ⅩⅫ
Omobayeeno bw’omoyega bw’enyangi
Ⅰ Naende Yeso agakwana nabarabwo ase emebayeeno akabora,
Ⅱ “Oborwoti bwa igoro nigo bogwekaine nomorwoti okorete omoyega bw’enyangi y’omwana oye.
Ⅲ Agatoma abasomba baye batuunye baria konya barangerigwe ase enyangi, korende barabwo bakaanga gocha.
Ⅳ Naende agatoma abasomba bande, agateeba: Bateebie abarangerigwe: Rigereria, naroisirie endagera y’ane, chieri amo n’echimori chiane chianyenyirwe, na bionsi biabeire ang’e; inchwo ase omoyega bw’enyangi.
Ⅴ Korende bagachaaya amang’ana aya, bakagenda, oyomo ase omogondo oye, na oyonde ase oboonchoreria bwaye;
Ⅵ na abatigarete bakabwata abasomba baye, bakabakorera bobe bakabaita.
Ⅶ Omorwoti oria akaba nendamwamu, agatoma emeganda y’abarwani, egasiria abaiti baria, na koyosamba omochie obo nomorero.
Ⅷ Erio agateebia abasomba baye: Ekeene enyangi yabeire ang’e, korende abaariganetigwe tibagwenereti.
Ⅸ Gaki, genda ase chinchera chinene, aba moranyore bonsi mobarangerie gocha ase omoyega bw’enyangi.
Ⅹ Abasomba baria bagasoka, bagaika ase chinchera, bagasangereria abanyorete bonsi, ababe na abaya; igo enyomba y’enyangi egaichorwa nabageni.
Ⅺ “Korende ekero omorwoti achia gosoa korigereria abageni, akarora omonto oyomo aroro otabegete eyanga y’enyangi.
Ⅻ Akamoboria: Mosani, naki gwakorete ogasoa aiga, na aye otari neyanga y’enyangi? Agakira‐kiri.
ⅩⅢ Erio omorwoti agateebia abakoreri: Moboe amaboko na amagoro, momotugute ase omosunte isiko; aroro abanto inababe nekerero na okoriania amaino.
ⅩⅣ Inaki abarangerigwe nabaange, korende abachorirwe nabake.”
Riborio igoro y’okoa Kaisari ebango
(Mar 12:13-17; Luk 20:20-26)
ⅩⅤ Erio Abafarisai bakagenda, bakaroberia buna bagochia gotega Yeso ase amang’ana aye.
ⅩⅥ Bagatoma aborokigwa babo ase are, amo n’Abaherode, bakaboora, “Omworokia, twamanyire ng’a nigo ore omonto bw’ekeene, na enchera ya Nyasae nigo okoyiorokereria ase ekeene, gose tori koyiera monto; ekiagera torengerereti obonene bw’ abanto.
ⅩⅦ Gaki toteebie naki orooche aye? Mboronge komoa Kaisari ebango, gose taibo.”
ⅩⅧ Korende Yeso, konya omanyire obong’ainereria bwabo, akabora, “Inaki mogonteema, inwe abang’ainereria?
ⅩⅨ Inyorokie ebesa y’ebango.” Bakamorentera ebesa.
ⅩⅩ Yeso akababoria, “Ekieni eke na amariiko aya nebiang’o?”
ⅩⅪ Bakamoiraneria, “Nebia Kaisari.” Erio akabateebia, “Nabo, ebire ebia Kaisari moe Kaisari, na ebia Nyasae moe Nyasae.”
ⅩⅫ Ekero bachia koigwa ring’ana riria, bagakumia; bakamotiga, bakagenda.
Riborio igoro y’okobokigwa
(Mar 12:18-27; Luk 20:27-40)
ⅩⅩⅢ Rituko erio erio Abasadukai bakamochiera, baria bagoteeba ng’a okobokigwa tikoiyo, bakamobooria,
ⅩⅩⅣ bakobora, “Omworokia, Musa nateebete: Omonto karakwe, na ere tari n’abana, momura omwabo atware omoboraka oria, atenenerie momura omwabo egesaku.
ⅩⅩⅤ Bono mbarenge abamura ba ise oyomo batano na babere egati yaito. Oyo bw’eritang’ani akanyuoma, erio agakwa, na ekiagera atarenge nabana, agatigera momura omwabo mok’aye.
ⅩⅩⅥ Naboigo noyo o kabere akamotwara, na oyo o gatato, goika bonsi batano na babere bakaera.
ⅩⅩⅦ Omoerio o bonsi omokungu oria nere agakwa.
ⅩⅩⅧ Inee! Ase okobokigwa, mokang’o arabe ase baria batano na babere; naki bonsi mbameny’anete nere?”
ⅩⅩⅨ Korende Yeso akabairaneria, “Mwasirire inwe, ekiagera timomanyeti amariiko, nonya nokobua kwa Nyasae.
ⅩⅩⅩ Inaki ase okobokigwa tibakonyuoma gose tibakonyuomwa, korende nigo barabe buna abamalaika ba Nyasae bare igoro.
ⅩⅩⅪ Na ase okobokigwa kw’abakuure timwana gosoma eri mwatebetigwe na Nyasae:
ⅩⅩⅫ Inche ninche Nyasae o Aburaamu, na Nyasae o Isaka, na Nyasae o Yakobo? Ere tari Nyasae bw’abakuure, korende Nyasae bw’abare moyo.”
ⅩⅩⅩⅢ Ekero omoganda ochia koigwa aya, ogakumia ase okworokereria kwaye.
Ogochika kore okonene kobua ayande
(Mar 12:28-34)
ⅩⅩⅩⅣ Korende Abafarisai, ekero bachia koigwa ng’a Yeso obakiririe Abasadukai, bagasangererekana amo.
ⅩⅩⅩⅤ Oyomo ase barabwo, omonto bw’amachiiko, akamobooria ase okomoteema,
ⅩⅩⅩⅥ “Omworokia, ngochiika ki kore okonene ase amachiiko onsi?”
ⅩⅩⅩⅦ Akamoteebia, “Mwanche Omonene Nyasae oo nenkoro yao yonsi, na omoyo oo bwonsi, na obong’aini bwao bwonsi.
ⅩⅩⅩⅧ Oko nakwo ogochika okonene, naende nakwo kw’eritang’ani.
ⅩⅩⅩⅨ Nogwa kabere gokoreng’aine noko: Mwanche omogisangio oo buna bweanchete aye omonyene.
ⅩⅬ Ase amachiiko aya abere naro atenenerete amachiiko onsi na ababani.”
Riborio igoro ya Kristo
(Mar 12:35-37; Luk 20:41-44)
ⅩⅬⅠ Abafarisai kobasangererekanire amo, Yeso akababoria,
ⅩⅬⅡ “Inaki inwe mokorengereria ase Kristo? Nomwana o ng’o are?” Bakamoiraneria, “Nomwana o Daudi.”
ⅩⅬⅢ Akababoria, Inki rende gekogera Daudi, akoraagwa n’Omoika, akamoroka Omonene, okobora:
ⅩⅬⅣ Omonene agateebia Omonene one:
Ikaransa ensemo y’okoboko kwane gw’okorio,
goika ’mbeke ababisa bao babe inse y’amagoro ao?
ⅩⅬⅤ Gaki, onye Daudi okomooroka Kristo, naki rende arabe omwana oye?
ⅩⅬⅥ Onde tarenge ore konyara komoiraneria ing’ana; nonya nkorwa rituko riria monto onde tarenge na boremu komoboria maborio ande.