ENCHIRI BUNA ERIIKIRE NA
MARIKO
Ogochaakera
Egetabu eke nakio gekageire koba ekieritang’ani ase ebitabu bi’Enchiri ase amang’ana y’abatuki be Ebiblia. Nigo kiarigetwe na Mariko oyio orenge omomura omoke ekero aya ariikire arenge gokorekana buna akwerabaara aiga 14:51-52 [Omomura oyomo akamotunyana, bweboyetie egetambaa ki’egatani gioka. Bakamobwata, korende ere agatiga egetambaa keria ki’egatani, agatama ore getirianda]. Enchiri eye nigo ekoigora ase enkwana “amang’ana amaya [enchiri ya] Yeso Kristo, Omwana o Nyasae”. Yeso nigo akworokigwa buna oyore n’okobua n’ebikora. Okobua kwaye nigo gokororekana ase ogoseria ebirecha, okworokereria naboigo okwabera abanto ebibe. Ere omonyene nigo agweteeba koba Omwana-o-Mwanyabaanto oyio ochete korwa obogima bwaye erio asibore Mwanyabaanto korwa ase chingataare chi’ebibe.
Mariko nigo akorwa omogano oye ase enchera enyeng’e naende enyaango agwo ase kera ekegokoreka kegotunyana ekende ase obwango erio kobeeka oborito ase kera ring’ana Yeso akorete goetaania aria akwanete na kworokereria. Magega yokoigora okweng’e igoro ya Yohana Omobatiisi, okobatiiswa n’ogoteemwa kwa Yeso, agwo kegima, omoriki nigo agosoa ase emeremo y’okogwenia n’okworokereria kwa Yeso. Ase ebiro bikobwatia, abatunyani baye nigo bakogenderera komomanya buya kobua, korende ababisa baye Yeso bageenderera koba abatindi kegima. Ase chinsemo chiogokoorera, egetabu eke nigo gekworokia aria akorekanete ase echuuma y’omoerio ase obogima bwa Yeso ase ense mono, okobambwa n’okobokigwa korwa ase abakuure.
Okobagwa kw’egetabu eke
Omochakano bw’enchiri 1:1-13
Yeso okoranderia abanto oborwoti bwa Nyasae na gokora emeremo yaye agwo Galili 1:14—9:50
Korwa Galili goika Yerusalemu 10:1-52
Ayakoregete agwo Yerusalemu na ang’e aroro ase echuma y’omoerio 11:1—15:47
Okobokigwa kwa Yeso 16:1-8
Okoorokigwa kw’Omonene ekero abokire na okogenda kwaye igoro 16:9-20
Ⅰ
Okorandia kwa Yohana Omobatisi
(Mat 3:1-12; Luk 3:1-17)
Ⅰ Eye nero enchiri igoro ya Yeso Kristo, Omwana o Nyasae,
Ⅱ nigo yachaagete buna eriikire ase egetabu y’omobani Isaya.
“Nyasae agateeba,” rora, natomire omotomwa one agotang’anere,
oyo oraroisie enchera yao;
Ⅲ eriogi ri’omonto ogoaka egeturi ase erooro:
Roisia enchera y’Omonene,
rongeyia oboeto bwaye!
Ⅳ Erio Yohana Omobatisi akaoroka ase erooro, okorandia, okobateebia, “Onchoka, mobatiswe, monyore okwaberwa kw’ebibe.”
Ⅴ Abanto b’ense yonsi ya Boyahudi, na bonsi aba Yerusalemu bakamochiera, bakabatiswa nere ase orooche rwa Yorodani, bakoorokia ebibe biabo.
Ⅵ Na Yohana nigo arenge kobeeka chianga chi’amarionya y’engamia, na kweboeria orokini rwe riiyo kenema kiaye. Nigo arenge koria chingige n’obooke bw’orosana.
Ⅶ Akarandia, okobora, “Nache korwa magega y’ane oyore ne chinguru kombua, oyio inche ntaisaini gotung’ama na gosibora chiusi chi’ebikoroto biaye.
Ⅷ Inche nigo nkobaabatisa ase amaache, korende ere nabaabatise ase Omoika Omochenu.”
Okobatiswa kwa Yeso
(Mat 3:13-17; Luk 3:21-22)
Ⅸ Ase amatuko aria Yeso agacha korwa Nazareti ya Galili, akabatiswa na Yohana ase orooche rwa Yorodani.
Ⅹ Erio kegima, Yeso kagotiira korwa ase amaache, akarora igoro amaanokire, na Omoika buna riruma ogoika igoro asare,
Ⅺ na eriogi rikarwa igoro, rigateeba, “Aye naye Omwana one omwanchwa, ngokirie naye.”
Ogoteemwa kwa Yeso
(Mat 4:1-11; Luk 4:1-13)
Ⅻ Erio kegima Omoika okamoira ase erooro.
ⅩⅢ Akaba ase erooro amatuko emerongo ene, ogoteemwa na Saitani; ere nigo arenge amo ne ching’iti chi’orosana; na abamalaika bakaba nkomokorera bare.
Yeso okorangeria Abarubi bane
(Mat 4:17; Luk 4:14-15)
ⅩⅣ Magega Yohana kabekirwe echela ime, Yeso akagenda Galili, akarandia enchiri ya Nyasae,
ⅩⅤ okobora, “Engaki yaikeranire, na oborwoti bwa Nyasae bwaikire ang’e; onchoka na mwegene enchiri.”
ⅩⅥ Ekero Yeso are goeta ensemo y’enyancha ya Galili, akarora Simioni na Anderea, momura omwabo Simioni, bakoruta ekeonga enyancha ime, ekiagera nabarubi barenge.
ⅩⅦ Yeso akabateebia, “Inchuo montunyane, na inche nimbakore mobe abarubi b’ abanto.”
ⅩⅧ Erio kegima bagatiga ebionga biabo, bakamotunyana.
ⅩⅨ Akagenderera bosio ake, akarora Yakobo, omwana o Zebedi, na Yohana momura omwabo; barabwo nigo barenge obwato ime bakobareera ebionga biabo.
ⅩⅩ Erio kegima akabarangeria; barabwo bagatiga Zebedi ise amo n’abanto b’eng’eria ime ase obwato, bakamotunyana.
Yeso okogwenia Omonto obwatire n’ekerecha agwo Kapernaumu
(Luk 4:31-37)
ⅩⅪ Bakabwatia enchera goika Kapernaumu, na erio kegima ase rituko ri’Esabato Yeso agasoa ase esinagogi akorokereria.
ⅩⅫ Bagakumia ase okworokereria kwaye, ekiagera arenge koborokereria buna oyore nokobua, gose tari buna aborokia b’amariiko.
ⅩⅩⅢ Erio kegima omonto obwatire nekerecha ki’eubi agacha ase esinagogi, ere agaaka eriogi,
ⅩⅩⅣ akabora, “Inki tore naye, Yeso o Nazareti? Inee! Nigo gwachire gotosiria? Namanyire aye ning’o, aye n’Omochenu o Nyasae.”
ⅩⅩⅤ Yeso akagetogonyera, akabora, “Karwe ase omonto oyo!”
ⅩⅩⅥ Ekerecha keria ki’eubi gekamogaragaria, gekarera ase eriogi rinene, gekamorwa.
ⅩⅩⅦ Bagaichana bonsi, goika bakaborania, bakobora, “Inki eke? Nokworokereria okoyia! Omonto oyo nigo abwate okobua kw’ogochika nonya nebirecha bi’eubi, na birobio bikomoigwera.”
ⅩⅩⅧ Erio chinkuma chiaye chigasarera ase chinsinyo chionsi chi’ense ya Galili.
Yeso okogwenia abanto abange
(Mat 8:14-17; Luk 4:38-41)
ⅩⅩⅨ Erio agwo kobasokire korwa ase esinagogi, bakagenda goika nyomba mwa Simioni na Anderea: Yakobo na Yohana bakagenda nere.
ⅩⅩⅩ Ng’ina biara Simioni nigo araire, arwarete esosera. Erio kegima Yeso gaikire bakamoteebia amang’ana igoro yaye.
ⅩⅩⅪ Yeso agaika omong’ina oria ang’e, akamoimokia ase okomobwata okoboko. Erio esosera ekamotiga na ere akabakorera.
ⅩⅩⅫ Riachia koba mogoroba, erioba korikogwa, abanto bakarentera Yeso abarwaire bonsi, na ababwatire nebirecha.
ⅩⅩⅩⅢ Na omochie bwonsi okaba ngosangererekana ore gesieri.
ⅩⅩⅩⅣ Yeso akagwenia abange abarenge namarwaire ao ao, na agaseria ebirecha ebinge; tatiga ebirecha bikwane, ekiagera biamomanyete.
Yeso okorandia Galili
(Luk 4:42-44)
ⅩⅩⅩⅤ Mambia, botarakiamoka, akaimoka, agasooka, akagenda aase atari nabaanto, agasabera aroro.
ⅩⅩⅩⅥ Simioni na abarenge amo nere bakamotunyana,
ⅩⅩⅩⅦ ekero bamonyorete, bakamoteebia, “Abanto bonsi ngokorigia bare.”
ⅩⅩⅩⅧ Yeso akabateebia, “Togende aase aande goika ebinyoro bire ang’e, ninyare korandia na aroro boigo, ekiagera ase ayio naro nachicheire.”
ⅩⅩⅩⅨ Agasoa ase chisinagogi chiabo ase ense yonsi ya Galili, okorandia na goseria ebirecha.
Yeso okogwenia omonto orenge noborwaire bwa ukoma
(Mat 8:1-4; Luk 5:12-16)
ⅩⅬ Omonto oyomo orenge noborwaire bwa ukoma agacha asare, akamosorora na komotung’amera, akamoteebia, “Onye ngwancha, nonyare gonsibia.”
ⅩⅬⅠ Yeso akamororera amaabera, akarambora okoboko kwaye, akamokuna, akamoteebia, “Nanchire; sibeka.”
ⅩⅬⅡ Erio agwo oborwaire bwaye bwa ukoma bokamotiga, agasibeka.
ⅩⅬⅢ Akamotianera bokong’u, kamosokirie agende,
ⅩⅬⅣ akamoteebia, “Rigereria, toteebia monto onde bwensi amang’ana aya; korende genda bweorokie ase Omokuani, orue ekeng’wanso egiachigetwe na Musa ase ogosibeka kwao, erinde kebe kirori ase abanto.”
ⅩⅬⅤ Korende agasoka, agachaaka koraria amang’ana aya na gosareria ring’ana riria, goika Yeso tanyara naende gosoa ase omochie ime maiso marore, korende akabeera isiko aase atari nabaanto; na abanto bakamochiera korwa kera aase.