EGETABU KW’OMOBARO
Ogochaakera
Egetabu Kw’omobaro n’egetabu kebokwanera igoro y’omogano bw’abaisraeli ang’e emiaka emerongo ene korwa baruete ase egetunwa gia Sinai goika bagaika moocha y’engegu y’ense eria Nyasae abarierete eira ng’a nabae. Erieta ri’egetabu nigo rikoraga ensemo gete ase omogano eyio ere okobarwa okio Musa akorerete Abaisraeli agwo ase egetunwa gia Sinai nyuma batarachaaka orogendo rwabo, boigo naria Moabu, moocha y’oroche rwa Yorodani ang’e ekegori ekemo nyuma.
Gati y’okobarwa oko ara kabere, Abaisraeli bakagenda Kadeshi-Barinea agwo ase engegu ya sugusu ya Kanaani, korende bagasinywa gosoa ense y’omwando korwa aroro. Nyuma yokomenya aiga ase emiaka emenge, bakagenda goika moocha y’oroche rwa Yorodani, agwo ase abanto bande bamenyete nabande bakearigania kwamboka oroche gochia Kanaani.
Omobaro nomoroberio bw’abanto abwo ase chingaki chinde bakwete omoyo na bakoboa emechando na koba mamincha ya Nyasae na Musa, omonto oyio Nyasae achorete abarae. Nomogano igoro yobwegenwa bwa Nyasae n’oborendi bwaye bogendererete botambe ase abanto baye nonya barabwo barenge aboro boigo nabatare koigwera, boigo nogotaremereria kwa Musa nokwerwa kwaye gochia ase Nyasae nabanto baye.
Okobagwa kw’egetabu eke:
Abaisraeli bakomanora gotiga Egetunwa gia Sinai 1:1—9:23
a. Omobaro bw’eritang’ani bw’ abanto 1:1—4:49
b. Amachiiko na emeroberio 5:1—8:26
c. Epasaka ya kabere 9:1-23
Korwa Egetunwa gia Sinai goika Moabu 10:1—21:35
Ayare gokoreka agwo Moabu 22:1—32:42
Orogeendo korwa Misiri goika Moabu ase obweng’e 33:1-49
Ogotebereria ekero bataramboka Yorodani 33:50—36:13
Ⅰ
Omobaro bw’eritang’ani bw’abaisraeli
Ⅰ Ase rituko rie ritang’ani ri’omotienyi o kabere bw’omwaka o kabere magega Abaisraeli kobarure ase ense ya Misiri, Omonene agakwana na Musa ime y’Eema y’Omosangererekano, agwo ase erooro ya Sinai, okomoteebia,
Ⅱ “Kora omobaro bw’omoganda bwonsi bw’Abaisraeli, eamate ase eamate, na enyomba ase enyomba. Oriike amarieta y’ abanto abasacha bonsi, oyomo ase oyomo.
Ⅲ Aye amo na Aroni mobare abanto abakoorire emiaka emerongo ebere na goetania, baria baranyare korwana esegi, mobaroberie ase esegi, ekeombe ase ekeombe.
Ⅳ Naende mochore korwa ase kera egesaku omonto oyomo ore omoteneneri obo. Barabwo babe amo nainwe ase okobakonya.
Ⅴ Amarieta y’ abanto abwo naro aya:
Korwa ase egesaku kia Rubeni, Elisuri, mosinto o Sedeuri.
Ⅵ Korwa ase egesaku gia Simioni, Selumieli, mosinto o Surisadai.
Ⅶ Korwa ase egesaku kia Yuda, Nahasoni, mosinto bw’Aminadabu.
Ⅷ Korwa ase egesaku gia Isakaru, Netaneli, mosinto o Suari.
Ⅸ Korwa ase egesaku gia Sabuloni, Eliabu, mosinto o Heloni.
Ⅹ Korwa ase basinto ba Yusufu: ase egesaku gi’Efraimu, Elisama, mosinto bw’Amihudi, na ase egesaku kia Manase, Gamalieli, mosinto o Pedasuri.
Ⅺ Korwa ase egesaku kia Benjamini, Abidani, mosinto o Gidioni.
Ⅻ Korwa ase egesaku gia Dani, Ahieseri, mosinto bw’Amisadai.
ⅩⅢ Korwa ase egesaku gi’Aseri, Pagieli, mosinto bw’Okirani.
ⅩⅣ Korwa ase egesaku kia Gadi, Eliasafu, mosinto o Deueli.
ⅩⅤ Korwa ase egesaku kia Nafutali, Ahira, mosinto o Enani.”
ⅩⅥ Abaaanto aba nabwo barenge abateneneri ase ebisaku ebio biabo, naende abatang’ani be chiamate chi’Abaisraeli, bachoretwe korwa ase omoganda bwonsi.
ⅩⅦ Musa na Aroni bakaira abanto abwo baatoretwe ase amarieta abo,
ⅩⅧ na ase rituko rie ritang’ani ri’omotienyi o kabere bagasangereria omoganda bwonsi bw’ abanto amo. Bakariika amarieta y’ abanto abwo konya bakoorire emiaka emerongo ebere na goetania, eamate ase eamate, na enyomba ase enyomba, na omonto ase omonto.
ⅩⅨ Musa akabara abanto abwo na kobarika, agwo ase erooro ya Sinai, buna Omonene konya amochiikire.
ⅩⅩ Abanto b’ororeria rwa Rubeni, omotangi o Israeli, bakariikwa, omonto ase omonto, ase chiamate chiabo ne chinyomba chiabo. Abaaanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi,
ⅩⅪ nigo barenge chilifu emerongo ene na isano nemo, n’amagana atano (46,500).
ⅩⅫ Abanto b’ororeria rwa Simioni bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi,
ⅩⅩⅢ nigo barenge chilifu emerongo etano na kianda, n’amagana atato (59,300).
ⅩⅩⅣ Abanto b’ororeria rwa Gadi bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi,
ⅩⅩⅤ nigo barenge chilifu emerongo ene naisano, n’amagana atano nomo, namerongo etano (45,650).
ⅩⅩⅥ Abanto b’ororeria rwa Yuda bakariikwa, omonto ase omonto, ase chiamate chiabo ne chinyomba chiabo Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi,
ⅩⅩⅦ nigo barenge chilifu emerongo etano nebere na inye, n’amagana atano nomo (74,600).
ⅩⅩⅧ Abanto b’ororeria rwa Isakaru bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi,
ⅩⅩⅨ nigo barenge chilifu emerongo etano nainye, n’amagana ane (54,400).
ⅩⅩⅩ Abanto b’ororeria rwa Sabuloni bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi,
ⅩⅩⅪ nigo barenge chilifu emerongo etano na isano ibere, n’amagana ane (57,400).
ⅩⅩⅫ Abanto b’ororeria rwa Yusufu, narwo orw’Efraimu, bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi,
ⅩⅩⅩⅢ nigo barenge chilifu emerongo ene, n’amagana atano (40,500).
ⅩⅩⅩⅣ Abanto b’ororeria rwa Manase bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi,
ⅩⅩⅩⅤ nigo barenge chilifu emerongo etato naibere, n’amagana abere (32,200).
ⅩⅩⅩⅥ Abanto b’ororeria rwa Benjamini bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi,
ⅩⅩⅩⅦ nigo barenge chilifu emerongo etato naisano, n’amagana ane (35,400).
ⅩⅩⅩⅧ Abanto b’ororeria rwa Dani bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi,
ⅩⅩⅩⅨ nigo barenge chilifu emerongo etano nomo naibere, n’amagana atano n’abere (62,700).
ⅩⅬ Abanto b’ororeria rw’Aseri bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi,
ⅩⅬⅠ nigo barenge chilifu emerongo ene nomo, n’amagana atano (41,500).
ⅩⅬⅡ Abanto b’ororeria rwa Nafutali bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi,
ⅩⅬⅢ nigo barenge chilifu emerongo etano naisato, n’amagana ane (53,400).
ⅩⅬⅣ Aba nabwo barigetwe na Musa, na Aroni, na abatang’ani b’Abaisraeli ikomi na babere, abatenenerete kera oyomo egesaku kiaye.
ⅩⅬⅤ Abaisraeli bonsi abarigetwe, enyomba ase enyomba, baria konya bakoorire emiaka emerongo ebere na goetania, naende baare konyara korwana esegi,
ⅩⅬⅥ nigo barenge chilifu amagana atano nomo na isato, n’amagana atano, namerongo etano (603,550).
ⅩⅬⅦ Korende abanto b’ororeria rwa Lawi, barabwo tibaabaretwe amo n’abanto abwo bande,
ⅩⅬⅧ ekiagera Omonene nigo atebeetie Musa,
ⅩⅬⅨ “Abanto b’egesaku kia Lawi tobaabara amo n’Abaisraeli bande.
Ⅼ Obeeke Abalawi babe bakorenda Obomenyo Obochenu obwo bore noborori, naende babe bakorenda ebinto bire ase Obomenyo boria ime, na ebikorero biaye. ’Nababe bakobobogoria amo n’ebinto biaye bionsi, na gokora emeremo imeo. Barabwo nigo baratenenie chiema chiabo chi’okomenya chietanane Obomenyo obwo.
ⅬⅠ Ekero Obomenyo obwo boraabe bokong’anyigwa, Abalawi nabwo barabosimore, na ekero boraabe bogotenenigwa naende, nabwo barabotenenie aase agwo. Omonto onde bwensi otachikiri aise goika ang’e n’Obomenyo obwo goika aitwe akwe.
ⅬⅡ Abaisraeli bande nabatenenie chiema chiabo, kera egesaku ase egetwori kiaye, na kera omonto abeere inse y’ebendera yaye, ase ekeombe kiaye.
ⅬⅢ Korende Abalawi nigo baratenenie chiema chiabo chietanane Obomenyo obwo bore noborori, na komenyao, erinde endamwamu yane etangwe tebaisa kogwera omoganda bwonsi bw’Abaisraeli. Abalawi barende Obomenyo obwo bore noborori.”
ⅬⅣ Abaisraeli bagakora onsi buna Omonene abachiigete goetera ase Musa.