Ⅵ
Omonene nare namang’ana agokwana n’Abaisraeli
Ⅰ Bono inwe tegerera moigwe ay’Omonene agoteeba: Imoka, mwekwanere agwo bosio bw’ebitunwa, na motige ebigoro biigwe amariogi aino.
Ⅱ “Inwe ebitunwa, nainwe ebitare, ninwe more oboroso bw’ense, tegerera moigwe ogosoera kw’Omonene! Ere nabwate amang’ana nabaanto baye, nare nekina n’Abaisraeli.
Ⅲ “Inwe abanto baane, ngento ki nabakoreire? Nase amang’ana ki nabarosirie? Ng’iranerie!
Ⅳ Nigo nabarusetie korwa ase ense ya Misiri; nkababooria korwa ase ense y’obosomba, inche ngatoma Musa, na Aroni, na Miriamu, bakaba bakobaraa.
Ⅴ Inwe abanto baane, inyora egento Balaki, omorwoti o Moabu, aroberetie gokora, na buna Baalamu, mosinto o Beori, amoiraneretie. Boigo inyora amang’ana akoregete ekero mwarenge ase orogendo korwa Sitimu gochia Giligali, erinde monyare komanya ogokora kw’oboronge kwane inche Omonene.”
Ay’Omonene aganetie
Ⅵ “Ngento ki ndarentere Omonene, na ntung’ame ase obosio bwa Nyasae ore igoro? Inee! Nigo ndache ase obosio bwaye, ndetane ebing’wanso bi’ogosambwa, gose chimori chiakoorire omwaka oyomo?
Ⅶ Inee! Omonene nagokigwe ne chimingichi chilifu, gose ne chindooche chi’amaguta chilifu ikomi? Inee! Nindue omwana one omotangi ase engencho y’ogosaria kwane, omwana oyio ore okwama kw’obogima bwane, abe ekeng’wanso ki’ebibe ase engencho y’omoyo one?”
Ⅷ Aye Mwanyabaanto, Omonene okworokirie ayare amaya. Ninki Omonene aganetie korwa asore otatiga okore ayare ay’oboronge, na bwanche gokora ayare ay’obwanchani, naende otaare ase oboitongo ase obosio bwa Nyasae oo.
Ⅸ Omonene nigo akorangeria abare ase omochie, na omonto oirogete erieta riaye nere omong’aini. Eriogi riaye nigo rigoteeba: “Igwa igoro y’egesusuro na ning’o ogechikiire.
Ⅹ Inee! Chinibo chi’obourereria nchigenderere kobeera ase chinyomba chi’abakori amabe? Na ebirengero bitaikeraneti biragereirie mbibeereo?
Ⅺ Ninyare gwanchera ebirengero bi’obourereria, gose amagena ’obong’ainereria ay’okorengera abeere ase chisaro ime?
Ⅻ Abanto abanda bare ase egati yaino baichire nobourereria, na abwo bamenyete agwo nigo bagokwana oborimo, ne chimeme chiabo nigo chire echi’obong’ainereria.
ⅩⅢ Ase engencho y’ebibe biaino nimbaake timogwena rinde, mbasirie kegima.
ⅩⅣ Ekero morabe mokoragera, timokoigota; nigo moragenderere koba nenchara. Mosangererie na kwegachera ebinto, korende ebio mwegacheire nimbirue bisirigwe nemioro.
ⅩⅤ Imosimeke chindagera, korende timogochigesa. Imomite amazeituni, korende timokweaka amaguta korwao; imomite amasabibu, korende timokonywa edivai ekorwao.
ⅩⅥ Inwe nigo mwabeire mokobwatia amachiiko ’Omuri, na ogokora gwonsi kw’enyomba y’Ahabu, naende mwabeire mokoigwera ogosemia kwabo. Ase ayio nimbasirie kegima, na abamenyete ime yao babe bagochaywa, na igo mobogorie okoramwa okwo abanto baane barametwe.”