Ⅳ
Ogoteemwa kwa Yeso ase erooro
(Mar 1:12-13; Luk 4:1-13)
Ⅰ Erio Yeso akaragwa n’Omoika gochia ase erooro gochia goteemwa na Saitani.
Ⅱ Akeng’ata ase egeka ki’amatuko emerongo ene, obotuko n’omobaso. Magega ase aya, enchara ekamoria.
Ⅲ Omoteemi agacha, akamoteebia, “Onye aye kore Omwana o Nyasae, teebia amagena aya abe omogati.”
Ⅳ Korende Yeso akairaneria, “Neriikire: Omonto takomenya ase omogati bwoka, korende ase kera ring’ana rikorwa ase omonwa o Nyasae.”
Ⅴ Erio Saitani akamoira goika Yerusalemu omochie omochenu, akamobeka igoro ase egechuuria egetambe mono gie Hekalu.
Ⅵ Akamoteebia, Onye aye kore Omwana o Nyasae, etugute gochia inse, ekiagera neriikire
Nyasae nagochiikere abamalaika baye bakorende,
na barabwo nabakoimokie ase amaboko abo,
erinde togochwa okogoro kwao ne rigena.
Ⅶ Yeso akamoteebia, “Naende neriikire Toteema Omonene Nyasae oo.”
Ⅷ Naende Saitani akamoira ase ekegoro egetambe mono, akamworokia amarwoti onsi y’ense, na obonene bwabo,
Ⅸ akamoteebia, “Ebi bionsi ninkoe, koratung’amere onsasiime.”
Ⅹ Erio Yeso akamoteebia, Karue aa, Saitani! Ekiagera neriikire, “Osasiime Omonene Nyasae oo, omokorere ere bweka.”
Ⅺ Erio Saitani akamotiga, na rora, abamalaika bagaacha, bakamokorera.
Yeso ogochaaka emeremo yaye Galili
(Mar 1:14-15; Luk 4:14-15)
Ⅻ Ekero Yeso achia koigwa ng’a Yohana osibirwe echela, akaimoka, akagenda Galili.
ⅩⅢ Akaimoka korwa Nazareti, akagenda, akamenya Kapernaumu, omochie ore ang’e n’enyancha ase chimbebe chia Sabuloni na Nafutali,
ⅩⅣ rinyare goikerana eriatebetwe nomobani Isaya,
ⅩⅤ “Ense ya Sabuloni na ense ya Nafutali,
enchera egochia enyancha ng’umbu ya Yorodani,
Galili, ense y’ abanto b’Ebisaku,
ⅩⅥ abanto abamenyete omosunte ime, barorire omobaso omonene,
na abamenyete ensemo y’ekiriri ki’amakweri,
omobaso obabareire.”
ⅩⅦ Korwa ekero ekio Yeso agachaaka korandia, ogoteeba, “Onchoka, ekiagera oborwoti bwa igoro bwaikire ang’e.”
Yeso okorangeria aborokigwa baye b’eritang’ani
(Mar 1:16-20; Luk 5:1-11)
ⅩⅧ Ekero Yeso arenge gotaara ase engegu y’enyancha ya Galili, akarora abamura babere bamwabo abwo barenge abarubi, Simioni (oyokorokwa Petero), na Anderea omwabo, bakoruta ekeonga enyancha ime, erio barube chinswe.
ⅩⅨ Yeso akabateebia, “Inchuo montuny’ane na inche nimbakore mobe abarubi b’abaanto.”
ⅩⅩ Erio agwo kegima bagatiga ebionga biabo, bakamotunyana.
ⅩⅪ Erio akagenda gochia motwe korwa aroro, akarora abamura babere bande bamwabo, Yakobo omwana o Zebedi, na Yohana omwabo, barenge obwato ime amo na Zebedi ise bakoroisia ebionga biabo, na barabwo akabarangeria.
ⅩⅫ Erio kegima bagatiga obwato boria, bagatiga na ise, bakamotunyana.
Yeso Okoranderia omoganda bw’abaanto
(Luk 6:17-19)
ⅩⅩⅢ Yeso nigo arenge kona goetanana ase ense engima ya Galili, okworokereria ase chisinagogi chiabo, okorandia amang’ana amaya y’oborwoti, okogwenia amarwaire onsi na oboreu bwonsi obwarenge ase abanto.
ⅩⅩⅣ Chinkuma chiaye chigasarera ase ense yonsi ya Siiria; bakamorentera abarwaire bonsi ababwatire namarwaire ao ao, y’obosareru, na ababwatire n’ebirecha, na abaare ne chindurume, na abarenge amagata, akabagwenia.
ⅩⅩⅤ Emeganda emenge ekamotunyana korwa Galili, na Dekapoli, na Yerusalemu, na Boyahudi, na ng’umbu ya Yorodani.