ⅩⅩⅣ
Yeso ogokwana igoro y’ogotagorwa gwe Hekalu
(Mar 13:1-2; Luk 21:5-6)
Ⅰ Yeso agatiga Hekalu, akaba nkogenda are, na aborokigwa baye bakamochiera komworokia amaagacho ye Hekalu.
Ⅱ Korende akabairaneria, “Inee! Mwarorire aya onsi? Nekeene nabateebirie: Tirigotigara rigena erimo aiga igoro ase erinde, eritatagorwe.”
Amabe agochi‐gocha
(Mar 13:3-23; Luk 21:7-24)
Ⅲ Gaikaransire ase egetunwa ki’Emezeituni, aborokigwa baye bakamochiera bobisi, bakamoboria, “Toteebie, aya indiriri arabe? Naende ninki ekemanyererio ki’ogocha kwao, na ay’omoerio bw’ense?”
Ⅳ Yeso akabairaneria, Mwerende, monto onde tabang’aina.
Ⅴ Inaki abange inabaache ase erieta riane, babore: Inche ninche Kristo; baraae abange na kobasiria.
Ⅵ Na inwe inamoigwe esegi, ne chinkuma, chi’esegi; rigereria timoichanigwa, ekiagera ekeene, aya onsi nabe; korende omoerio toracha.
Ⅶ Inaki egesaku nakeimoke korwana negesaku kende, na oborwoti inaborwane noborwoti bonde; enchara na emetengecho y’ense inabibe ase chinsemo ne chinsemo.
Ⅷ Ayio onsi naro omochakano bw’obororo.
Yeso ogokwana igoro y’ogochandwa
Ⅸ Erio inabaabarue monyare gochandwa na goitwa, na inwe inamwangwe nebisaku bionsi ase engencho y’erieta riane.
Ⅹ Na ekero ekio abanto abange inabagwe korwa ase okwegena kwabo, inabasigaanane na kobeekana ase ababisa babo, naende nabagechane,
Ⅺ na ababani b’oborimo abange mbaimoke, baraae abange na kobasiria.
Ⅻ Nase engencho y’okomenteka kw’ebibe, obwanchani bw’abange ’nabokende.
ⅩⅢ Korende oy’oraaremererie goika omoerio, oyio natooreke.
ⅩⅣ Naende, amang’ana aya amaya y’oborwoti narandigwe ase ense yonsi koba kirori ase ebisaku bionsi; erio omoerio ochiche.
Okogechia kw’ogosaria
ⅩⅤ Gaki, naboigo kamogocha korora okogechia kw’ogosaria gwatebetwe nomobani Danieli, kogotenena Aase Aachenu (oy’ogosoma amanye),
ⅩⅥ erio abare Boyahudi batame gochia ase ebitunwa.
ⅩⅦ Ere oyore kerama igoro taika kogenda kobogoria gento ekere nyomba mwaye,
ⅩⅧ na ere oyore mogondo tairana nyomba kobogoria eyanga yaye.
ⅩⅨ Korende nebe aakong’u ase abare morito na abakogonkia ase amatuko aria.
ⅩⅩ Korende saba ng’a ogotama kwaino tikoba ekero gi’etoigo, gose ase rituko ri’Esabato,
ⅩⅪ ekiagera agwo n’ebe emechando emenene, etana koba korwa omochakano bw’ense goika bono, gose tekoba bo naende nonya ng’ake.
ⅩⅫ Naende onye amatuko ayio atanachetwe, anga monto onde bwensi tatooregete; korende ase engencho y’abachore amatuko ayio nanachwe.
ⅩⅩⅢ Na ekero ekio omonto karabateebie: Rora, Kristo naa are! Gose: Ooria! Timwancha.
ⅩⅩⅣ Inaki nabaoroke abakristo b’oborimo, na ababani b’oborimo, nabaorokie ebikone ebinene na amakumia, goika keranyarekane, nabang’aine nonya nabachore.
ⅩⅩⅤ Rora, nabateebirie aya ritang’ani.
ⅩⅩⅥ Gaki, kobarabateebie: Rora, oyo ore ase erooro, timosoka isiko; kobarabateebie: Oyo ore ebinunchi bia bobisi, timwancha.
ⅩⅩⅦ Inaki buna okomesa gokorwa moocha kwabara gochia bosongo, naboigo ogocha kw’Omwana-o-Mwanyabaanto korache koba.
ⅩⅩⅧ Inaki aase ribego rire, nao chinsoti chigosangererekana.
Ogocha kw’omwana Omwanyabaanto
(Mar 13:24-27; Luk 21:25-28)
ⅩⅩⅨ Korende bwango magega y’emechando y’amatuko aria, erioba narionchoke ribe omosunte, na omotienyi tokobara, ne ching’enang’eni nachigwe korwa igoro, ne chinguru chia igoro nachitengechigwe.
ⅩⅩⅩ Erio nario ekemanyererio ki’Omwana-o-Mwanyabaanto kerache kororekana igoro, na ebisaku bionsi bi’ense nario biraarere; naende nabarore omwana‐o‐Mwanyabaanto ogocha ase amare a igoro ne chinguru, na obonene obonge.
ⅩⅩⅪ Erio natome abamalaika baye na egeturi ekenene ki’egetuureri, na barabwo mbasangererie abachoore baye korwa ase chinsinyo inye, korwa ensinyo eyemo ya igoro goika eyende.
Amorokererio korwa ase omoko
(Mar 13:28-37; Luk 21:29-36; 17:26-30)
ⅩⅩⅫ Eorokererie omobayeeno oyo korwa ase omoko: Orosagia rwaye korwachaakire koorokia amato aye, mwamanyire ng’a nekero ki’ogoseboka, egura gura ng’ang’e ere.
ⅩⅩⅩⅢ Naboigo nainwe komokorora aya aorokire, momanye ng’a omoerio obeire ang’e na gesieri.
ⅩⅩⅩⅣ Nekeene nabateebirie: Ekegori eke tikegoeta nonya ng’ake goika aya onsi anyare koba.
ⅩⅩⅩⅤ Igoro na ense nabiete, korende amang’ana aane takonyara goeta nonya ng’ake.
Onde taiyo omanyete rituko nonya n’ensa
ⅩⅩⅩⅥ Korende amang’ana ye rituko riria, na ensa eria onde tari omanyete, nonya nabamalaika ba igoro, nonya n’Omwana, otatiga Tata bweka.
ⅩⅩⅩⅦ Korende buna amatuko aria a Nuhu abeete, naboigo ogocha kw’Omwana-o-Mwanyabaanto korache koba.
ⅩⅩⅩⅧ Inaki buna barenge ase amatuko aria etoigo etaracha, baare koria, bakonywa, bakonyuoma, bakonyuomerigwa, goika rituko riria Nuhu asoete ase obwato,
ⅩⅩⅩⅨ na barabwo tibamanya goika etoigo egaacha, ekabasiria bonsi; naboigo ogocha kw’Omwana-o-Mwanyabaanto koraache koba.
ⅩⅬ Engaki eyio abanto babere inababe mogondo; oyomo nairwe, na oyomo natigwe.
ⅩⅬⅠ Abakungu babere inababe bagoseera orogena oromo; oyomo nairwe, na oyomo natigwe.
ⅩⅬⅡ Ase ayio, renda, ekiagera timomanyeti ituko ki Omonene oino agocha.
ⅩⅬⅢ Korende manya aya, onye omonyene enyomba namanyete nkero ki ase obotuko omoibi agocha, anga narendete taiberwa.
ⅩⅬⅣ Ase ayio nainwe, kabe ang’e; naki ase ensa eria motakagereti nario Omwana-o-Mwanyabaanto araache.
Abasomba abegenwa na abatari abegenwa
(Luk 12:42-46)
ⅩⅬⅤ Ning’o rende ore omosomba omwegenwa, naende ore omong’aini, obegetwe nomonene oye igoro ase enyomba yaye, ae abanto endagera ase ekero kegwenerete?
ⅩⅬⅥ Nasesenirie omosomba oria, ekero omonene oye arache amonyore ogokora bo.
ⅩⅬⅦ Nekeene nabateebirie ng’a namobeke igoro ase ebi abwate bionsi.
ⅩⅬⅧ Korende omosomba oria omobe, karateebe ase omoyo oye ime: Omonene one otebanire goocha,
ⅩⅬⅨ achaake goaka abasomba b’omonene oye, na koria na konywa amo nabagotinda,
Ⅼ omonene bw’omosomba oria nigo araache rituko atakagereti, na ensa atamanyeti;
ⅬⅠ ere namonachane abe ebing’ese namobeeke amo nabang’ainereria. Aroro abanto ’mbabe nekerero na okoriania amaino.