani onde taratoka ore omonene kobua Yohana, korende oyore omoke ase oborwoti bwa Nyasae nomonene komobua.”
ⅩⅩⅨ (Abanto bonsi na abarusia ebango bagachia koigwa aya, bakaorokia oboronge bwa Nyasae, ekiagera baabatisetwe ase ebatiso ya Yohana;
ⅩⅩⅩ korende Abafarisai na abanto b’amachiiko bagakana omooroberio o Nyasae ase bare abanyene, ekiagera tibaabatisetwe na Yohana.)
ⅩⅩⅪ Yeso akagenderera gokwana akabora, “Ninki ndagwekanie abanto b’ekegori eke? Barabwo ninki bagwekaine?
ⅩⅩⅫ Nigo bagwekaine nabana baikaransete ase echiiro, bakorangerania, bakobora,
“Twababugeirie ebiroria, na inwe timotengeti;
tweumirie, na inwe timorereti.
ⅩⅩⅩⅢ Naki Yohana Omobatisi nigo achete, tare koria omogati, gose tare konywa edivai; na inwe mogoteeba: Nabwatire nekerecha.
ⅩⅩⅩⅣ Omwana‐o‐Mwanyabaanto ochire, okoria na konywa, na inwe mogoteeba: Rora, nomonto omoribobe, ogotinda edivai, omosani bw’ababarusia ebango na abanyene ebibe!
ⅩⅩⅩⅤ Korende obong’aini bwa Nyasae bwamanyekanire koba oboronge ase abana baye bonsi.”
Yeso okwabera omokungu omonyabibe
ⅩⅩⅩⅥ Omonto oyomo bw’Abafarisai akamoarigania ache koria endagera amo nere. Agasoa ase enyomba y’Omofarisai oria, agaikaransa ase endagera.
ⅩⅩⅩⅦ Na rora, omokungu oyomo ase omochie oria, oyorenge omonyene ebibe, agachia konyora amang’ana ng’a oikaransire ase enyomba y’Omofarisai oria, akarenta echuba ye rigena rirabu ere namaguta e rimisu rigiya,
ⅩⅩⅩⅧ agatenena korwa magega, ang’e namagoro aye, okorera. Agachaaka komoiyereria amariga aye ase amagoro aye, na koyatinyia netukia y’omotwe oye, okonyunyunta amagoro aye, na koyaaka amaguta aria.
ⅩⅩⅩⅨ Omofarisai, oria omoariganetie, agachia koyarora akeboria ase omoyo oye ime, ogoteeba, “Omonto oyo, onye nomobani orenge, anga namomanya oyo ng’a nere ng’o, gose mokuungu ki oyo okomokuna, ng’a nomonyene ebibe.”
ⅩⅬ Yeso akamoteebia, “Simioni, ninde ne ring’ana nkogoteebia.”
Akabora, “Omworokia, kwana.”
ⅩⅬⅠ “Omonto oyomo omorua singo orenge nabasira babere; oyomo omoriete esira ye chidinari amagana atano (500), na oyo o kabere emerongo etano (50).
ⅩⅬⅡ Barabwo tibarenge na gento bagoakana. Akabaabera bonsi babere. Gaki, ase abwo, ning’o oramwanche kobua?”
ⅩⅬⅢ Simioni akairaneria, “Igo ndabore ng’a, noria bwaberetwe ebinge.”
Yeso akamoteebia, “Kwanachire boronge.”
ⅩⅬⅣ Akaonchoka gochia ase omokungu oria, agateebia Simioni, “Kwarorire omokungu oyo? Inasoa mwao, tikwang’a amaache ay’ogwesibia amagoro, korende oyo osibirie amagoro aane namariga aye, na koyatinyia netukia y’omotwe oye.
ⅩⅬⅤ Tonyunyunteti, korende ere korwa ekero nasoete aa tatigeti konyunyunta amagoro aane.
ⅩⅬⅥ Tong’ageti omotwe one amaguta, korende ere ong’akire amagoro aane amaguta agotioka buya.
ⅩⅬⅦ Ase engencho eyio nagotebirie, obwanchani bwaye bworokirie ng’a ebibe biaye ebinge biabeirwe; ere oyokwaberwa ebike nigo anchete ake.”
ⅩⅬⅧ Agateebia omokungu oria, “Kwabeirwe ebibe biao.”
ⅩⅬⅨ Na baria baikaransete amo nere bagachaaka goteeba ase emioyo yabo ime, “Nere ng’o oyo oranyare kwabera ebibe?”
Ⅼ Agateebia omokungu oria, “Okwegena kwao kwagotooririe; genda nomorembe.”