Ⅻ
Riborio igoro y’Esabato
(Mar 2:23-28; Luk 6:1-5)
Ⅰ Ase ekero keria Yeso ngoeta arenge gati y’emegondo ase rituko ri’Esabato, aborokigwa baye mbarenge nenchara, bagachaaka kobutora ebigara, bakoria.
Ⅱ Korende ekero Abafarisai bachia korora aya, bakamoteebia, “Rigereria, aborokigwa bao buna bagokora eritari boronge gokorwa ase rituko ri’Esabato.”
Ⅲ Akabateebia, “Timwana gosoma aya Daudi akorete, ekero arenge nenchara, ere na abarenge amo nere,
Ⅳ buna asoete ase enyomba ya Nyasae, akaria emegati yarenge korugwa ase Nyasae, nero tiyarenge boronge asare ayerie, gose ase abwo barenge amo nere, otatiga ase abakuani boka?
Ⅴ Gose timwana gosoma ase amachiiko buna ase rituko ri’ Esabato abakuani be Hekalu nigo bagosaria Esabato, na barabwo tibakoba nokomocha?
Ⅵ Inche nabateebirie, nkere aiga egento ekenene kobua Hekalu.
Ⅶ Korende onye mwamanyete engencho y’amang’ana aya: Inche nigo ndigetie amaabera, gose tari ekeng’wanso, anga timwagambia abatari nokomocha,
Ⅷ ekiagera Omwana-o-Mwanyabaanto nere omonene bw’Esabato.”
Okogwenigwa kw’omonto ogataete okoboko
(Mar 3:1-6; Luk 6:6-11)
Ⅸ Akarua aroro, agasoa ase esinagogi yabo.
Ⅹ Na rora, narengeo omonto, okoboko kwaye kwagataete. Bakaboria Yeso, “Inee! Mboronge kogwenia ase rituko ri’Esabato?” Nigo bamoboretie igo erio banyare komosoera.
Ⅺ Nere akababoria, “Ning’o ase more ore neng’ondi eyemo, na eng’ondi eyio onye yagure ime ase engoro rituko ri’Esabato, takoyebwata ayerusieo?
Ⅻ Inee! Omonto tabueti rigori ri’eng’ondi? Ase igo mboronge gokora amaya ase rituko ri’Esabato.”
ⅩⅢ Erio agateebia omonto oria, “Rambora okoboko kwao.” Agakorambora; gokagwena, gokaba okogima buna okonde.
ⅩⅣ Korende Abafarisai bagasoka isiko, bakagaamba igoro ya Yeso buna barakore bamoite.
Omosomba omochore
ⅩⅤ Ekero Yeso achia komanya aya, akarua aroro. Abanto abange bakamotunyana, akabagwenia bonsi.
ⅩⅥ Akabachika tibatebia abande igoro yaye.
ⅩⅦ Eri nigo riabeete, erinde rinyare goikerana eriatebetwe nomobani Isaya,
ⅩⅧ “Rora, omosomba one oyo nachoorire,
omwanchwa one, omoyo one ogokirie nere.
Nimobekere Omoika one,
nere naraarerie abanto b’Ebisaku ekiina.
ⅩⅨ Takwomana, gose tagoaka eriogi;
nonya nomonto takoigwa eriogi riaye
ase chinchera chinene.
ⅩⅩ Egetonto giatachetwe tagokebuna,
gose orotambe rw’etaya rokoimoka erioki,
takororimia, goika arete oboronge ase okobua;
ⅩⅪ na ase erieta riaye abanto b’Ebisaku mbasemerie.”
Yeso na Beelizebuli
(Mar 3:20-30; Luk 11:14-23; 12:10)
ⅩⅫ Ekero ekio akarenterwa omonto obwatire nekerecha; ere nomouko orenge, naende nigo arenge rimama. Akamogwenia, goika oria orenge omouko ne rimama agakwana na korora.
ⅩⅩⅢ Abanto bonsi bagakumia, bakaboorania, “Inee! Oyo nanyare koba omwana o Daudi?”
ⅩⅩⅣ Korende Abafarisai bagachia koyaigwa, bagateeba, “Oyo tari korusia ebirecha otatiga ase chinguru chia Beelizebuli omonene bw’ebirecha.”
ⅩⅩⅤ Yeso Konya omanyire ebirengererio biabo, akabateebia, “Kera oborwoti kobwatananekire borobwo obonyene tibogotenena; na kera omochie na enyomba kobiatananekanire, birobio ebinyene tibigotenena;
ⅩⅩⅥ na Saitani karaserie Saitani, igo bweatananire ere omonyene, Inee, oborwoti bwaye, naki boratenene?
ⅩⅩⅦ Na inche, onye ngoseeria ebirecha ase Beelizebuli, Inee, abana baino nase ng’o bakobiseeria? Ase engencho eyio, barabwo inababe abagaambi baino.
ⅩⅩⅧ Korende onye ngoseeria ebirecha ase Omoika o Nyasae, igo oborwoti bwa Nyasae bwabacheire.
ⅩⅩⅨ Gose inaki omonto aranyare gosoa ase enyomba y’omonto omonyene chinguru na gosakora ebinto biaye, atamosibeti ritang’ani omonto oria omonyene chinguru? Erio magega anyare gosakora enyomba yaye.
ⅩⅩⅩ Omonto otari amo nainche nigo are mamincha ase ’nde. Nere oyotari gosangereria amo nainche nigo agoserebania.
ⅩⅩⅪ Ase engencho eyio nabateebirie, kera ebibe na okorama Mwanyabaanto nabaaberwe, korende onye bagochecheria Omoika tibakwaberwa.
ⅩⅩⅫ Na omonto onde bwensi orakwane ring’ana riibe ase Omwana-o-Mwanyabaanto, naaberwe; korende onde bwensi orakwane ring’ana riibe igoro ase Omoika Omochenu takwaberwa ase ense eye, nonya nase eria egochi‐gocha.
Omote na amatunda aye
ⅩⅩⅩⅢ “Kora omote obe omuya, na amatunda aye abe amaya; gose kora omote obe omobe, na amatunda aye abe amabe; naki omote nigo okomanyekana ase okwama kwaye.
ⅩⅩⅩⅣ Inwe oroiboro rwe ching’iti! Naki moranyare gokwana amaya ekero more ababe? Ekiagera ebiichire ase enkoro, nabio omonwa ogokwana.
ⅩⅩⅩⅤ Omonto omuya, ase emonga yaye engiya nigo akorua amaya, na omonto omobe, ase emonga yaye embe nigo akorua amabe.
ⅩⅩⅩⅥ Korende nabateebirie, ng’a ase kera ring’ana ritari nengencho Mwanyabaanto barakwane, ase rituko ri’ekiina ’nabache korua omobaro.
ⅩⅩⅩⅦ Inaki ase amang’ana ao noegwe oboronge, na ase amang’ana ao nogaambigwe.”
Yeso okwanga koorokia egekone
(Mar 8:11-12; Luk 11:29-32)
ⅩⅩⅩⅧ Erio abande ase aborokia b’amariiko na Abafarisai bakamoteebia, “Omwarimu, ntorigetie torore egekone buna ekemanyererio korwa ase ore.”
ⅩⅩⅩⅨ Korende akabairaneria, “Ekegori ekebe ki’obotomani kerigetie egekone, korende tigekoegwa egekone otatiga eki’omobani Yona.
ⅩⅬ Inaki buna Yona abeete ime ase enda y’enswe enene ase engaki y’emebaso etato na amatuko atato, nabo na Omwana‐o‐Mwanyabaanto nere arabe ime ase enkoro y’ense emebaso etato na amatuko atato.
ⅩⅬⅠ Abanto ba Ninawi nabatenene ase rituko ri’ekiina amo n’abanto b’ekegori eke, na barabwo nabakenachere ekiina, ekiagera barabwo nigo baonchogete ase okorandia kwa Yona, na rora, oyobuete Yona naiga are.
ⅩⅬⅡ Enting’ana ya Irianyi netenene ase ekiina amo n’abanto b’ekegori eke; ere nabanachere ekiina, ekiagera arwete ase chinsinyo chi’ense anyare koigwa obong’aini bwa Sulemani, na rora, oyobuete Sulemani naiga are.
Okoirana kw’ebirecha
(Luk 11:24-26)
ⅩⅬⅢ “Ekero ekerecha ki’eubi kiarure ase omonto, nigo kegoeta gati aase atari namaache, kiarigia aase kegotimokera, korende tigekonyora.
ⅩⅬⅣ Erio kiabora: ‘Ning’irane ase enyomba y’ane aase narwete.’ Gakegocha kiayenyora nenchwa, yaabusirwe, yaroisigwe.
ⅩⅬⅤ Erio kiagenda, kiarentana ebirecha binde bitano na bibere (7), ebire ebibe kobua kerokio ekenyene. Nabirobio biasoa na komenya aroro; okoba kw’omoerio kw’omonto oyio kwaba okobe kobua okwe ritang’ani. Naboigo erache koba ase ekegori eke ekebe.”
Abamwabo Yeso b’ekeene
(Mar 3:31-35; Luk 8:19-21)
ⅩⅬⅥ Ekero arenge gokwana n’abanto, rora, ng’ina na bamura bamwabo nigo bateneine isiko, barigetie gokwana nere.
ⅩⅬⅦ Omonto oyomo akamoteebia, “Rora, nyoko na bamura bamino mbateneine isiko, barigetie gokwana naye.”
ⅩⅬⅧ Korende akairaneria oria omotebetie, akabora, “Baba nere ng’o? Na bamura baminto mbarabi?”
ⅩⅬⅨ Akarambora okoboko kwaye ase aborokigwa baye, akabora, “Rora baba na bamura baminto!
Ⅼ Ekiagera oyorakore ogwancha gwa Tata one ore igoro, oyio nere momura ominto, na mosubati ominto, na baba.”