ABALAWI
Ogochaakera
Egetabu kia Abalawi nigo kebwate amachiiko igoro y’ogosasiima boigo n’emeyega ende y’edini ase chingaki chinkoro chi’Abaisraeli, boigo nase abakuani abwo baganeirie goikerania amachiiko ayio.
Ekerenga ekenene ki’egetabu eke n’obochenu bwa Nyasae boigo n’echinchera echio abanto baye baganeirie gosasiima na komenya erio korenda oboamate bwabo nere.
Amarieta amaya y’engencho korwa ase egetabu eke naria Yeso arogete amachiiko a kabere amanene: “Ancha oyomino buna bweanchete aye omonyene”. (19.18)
Okobagwa kw’egetabu eke:
Amachiiko igoro y’ebiruegwa na ebing’wanso 1:1—7:38
Ogwatananwa kwa Aroni na abamura baye babe abakuani 8:1—10:20
Amachiiko igoro y’ogocheneka na ogotacheneka 11:1—15:33
Rituko ri’Okobwatanigwa 16:1-34
Amachiiko igoro y’obochenu bw’obogima na obw’ogosasiima 17:1—27:34
Ⅰ
Ekeng’wanso ki’ogosaambwa
Ⅰ Omonene akarangeria Musa, agakwana nere korwa ase Eema y’Omosangererekano, akamoteebia.
Ⅱ “Kwana n’Abaisraeli, obateebie ng’a ekero omonto onde bwensi akorwa ase egati yabo akondeetera inche Omonene eng’iti y’ekeng’wanso, ayerusie korwa ase chiombe gose ching’ondi, gose chimbori.
Ⅲ Onye ekeng’wanso ki’ogosaambwa gekorwa ase amaicho chiombe, igo keraabe eki’eeri etari na kemocho ase omobere oye, ayerente agwo ase egesoero ki’Eema y’Omosangererekano, erinde inche ’mwanchere.
Ⅳ Omonto oria goika abeeke okoboko kwaye igoro ase omotwe bw’eng’iti eria ekoruegwa ekeng’wanso ki’ogosaambwa, erinde yancherwe ase okobwatania omonto oria amo n’ Omonene Nyasae.
Ⅴ Erio omonto oria onyeenyete eeri eria ensae agwo ase obosio bwane inche Omonene, na abakuani, abamura ba Aroni, barente amanyinga bayasiarere chinsemo chionsi chi’egesasiimero kere agwo ase egesoero ki’Eema y’Omosangererekano.
Ⅵ Naende arusie riiyo ri’eng’iti eria ekoruegwa ekeng’wanso, ayenachane ebitari,
Ⅶ na abamura ba Aroni Omokuani baute omorero ase egesasiimero, bachooke chinko ase omorero oyio.
Ⅷ Naende abakuani, abamura ba Aroni, babeeke ebitari biria, amo nomotwe n’ebitinya, igoro ase chinko chiria chire ase omorero bw’egesasiimero.
Ⅸ Korende chinyama chi’enda, amo nebirenge bia magega, bisibigwe namaache. Omokuani oria otenenerete asaambe eng’iti eria yonsi ase egesasiimero, ebe ekeng’wanso ki’ogosaambwa n’omorero, kere ne rimisu rigiya rikongwenera inche Omonene.
Ⅹ “Onye omonto okorua ekeng’wanso ki’ogosaambwa, korwa ase amaicho ye ching’ondi, gose chimbori, nigo araarente emingichi, gose egoree, etari na kemocho ase omobere oye.
Ⅺ Erio ayenyeenyere ase ensemo ya sugusu y’egesasiimero, agwo ase obosio bwane inche Omonene, na abakuani, abamura ba Aroni, basiarere amanyinga aria ase egesasiimero chinsemo chionsi.
Ⅻ Naende anachane eng’iti eria ebitari, na Omokuani oria otenenerete, abichooke buya, amo nomotwe n’ebitinya, igoro ase chinko chiria chire ase omorero bw’egesasiimero,
ⅩⅢ korende chinyama chianda na ebirenge bisibigwe namaache. Erio Omokuani arue bionsi na kobisaambera ase egesasiimero. Ekio n’ekengwanso ki’ogosaambwa n’omorero, kere ne rimisu rigiya rikongwenera inche Omonene.
ⅩⅣ “Onye omonto okomoruera Omonene ekeng’wanso ki’ogosaambwa gekorusigwa korwa ase chinyoni, rirorio omonto oyio arente amaruma gose amage amaruma.
ⅩⅤ Omokuani arente enyoni eyio ase egesasiimero, na amiine omotwe oye, ayobutore. Erio ayosaambe ase egesasiimero. Anyititorere amanyinga ase egesasiimero ensemo,
ⅩⅥ korende emboochero yaye, amo neubi ere imeo, abitugute ensemo ya moocha y’egesasiimero, ase ribu rigotugutwa.
ⅩⅦ Erio ataandorane egekuba, korende tarusia chimbaaba, ayesaambere ase egesasiimero, igoro ye chinko chiria chire ase omorero. Ekio n’ekengwanso ki’ogosaambwa n’omorero, kere ne rimisu rigiya rikongwenera inche Omonene.