Ⅶ
Yeso okoiraneria abwo baare koengereria ekiagera aborokigwa baye tibabwateti chingencho chi’abagaaka
(Mat 15:1-20)
Ⅰ Erio Abafarisai na abande ase aborokia b’amariiko barwete Yerusalemu, bagasangererekana asare.
Ⅱ Bakarora abande baborokigwa baye bakoragera namaboko are neriko, engencho yaye ataisabiri.
Ⅲ (Inaki Abafarisai na Abayahudi bonsi tibakoragera ritang’ani bataraisaba amaboko. Igo babwatetie engencho y’abagaaka babo.
Ⅳ Naende kobakorwa echiiro, tibakoria batesibetie. Naende nchire chingencho chinde babwate buna ogosibia ebikombe ne chinyongo, na ebinto bie chitaai.)
Ⅴ Bono Abafarisai baria na aborokia b’amariiko bakabooria Yeso, “Nase ki aborokigwa bao batari kobwata chingencho chi’abagaaka, korende bakoragera namaboko are neriko?”
Ⅵ Yeso akabateebia Isaya nigo abaanete buya igoro yaino, inwe abang’ainereria, buna eriikire;
Abanto aba nigo bansigete ase ebikoba biabo igoro,
korende chinkoro chiabo nigo chire aare korwa ase ’nde.
Ⅶ Abwo nigo bagonsasiima ogosasiima kwa bosa,
bakworokereria amorokererio ayare amachiiko a Mwanyabaanto oka.
Ⅷ Igo mogotiga richiiko ria Nyasae, mwabwata chingencho chia Mwanyabaanto.
Ⅸ Yeso akagenderera kobateebia, “Mwangire richiiko ria Nyasae ng’a monyare kobwata chingencho chiaino.
Ⅹ Inaki Musa nigo ateebete: Sika iso na nyoko, na: Oyorakwane bobe ase ise, gose ase ng’ina, ogokwa nakwe.
Ⅺ Korende inwe moteeba: Omonto karateebie ise gose ng’ina: Bionsi ebi anga kwanyora korwa ase ’nde nakio Korbani (engencho yaye: Ebiarurwe ase Nyasae) —
Ⅻ timori komotiga naende amokorere ise gose ng’ina ring’ana rinde.
ⅩⅢ Igo mogosaria ring’ana ria Nyasae ase chingencho chiaino chia kare. Naende amange mwakorire mware koenana omogwekano bw’ayio.”
ⅩⅣ Erio Yeso akarangeria omoganda naende, akayoteebia, “Nyigwe mwensi, naende manya:
ⅩⅤ Tari egento kere isiko y’omonto, na gekomosoa, keranyare komobekera ogotacheneka, korende ebikorwa ase omonto nabio bikomobekera ogotacheneka. [
ⅩⅥ Omonto kare namato akoigwera, tiga aigwe.]”
ⅩⅦ Goika agachia gosoa nyomba, gatigire omoganda, aborokigwa baye bakamobooria amang’ana y’omobayeeno oria.
ⅩⅧ Akabateebia, “Nonya ninwe timori nobong’aini? Timomanyeti ng’a kera egento kere isiko y’omonto gokeramosoe, tigekonyara komobekera ogotacheneka,
ⅩⅨ ekiagera tigekomosoa enkoro, otatiga ase enda yoka, erio kiagwa kebara?” (Ase ogoteeba igo, osibirie chindagera chionsi.)
ⅩⅩ Akabora “Ekegosoka korwa ase omonto nakio gekomobekera ogotacheneka.
ⅩⅪ Ekiagera ime ase chinkoro chi’ abanto nigo bikorwao ebirengererio ebibe, obonyaka, oboibi, oboiti, obotomani,
ⅩⅫ okogania okobe, obobe, obong’ainereria, oboenenu, ribero, oborami, obwerori, oboriri.
ⅩⅩⅢ Aya onsi amabe nigo akorwa ime, naro akobekera omonto ogotacheneka.”
Okwegena kw’omokuungu oyomo
(Mat 15:21-28)
ⅩⅩⅣ Yeso akaimoka korwa aria, akagenda goika omochie o Turo. Agasoa ase enyomba, akarigia tamanyekana na monto, korende tanyara kobiseka.
ⅩⅩⅤ Erio agwo omokungu oyomo, omwana oye enyaroka obwatire nekerecha ki’eubi, akaigwa amang’ana aye, agacha akamogwera ase amagoro aye.
ⅩⅩⅥ Omokungu oria n’Omogiriki orenge, egesaku kiaye n’Omosurofenisia. Akamosaba amosererie ekerecha korwa ase enyaroka yaye.
ⅩⅩⅦ Yeso akamoteebia, “Tiga abana baigote ritang’ani, ekiagera tari buya kobogoria endagera y’abana, gotugutera chisese.”
ⅩⅩⅧ Korende omokungu oria akamoiraneria, “Nab’Omonene, nonya nechisese nyaro ye chimesa nigo chikoria amatori y’abana.”
ⅩⅩⅨ Yeso akamoteebia, “Ase engencho ye ring’ana eri, genda bwoo, ekerecha kiarure ase enyaroka yao.”
ⅩⅩⅩ Akagenda mwaye, akanyora omwana oria bwareirie borere, na ekerecha keria kiamorure.
Yeso Okogwenia omonto orenge omotiino naende rimama
(Mat 15:29-31)
ⅩⅩⅪ Erio Yeso akarua agwo ase ensemo ya Turo, agaeta gati‐gati ya Sidoni, akagenda goika enyancha ya Galili, egati y’ensemo ya Dekapoli.
ⅩⅩⅫ Bakamorentera omonto ore omotiino, naende nigo are gotutura kagokwana; bagasorora Yeso abeeke okoboko kwaye igoro asare.
ⅩⅩⅩⅢ Yeso akamwatanana korwa ase omoganda bobisi, akabeeka ebiara biaye ase amato aye, agatwa amate, akamokuna oromeme.
ⅩⅩⅩⅣ Erio akarigereria gochia igoro, agaita egekoe, akamoteebia, “Efatha,” engencho yaye, “Igoreka.”
ⅩⅩⅩⅤ Bwango amato aye agatiinoka, egesibo ki’oromeme rwaye gekororoba, agakwana buya.
ⅩⅩⅩⅥ Yeso akabatianera tibateebia monto, korende buna amentete kobakania, naboigo bamentete koraria amang’ana aya.
ⅩⅩⅩⅦ Abanto bagakumia mono kobua, bakaboora, “Okorire onsi buya. Abarenge emetiino obatiinoire, na abarenge amamama bakwane.”