Ⅲ
Yeso okogwenia omonto okoboko kwaye kwagataete
(Mat 12:9-14; Luk 6:6-11)
Ⅰ Yeso agasoa naende ase esinagogi. Agwo narengeo omonto, okoboko kwaye kwagataete.
Ⅱ Agwo mbarenge oo abanto gete abwo baganetie gotega Yeso barore gose nagwenie omonto oria ase rituko ri’Esabato, banyare komosoera.
Ⅲ Agateebia omonto oria okoboko kwaye kwagataete, “Tenena gati aa!”
Ⅳ Akababoria, “Mboronge ase rituko ri’Esabato gokora amaya, gose gokora amabe; gotooria obogima, gose koboita?” Bagakira.
Ⅴ Akabamogoreria amaiso chinsemo chionsi ase okobea, akaigwa obororo ase engencho y’obokong’u bwe chinkoro chiabo, agateebia omonto oria, “Rambora okoboko kwao!” Agakorambora, na okoboko kwaye gokagwena.
Ⅵ Erio kegima Abafarisai baria bagasoka, bakagamba amo n’Abaherodiani buna barakore baite Yeso.
Omoganda bw’abaanto engegu y’enyancha
Ⅶ Erio Yeso akarwa agwo amo n’Aborokigwa baye, bakagenda goika engegu ye’nyancha ya Galili, na omoganda omonene korwa Galili, naboigo korwa ase Boyahudi,
Ⅷ na Yerusalemu, na Idumea, na ng’umbu ya Yorodani, ne chinsemo chia Turo na Sidoni okabatunyana. Ochia koigwa ebirage bi’amang’ana onsi arenge gokora, omoganda oyio omonene, okamochiera.
Ⅸ Yeso agateebia aborokigwa baye bamobekere obwato ang’e ase engencho y’abanto; erio omoganda tomomiga.
Ⅹ Ekiagera agwenetie abanto, bonsi abarenge nemechando bakamosongerera, banyare komokuna.
Ⅺ Na abanto barenge n’ebirecha bi’eubi bagachia komoorora, bakagwa ase obosio bwaye, bakarera bagateeba, “Aye naye Omwana o Nyasae.”
Ⅻ Akabitianera mono tibimoorokia.
Yeso ogochora abatomwa ikomi na babere
(Mat 10:1-4; Luk 6:12-16)
ⅩⅢ Erio Yeso agatiira gochia egetunwa igoro, akarangeria abwo arigetie ere omonyene; na barabwo bakamochiera.
ⅩⅣ Agachoora ikomi na babere, abwo arogete abatomwa erio banyare koba amo nere, erinde abatome bagende korandia,
ⅩⅤ na babe nokobua kw’ogoseria ebirecha.
ⅩⅥ Baria ikomi na babere achoorete nabwo aba: Simioni nere arogete erieta rinde Petero,
ⅩⅦ na Yakobo, omwana o Zebedi, na Yohana, momura omwabo Yakobo, akabaroka erieta Boanergi, engencho yaye: Abana b’enkoba;
ⅩⅧ Anderea na Filipo, na Baritholomayo, na Matayo, na Thomas, na Yakobo bw’Alufayo, na Tadayo, na Simioni, oyomo bw’Abazelote,
ⅩⅨ na Yudasi Iskariota, nere oyomoruete.
Yeso na Beelizebuli
(Mat 12:22-37; Luk 11:14-23; 12:10)
Erio agasoa nyomba.
ⅩⅩ Na omoganda ogasangerereka naende; barabwo abanyene tibanyara nonya nokoria.
ⅩⅪ Abaamate baye bagachia koigwa amang’ana aya, bagasoka kogenda komobwata, ekiagera bateebete, “Obakirwe n’eosi.”
ⅩⅫ Na aborokia b’amariiko, abarwete Yerusalemu, bakaboora, “Nabwatire na Beelizebuli, naende agoseria ebirecha ase okobua kw’omonene bw’ebirecha.”
ⅩⅩⅢ Erio Yeso akabarangeria bache asare, akabateebia ase emebayeeno, “Inaki Saitani aranyare goseria Saitani?
ⅩⅩⅣ Na oborwoti kaboraatananeke ase borobwo obonyene, oborwoti boria tibokonyara gotenena.
ⅩⅩⅤ Na enyomba keraatananeke enyene, enyomba eria tekonyara gotenena.
ⅩⅩⅥ Na onye Saitani bweimokeire ere omonyene, na gweatanana, takonyara gotenena, korende nabe nomoerio.
ⅩⅩⅦ Omonto takonyara gosoa ase enyomba y’omonto omonyene chinguru na gosakora ebinto biaye, atamosibeti ritang’ani oria omonyene chinguru; nario aranyare gosakora enyomba yaye.
ⅩⅩⅧ “Ekeene nabateebirie: Ebibe bionsi Mwanyabaanto nabaaberwe, na okorama gwonsi bararame,
ⅩⅩⅨ korende monto onde bwensi orarame Omoika Omochenu takwaberwa nonya ng’ake, korende nigo arabe nebibe goika kare na kare.”
ⅩⅩⅩ Nigo abateebetie ayio ekiagera bateebete, “Nabwatire nekerecha ki’eubi.”
Ng’ina na bamura bamwabo Yeso
(Mat 12:46-50; Luk 8:19-21)
ⅩⅩⅪ Ng’ina na bamura bamwabo Yeso bagaacha, bagatenena isiko, bagatoma omonto komorangeria.
ⅩⅩⅫ Na omoganda nigo orenge oikaransete omoetanaine, okamoteebia, “Rora nyoko na bamura bamino isiko bare, mbagotagete.”
ⅩⅩⅩⅢ Yeso akabairaneria, “Baba na bamura baminto mbarabi?”
ⅩⅩⅩⅣ Akabarigereria abwo baikaransete bamoetanaine, akabora, “Rora aba nabwo baba na bamura baminto!
ⅩⅩⅩⅤ Inaki oyorakore ogwancha kwa Nyasae, oyio nere baba na momura ominto, na mosubati ominto.”